സിഖ് വിരുദ്ധകലാപക്കേസ്: ജീവപര്യന്തം ശിക്ഷക്കെതിരെ സജ്ജന്‍ കുമാറിന്റെ അപ്പീല്‍ ഇന്ന് സുപ്രീം കോടതിയിൽ
സിഖ് വിരുദ്ധ കലാപക്കേസിൽ ജീവപര്യന്തം ശിക്ഷയ്ക്കെതിരെ മുൻ കോൺഗ്രസ്സ് നേതാവ് സജ്ജൻ കുമാർ നൽകിയ അപ്പീൽ സുപ്രീംകോടതി ഇന്ന് പരിഗണിക്കും. ജസ്റ്റിസുമാരായ എസ്‌എ ബോബ്ഡെ അബ്ദുള്‍ നസീര്‍ എന്നിവര്‍ ചേര്‍ന്ന ബെഞ്ചാണ് അപ്പീലില്‍ ഇന്ന് വാദം കേള്‍ക്കുന്നത്. നേരത്തെ , അപ്പീലില്‍ വാദം കേള്‍ക്കുന്നതില്‍നിന്നു സുപ്രീംകോടതി ജസ്റ്റിസ് സഞ്ജയ് ഖന്ന ഫെബ്രുവരി 25ന് പിന്‍മാറിയിരുന്നു.
താന്‍ ദില്ലി ഹൈക്കോടതി ജഡ്ജിയായിരുന്നപ്പോള്‍ സജ്ജന്‍കുമാറിന്റെ ഹര്‍ജിയില്‍ വാദം കേട്ടിരുന്നുവെന്നു വ്യക്തമാക്കിയാണു ജസ്റ്റിസ് ഖന്ന അപ്പീല്‍ പരിഗണിക്കുന്നതില്‍ നിന്ന് പിന്‍മാറിയത്.
1984ലെ സിഖ് വിരുദ്ധ കലാപത്തില്‍ ഒരു കുടുംബത്തിലെ അഞ്ചുപേര്‍ കൊല്ലപ്പെട്ട കേസില്‍ സജ്ജന്‍ കുമാര്‍ കുറ്റക്കാരനാണെന്ന് ഡിസംബര്‍ 17ന് ഡല്‍ഹി ഹൈക്കോടതി കണ്ടത്തിയിരുന്നു. ഇതേതുടര്‍ന്ന് സജ്ജന്‍ കുമാറിനെ കോടതി ജീവപര്യന്തം ശിക്ഷക്ക് വിധിച്ചിരുന്നു. ഇതിനെതിരെയാണ് സജ്ജന്‍ സുപ്രീം കോടതിയെ സമീപിച്ചിരിക്കുന്നത്. കേസിൽ ദില്ലി ബോര്‍ഡറിലുള്ള മന്‍ഡോലി ജയിലില്‍ ശിക്ഷയനുഭവിക്കുകയാണ് സജ്ജന്‍ കുമാര്‍ ഇപ്പോള്‍.
https://www.facebook.com/Malayalivartha
