രാഹുലിന്റേത് വെറും വാഗ്ദാനങ്ങള് മാത്രം; കോണ്ഗ്രസ് അധ്യക്ഷന് രാഹുല് ഗാന്ധി മുന്നോട്ട് വച്ച മിനിമം വരുമാനം വാഗ്ദാനത്തെ പരിഹസിച്ച് കേന്ദ്രമന്ത്രി രവിശങ്കര് പ്രസാദ്
ദാരിദ്ര്യ നിര്മാര്ജനം ലക്ഷ്യമിട്ട് കോണ്ഗ്രസ് അധ്യക്ഷന് രാഹുല് ഗാന്ധി മുന്നോട്ട് വച്ച മിനിമം വരുമാനം വാഗ്ദാനത്തെ പരിഹസിച്ച് ബിജെപി. രാഹുലിന്റേത് വെറും വാഗ്ദാനങ്ങള് മാത്രമാണെന്നും ഒന്നും നടക്കാന് പോകുന്നില്ലെന്നും കേന്ദ്രമന്ത്രി രവിശങ്കര് പ്രസാദ് തുറന്നടിച്ചു. മുന്പ് രാഹുലിന്റെ മുന്ഗാമികളും ഇത്തരം വാഗ്ദാനങ്ങള് നടത്തിയിട്ടുണ്ടെന്നും അതെല്ലാം പ്രഖ്യാപനത്തില് മാത്രം ഒതുങ്ങിയ ചരിത്രമാണുള്ളതെന്നും രവിശങ്കര് പ്രസാദ് പറഞ്ഞു.
1971ല് ഇന്ദിരാ ഗാന്ധി 'ഗരീബി ഹഠാവോ" മുദ്രാവാക്യം മുന്നോട്ട് വച്ചു. പക്ഷേ, അത് വാക്കുകളില്ല് മാത്രമൊതുങ്ങി. പിന്നീട് രാജീവ് ഗാന്ധിയും ഇത്തരം ചില മോഹനവാഗ്ദാനങ്ങള് നല്കി അതും വൃഥാവിലായി. അതിന്റെ തുടര്ച്ച മാത്രമാണ് ഇപ്പോള് രാഹുല് നടത്തിയ വാഗ്ദാനമെന്നും അദ്ദേഹം പറഞ്ഞു.
ആ വാഗ്ദാനം വിശ്വസിച്ചാല് അത് വെറും സ്വപ്നമാകുമെന്നും കോണ്ഗ്രസിന്റെ 55 വര്ഷത്തെ ഭരണ ചരിത്രം കര്ഷക വിരുദ്ധ നയങ്ങളുടേതാണെന്നും രവിശങ്കര് പ്രസാദ് കൂട്ടിച്ചേര്ത്തു. തിങ്കളാഴ്ച നടത്തിയ വാര്ത്താ സമ്മേളനത്തിലാണ് കോണ്ഗ്രസ് അധികാരത്തിലെത്തിയാല് മിനിമം വരുമാനം ഉറപ്പാക്കുമെന്നും രാഹുല് വ്യക്തമാക്കിയത്.
ഒരു കുടുംബത്തിന് പ്രതിമാസം മിനിമം 6,000 മുതല് 12,000 രൂപ വരെ വരുമാനം ഉറപ്പാക്കുംമെന്നും ഇതിനായി പ്രത്യേക പദ്ധതികള്ക്ക് രൂപം നല്കുമെന്നും പറഞ്ഞ കോണ്ഗ്രസ് അധ്യക്ഷന് അഞ്ച് കോടി കുടുംബങ്ങളിലായി 25 കോടി ജനങ്ങള്ക്ക് ഇത് പ്രയോജനം ചെയ്യുമെന്നും പറഞ്ഞിരുന്നു.
രാജ്യത്തെ എല്ലാ കുടുംബങ്ങള്ക്കും മിനിമം വരുമാനപരിധി നിശ്ചയിച്ച് ഈ പദ്ധതി നടപ്പാക്കാനാണ് ഉദ്ദേശിക്കുന്നതെന്നും ഘട്ടം ഘട്ടമായിട്ടാണ് പദ്ധതി നടപ്പാക്കുകയെന്നും പറഞ്ഞ രാഹുല് 12,000 രൂപയ്ക്ക് താഴെ വരുമാനമുള്ള കുടുംബങ്ങള്ക്ക് ബാക്കി വരുന്ന തുക സര്ക്കാര് പ്രതിമാസ സഹായമായി നല്കുമെന്നും അറിയിച്ചിരുന്നു. ഒരു കുടുംബത്തിന് ഒരു വര്ഷം 72,000 രൂപ ഈ രീതിയില് ലഭിക്കുമെന്നായിരുന്നു അദ്ദേഹത്തിന്റെ വാഗ്ദാനം.
https://www.facebook.com/Malayalivartha