ലോകത്തെ 19ാം നൂറ്റാണ്ടിലേക്ക് തിരികെ നടത്തുമെന്ന് ചീത്തപ്പേരുള്ള വിവാദ മിസൈല്‍. സൂപ്പര്‍ ശക്തികള്‍ക്ക് മാത്രം സ്വന്തം. പാകിസ്ഥാനെതിരെ സൈനിക നടപടിയുണ്ടാകുമോ എന്ന് പോലും തോന്നിച്ചിടത്താണ് ബഹിരാകാശ രംഗത്ത് ഇന്ത്യ കൈവരിച്ച നേട്ടത്തെക്കുറിച്ച് പ്രധാനമന്ത്രി നരേന്ദ്ര മോദി രാജ്യത്തെ അഭിസംബോധന ചെയ്ത് സംസാരിച്ചത്. അമേരിക്ക, റഷ്യ, ചൈന എന്നീ സൂപ്പര്‍ പവര്‍ രാജ്യങ്ങള്‍ക്ക് മാത്രം കൈവശമുണ്ടായിരുന്ന സാങ്കേതിക വിദ്യ സ്വന്തമാക്കിയതോടെ പ്രതിരോധ, വികസന രംഗത്ത് ഇന്ത്യ വന്‍ കുതിച്ചുചാട്ടം നടത്തുമെന്നാണ് മോദി അവകാശപ്പെട്ടത്. എന്നാല്‍ ലോ എര്‍ത്ത് ഓര്‍ബിറ്റില്‍ ഭൂമിയെ ചുറ്റുന്ന കൃത്രിമ ഉപഗ്രഹങ്ങളെ വീഴ്ത്തുന്ന ആന്റി സാറ്റലൈറ്റ് മിസൈല്‍ എന്താണ്. ആന്റി സാറ്റലൈറ്റ് മിസൈല്‍ ബഹിരാകാശത്തുള്ള ഉപഗ്രഹങ്ങളെ ഭൂമിയില്‍ നിന്ന് തകര്‍ക്കാന്‍ കഴിയുന്ന രീതിയിലുള്ള മിസൈലുകളാണ് ആന്റി സാറ്റലൈറ്റ് മിസൈലുകള്‍.

മിസൈലുകളെ തകര്‍ക്കാനോ അവയുടെ പ്രവര്‍ത്തനം താറുമാറാക്കാനോ കഴിയുന്ന വിധത്തിലാണ് ഇവയുടെ നിര്‍മാണം. കര, വായു, ജലം തുടങ്ങിയ പ്രതലങ്ങളില്‍ നിന്ന് മിസൈല്‍ വിക്ഷേപിക്കാം. 1957ല്‍ സോവിയറ്റ് യൂണിയന്‍ ലോകത്തെ ആദ്യ ഉപഗ്രഹം വിക്ഷേപിച്ചതോടെയാണ് ആന്റി സാറ്റലൈറ്റ് മിസൈലുകളെക്കുറിച്ചുള്ള ഗവേഷണം തുടങ്ങിയത്. 1980കളില്‍ തന്നെ അമേരിക്കയും സോവിയറ്റ് യൂണിയനും ആന്റി സാറ്റലൈറ്റ് മിസൈലുകള്‍ വിജയകരമായി വിക്ഷേപിച്ചു. എന്നാല്‍ ബഹിരാകാശത്തേക്ക് ആയുധം പ്രയോഗിക്കരുതെന്ന 1967ലെ യു.എന്‍ ഉടമ്പടിക്ക് വിരുദ്ധമായിരുന്നു ഇത്. പിന്നീട് ഇരുരാജ്യങ്ങളും പരീക്ഷണം നിറുത്തിയെങ്കിലും 2007ല്‍ ആന്റി സാറ്റലൈറ്റ് മിസൈല്‍ വിക്ഷേപിച്ച് ചൈന ലോകരാജ്യങ്ങളെ ഞെട്ടിച്ചു. മൂന്ന് പരാജയങ്ങള്‍ക്ക് ശേഷമായിരുന്നു ചൈനയുടെ വിക്ഷേപണ വിജയം. കൃത്രിമ ഉപഗ്രഹങ്ങള്‍ ഉപയോഗിച്ചുള്ള ചാരപ്രവര്‍ത്തനം തടയാന്‍ ഇന്ത്യയ്ക്ക് ഏറെ സഹായകമാണ് ആന്റി സാറ്റലൈറ്റ് മിസൈലുകള്‍. അടിയന്തര ഘട്ടങ്ങളില്‍ ശത്രുരാജ്യത്തിന്റെ വാര്‍ത്താ വിനിമയ ഉപഗ്രഹങ്ങളെ തകര്‍ത്ത് ആശയവിനിമയം തടസപ്പെടുത്താനും കഴിയും. എന്നാല്‍ ഇത് ലോകത്തെ പത്തൊമ്പതാം ലോകത്തിലേക്ക് തിരികെ എത്തിക്കുമെന്നാണ് സുരക്ഷാ രംഗത്തെ വിദഗ്ദ്ധര്‍ പറയുന്നത്.