ലോക്‌സഭയിലെ ഏറ്റവും കൂടുതല്‍ സീറ്റുകളുള്ള ഹിന്ദി ഹൃദയഭൂമിയിലെ ഉത്തര്‍പ്രദേശില്‍ നിന്ന് മോദിയുടെ തെരഞ്ഞെടുപ്പ് പര്യടനം തുടങ്ങി. ബിജെപിക്കെതിരെ ഒന്നിച്ച എസ്പിബിഎസ്പി സഖ്യത്തെ കടന്നാക്രമിച്ചും രാഹുല്‍ ഗാന്ധിയെ കളിയാക്കിയുമായിരുന്നു പര്യടനടത്തിലെ മോദിയുടെ ആദ്യപ്രസംഗം. മീററ്റിലെ ആദ്യപരിപാടിയ്ക്ക് ശേഷം ഉത്തര്‍പ്രദേശിലെ രുദ്രാപൂരിലും അഖ്‌നൂറിലുമാണ് മോദിയുടെ തെരഞ്ഞെടുപ്പ് റാലികള്‍.

ഇന്ത്യയുടെ എസാറ്റ് പരീക്ഷണത്തെ അഭിനന്ദിച്ചും, ഒപ്പം മോദിക്ക് 'ലോകനാടകദിനാശംസകള്‍' നേര്‍ന്നും ട്വീറ്റ് ചെയ്ത കോണ്‍ഗ്രസ് അധ്യക്ഷന്‍ രാഹുല്‍ ഗാന്ധിയെ മോദി കളിയാക്കി. ''ഇന്ത്യ ബഹിരാകാശരംഗത്തെ വലിയൊരു നേട്ടം സ്വന്തമാക്കി. ഇത് തിരിച്ചറിയുക പോലും ചെയ്യാത്തവരുടെ ബുദ്ധിയില്‍ത്തന്നെ എനിക്ക് സംശയം തോന്നുകയാണ്. തീയറ്ററില്‍ നാടകം കാണുന്നതിന് മുമ്പ് പോയാല്‍ നമുക്കെന്താണ് കേള്‍ക്കാനാകുക? സെറ്റ് എവിടെ, സെറ്റ് തയ്യാറായോ എന്നൊക്കെയുള്ള ചോദ്യങ്ങളല്ലേ? ഇതും എസാറ്റും തമ്മില്‍ തിരിച്ചറിയാന്‍ പോലും ഇവിടെ ചിലര്‍ക്ക് കഴിവില്ല'', എന്ന് മോദി.

''ഉപഗ്രഹവേധമിസൈല്‍ എസാറ്റിന്റെ പരീക്ഷണം നടത്തണമെന്ന് ഡിആര്‍ഡിഒ പല തവണ യുപിഎയോട് ആവശ്യപ്പെട്ടതാണ്. പക്ഷേ അവര്‍ ഇതിന് അനുമതി നല്‍കിയില്ല. ഇവിടെ ധൈര്യമുള്ള ഒരു സര്‍ക്കാരുണ്ടായി. അതുകൊണ്ട് തന്നെ പരീക്ഷണം നടത്താനായി'', എന്നും മോദി പറഞ്ഞു.

ബാലാകോട്ട് ആക്രമണത്തിന് തെളിവ് ചോദിച്ച കോണ്‍ഗ്രസ് നേതാക്കള്‍ക്കും പരിഹാസം. ''ചിലര്‍ക്ക് തെളിവ് (സബൂത്) വേണം. നിങ്ങള്‍ പറയൂ, നിങ്ങള്‍ക്ക് സബൂത് വേണോ, സപുത് (നല്ല മകന്‍) വേണോ? ഇന്ത്യയുടെ നല്ല മകനാണ് ഇന്ത്യയുടെ ഏറ്റവും വലിയ തെളിവ്'', എന്ന് മോദി.

രാഹുല്‍ ഗാന്ധി കളങ്കിതനാണെന്നും മോദി ആരോപിച്ചു. 2019ല്‍ ആരെ തെരഞ്ഞെടുക്കണമെന്ന് ഇന്ത്യ തീരുമാനിച്ച് കഴിഞ്ഞു. ബിജെപി അധികാരത്തില്‍ വരും. രാഹുലിന്റെ 'ചൗകീദാര്‍' ആരോപണത്തിന് മോദി നല്‍കിയ മറുപടി ഇങ്ങനെ: ''ചൗകീദാറും ദാഗ്!ദാറും (കളങ്കിതന്‍) തമ്മിലുള്ള പോരാട്ടമാണ് ഇവിടെ നടക്കുന്നത്. ഇവരിലാരെ വേണമെന്ന് നിങ്ങള്‍ തന്നെ തീരുമാനിക്കൂ''.

പുല്‍വാമ ഭീകരാക്രമണത്തിനും ബാലാകോട്ട് പ്രഖ്യാപനത്തിന്റെയും പേരില്‍ രാഷ്ട്രീയപ്രസ്താവനകള്‍ നടത്തിയ പ്രതിപക്ഷമഹാസഖ്യത്തിന് ഇന്ത്യയിലല്ല, പാകിസ്ഥാനില്‍ നിന്നാകും കൂടുതല്‍ വോട്ട് കിട്ടുകയെന്നും മോദി ആരോപിച്ചു.