ഗുജറാത്ത് തലസ്ഥാനമായ ഗാന്ധിനഗറില്‍ നിന്ന് മത്‌സരിക്കുന്ന ബി.ജെ.പി ദേശീയാധ്യക്ഷന്‍ അമിത് ഷാ ഇന്ന് നാമ നിര്‍ദേശ പത്രിക നല്‍കും. എന്‍.ഡി.എയുടെയും പാര്‍ട്ടിയുടെയും മുതിര്‍ന്ന നേതാക്കള്‍ക്കൊപ്പമായിരിക്കും പത്രിക സമര്‍പ്പിക്കാന്‍ അമിത് ഷാ എത്തുക.
നാമനിര്‍ദേശ പത്രിക സമര്‍പ്പിക്കുന്നതിന് മുമ്പ് അഹമ്മദാബാദില്‍ റോഡ്‌ഷോയും പൊതു യോഗവും സംഘടിപ്പിക്കും. കേന്ദ്രമന്ത്രിമാരായ രാജ്‌നാഥ് സിങ്, നിതിന്‍ ഗഡ്കരി എന്നിവര്‍ റോഡ്‌ഷോയില്‍ അമിത്ഷായെ അനുഗമിക്കുമെന്നാണ് വിവരം.
അഹമ്മദാബാദിലെ നാരാണ്‍പുര മേഖലയില്‍ സര്‍ദാര്‍ വല്ലഭായ് പട്ടേല്‍ പ്രതിമക്ക് സമീപത്തു നിന്നാരംഭിക്കുന്ന റോഡ് ഷോ നാല് കിലോ മീറ്റര്‍ ദൂരം സഞ്ചരിക്കും. ഘട്‌ലോദിയയിലെ പാട്ടീദാര്‍ ചൗക്കില്‍ റോഡ് ഷോ അവസാനിക്കുമെന്ന് ഗുജറാത്ത് ബി.ജെ.പി പ്രസിഡന്റ് ജിതു വഘനി പറഞ്ഞു. രാജ്യസഭാ എം.പിയായ അമിത്ഷാ ആദ്യമായാണ് ലോക് സഭയിലേക്ക് മത്‌സരിക്കുന്നത്. മുതിര്‍ന്ന നേതാവ് എല്‍.കെ അദ്വാനി ആറ് തവണ വിജയിച്ച സീറ്റിലാണ് അമിത്ഷാ മത്‌സരിക്കുന്നത്. പാര്‍ട്ടിയുടെ തീരുമാനത്തില്‍ അദ്വാനി അസ്വസ്ഥനാണ്. അതിനാല്‍ തന്നെ അമിത് ഷായുടെ തെരഞ്ഞെടുപ്പ് പ്രചാരണങ്ങള്‍ക്കൊന്നും അദ്വാനി പങ്കെടുക്കില്ല.

1991ല്‍ കോണ്‍ഗ്രസിന്റെ ജി.ഐ പട്ടേലിനെതിരെ ഒന്നേകാല്‍ ലക്ഷം വോട്ടുകളുടെ ഭുരിപക്ഷത്തില്‍ ഇവിടെ ജയിച്ച് അങ്കം തുടങ്ങിയതാണ് അദ്വാനി. 2014ലെ തെരഞ്ഞെടുപ്പില്‍ നാലുലക്ഷം വോട്ടുകളുടെ ഭൂരിപക്ഷത്തിലാണ് മണ്ഡലത്തില്‍ നിന്ന് ജയിച്ചത്.ഏപ്രില്‍ നാലിനാണ് നാമനിര്‍ദേശ പത്രിക സമര്‍പ്പിക്കേണ്ട അവസാന തീയതി. ഗുജറാത്തിലെ 26 ലോക്‌സഭാ സീറ്റിലേക്കും ഏപ്രില്‍ 23ന് തെരഞ്ഞെടുപ്പ് നടക്കും.