പാക്കിസ്ഥാന് സേനയുടെ പിടിയിലായിരിക്കെ വ്യോമസേന വിങ് കമാന്ഡര് അഭിനന്ദന് ലഭിച്ച ചായ വൈറലാകുന്നു
റെസിപ്പി ലെതേ ഹുയേ ആനാ (ആ റെസിപ്പി കൊണ്ടു വരണേ). പാക്കിസ്ഥാന് സേനയുടെ പിടിയിലായിരിക്കെ ലഭിച്ച ചായയെക്കുറിച്ച് വ്യോമസേന വിങ് കമാന്ഡര് അഭിനന്ദന് ഫോണില് പറഞ്ഞതിനു അദ്ദേഹത്തിന്റെ ഭാര്യ തന്വി മര്വാഹിന്റെ മറുപടിയാണിത്.
രാജ്യം ശ്വാസമടക്കിപ്പിടിച്ചു നിന്ന മണിക്കൂറുകള്ക്കൊടുവിലാണ് പാക്കിസ്ഥാന് പിടിയിലായ വിങ് കമാന്ഡര് അഭിനന്ദന് വര്ധമാന് മാതൃരാജ്യത്ത് മടങ്ങിയെത്തിയത്. ഐഎസ്ഐ കസ്റ്റഡിയില് നിന്ന് അഭിനന്ദന്റെ വിളിയെത്തിയപ്പോള് ഭാര്യയുടെ പ്രതികരണം ധൈര്യപൂര്വമുള്ളതായിരുന്നു.
വ്യോമസേനയില് ഹെലികോപ്റ്റര് പൈലറ്റായി സേവനമനുഷ്ഠിച്ചിട്ടുണ്ട് അഭിനന്ദന്റെ ഭാര്യ തന്വി മര്വാഹ്. സൗദി നമ്പരില് നിന്നുള്ള വിളി അന്നു ഫോണിലേക്ക് വന്നപ്പോള് തന്വി ജാഗ്രതയിലായി. ഭര്ത്താവിന്റെ സ്വരം മറുവശത്ത് നിന്ന് കേട്ടതോടെ അത് ഐഎസ്ഐയില് നിന്നാണെന്ന് അവര് മനസ്സിലാക്കി. കോള് റെക്കോഡ് ചെയ്തു.
ഭര്ത്താവ് സുരക്ഷിതനാണെന്നറിഞ്ഞ ശേഷം കുട്ടികളോട് എന്തു പറയണമെന്നാണ് തന്വി ചോദിച്ചത്. 'അച്ഛന് ജയിലിലാണെന്ന് പറയൂ' എന്നായിരുന്നു അഭിനന്ദന്റെ മറുപടി. പാക്കിസ്ഥാന് സേന ഇതിനിടെ തന്നെ പുറത്തുവിട്ട വിഡിയോയില് കണ്ട ചായയെക്കുറിച്ചായി പിന്നെ അന്വേഷണം. ഞാനുണ്ടാക്കുന്നതിനേക്കാള് നല്ല ചായയാണോ എന്നു ചോദിച്ചപ്പോള് ചിരിച്ചുകൊണ്ട് 'അതെ' എന്നായിരുന്നു അഭിനന്ദന്റെ ഉത്തരം. 'എങ്കില് ആ റെസിപ്പി കൊണ്ടുവരണേ' എന്നായിരുന്നു തന്വിയുടെ മറുപടി.
''ചായ് കൈസി ഥി'തന്വി ചോദിച്ചു.
''അച്ഛി ഥി'' അഭിനന്ദന്റെ മറുപടി.
മുജ്സേ ഭി അച്ഛി ബനായി(ഞാനുണ്ടാക്കുന്നതിലും നന്നായിരുന്നോ)?'
ചിരിയോടെ അഭിനന്ദന്റെ മറുപടി ''യെസ് ഇറ്റ് വാസ് ബെറ്റര്
''ഫിര് റെസിപ്പി ലെതേ ഹുയേ ആനാ തന്വി പറഞ്ഞു.
ഫെബ്രുവരി 27 ന് പാക്ക് വ്യോമസേനയ്ക്കെതിരെ പോരാടിയപ്പോള് പറത്തിയ മിഗ്–21 ബൈസണ് പോര്വിമാനം തകര്ന്നാണ് അഭിനന്ദന് പാക്ക് സേനയുടെ പിടിയിലായത്. അറുപതു മണിക്കൂറിനു ശേഷം വാഗാ അതിര്ത്തിയിലൂടെ രാജ്യത്ത് മടങ്ങിയെത്തുന്നതിനിടെ അഭിനന്ദനും ഭാര്യയും നടത്തിയ ഏക സംഭാഷണമായിരുന്നു ടെലിഫോണിലേത്.
അഭിനന്ദനോട് ഒരേസമയം സ്നേഹത്തോടെയും എതിര്പ്പോടെയുമുള്ള ഇരട്ടനിലപാടാണ് പാക്കിസ്ഥാന് പുലര്ത്തിയതെന്ന് ഈ വിവരം പുറത്തുവിട്ട ഒരു ഉന്നത വ്യോമസേനാ ഉദ്യോഗസ്ഥന് 'ദ് പ്രിന്റി'നോടു പറഞ്ഞു. ഒരു പാക്ക് ഓഫിസര് അഭിനന്ദന്റെ വാരിയെല്ലില് ഇടിച്ചപ്പോള് മറ്റൊരാള് സ്നേഹം കാട്ടി അടുത്തെത്തി അഭിനന്ദനെ ഭാര്യയെ ഫോണ് ചെയ്യാന് അനുവദിക്കുകയായിരുന്നു.
എതിര്സേനയുടെ പിടിയിലായ ഭര്ത്താവിനോട് സംസാരിക്കുമ്പോള് പതറാതെ ധൈര്യത്തോടെയാണ് തന്വി പ്രതികരിച്ചതെന്നും റിപ്പോര്ട്ടില് പറയുന്നു. സൗദി നമ്പറില് നിന്നു വന്ന കോള് റെക്കോര്ഡ് ചെയ്യാനും തന്വി മറന്നില്ല. ഇതിനിടെയാണ് വിഡിയോയില് കണ്ട ചായയെക്കുറിച്ച് സംസാരം നടന്നത്.
രാജ്യത്തേക്കു മടങ്ങിയെത്തിയ ശേഷം നടത്തിയ ഡീബ്രിഫിങ്ങില് അഭിനന്ദനു നേരിടേണ്ടി വന്ന ശാരീരിക പീഡനം വെളിപ്പെട്ടിരുന്നു. വിമാനം തകര്ന്ന് പാക്ക് അധീന കശ്മീരില് നാട്ടുകാരുടെ പിടിയില് അകപ്പെട്ടതിനിടെ ഉണ്ടായ മര്ദ്ദനത്തിലാണ് അഭിനന്ദന്റെ വാരിയെല്ലുകള് തകര്ന്നതെന്നായിരുന്നു ആദ്യം കരുതിയത്. എന്നാല് അഭിനന്ദനില് നിന്ന് നടത്തിയ തെളിവെടുപ്പില് ഇത് ഐഎസ്ഐ ഓഫിസര്മാരുടെ മര്ദ്ദനത്തില് സംഭവിച്ചതാണെന്നത് സ്ഥിരീകരിച്ചു. അറസ്റ്റ് ചെയ്തതിനു പിന്നാലെ ഒരു പാക്കിസ്ഥാന് സൈനികന് റൈഫിള് പാത്തി കൊണ്ട് അഭിനന്ദന്റെ മുതുകില് ഇടിച്ചതായും വെളിപ്പെട്ടു.
പിടിയിലായി ആദ്യ 24 മണിക്കൂറിനിടെ അഭിനന്ദിനെ ഉയര്ന്ന ശബ്ദത്തിലുള്ള സംഗീതം കേള്പ്പിക്കുകയും രൂക്ഷമായ വെളിച്ചത്തിനു മുന്നില് മണിക്കൂറുകള് ചെലവഴിക്കാന് നിര്ബന്ധിച്ചതായും സൂചനയുണ്ട്. അഭിനന്ദനെ ഉറങ്ങാനോ, വിശ്രമിക്കാനോ അനുവദിക്കാതെ ചോദ്യം ചെയ്യല് സുഗമമാക്കാനാണ് ഇതിലൂടെ ശ്രമിച്ചതെന്നും ദ് പ്രിന്റിന്റെ റിപ്പോര്ട്ടില് പറയുന്നു.
"
https://www.facebook.com/Malayalivartha
