ഞങ്ങള്‍ മുസ്‌ലിംകളെ സ്ഥാനാര്‍ഥികളാക്കില്ല, കാരണം, നിങ്ങള്‍ ഞങ്ങളെ വിശ്വസിക്കുന്നില്ല!; മുസ്ലീം വിരുദ്ധ പരാമര്‍ശവുമായി കര്‍ണാടകയിലെ മുതിര്‍ന്ന ബി.ജെ.പി നേതാവ് കെ.എസ്. ഈശ്വരപ്പ
ആദ്യഘട്ട വോട്ടിംഗിന് ദിവസങ്ങള്‍ ബാക്കിനില്‍ക്കേ മുസ്ലീം വിരുദ്ധ പരാമര്‍ശവുമായി കര്‍ണാടകയിലെ മുതിര്‍ന്ന ബി.ജെ.പി നേതാവ് കെ.എസ്. ഈശ്വരപ്പ. സംസ്ഥാനത്ത് ബി.ജെ.പി മുസ്‌ലിം സ്ഥാനാര്‍ഥികളെ നിര്‍ത്തില്ലെന്നാണ് ബിജെപി ഉപമുഖ്യമന്ത്രിയായിരുന്ന ഈശ്വരപ്പ പറഞ്ഞു. വടക്കന്‍ കര്‍ണ്ണാടകയിലെ കൊപ്പാളില്‍ തെരഞ്ഞെടുപ്പ് യോഗത്തില്‍ സംസാരിക്കവെയാണ് അദ്ദേഹത്തിന്റ വിവാദ പരാമര്‍ശം.
'കോണ്‍ഗ്രസ് നിങ്ങളെ വോട്ട് ബാങ്ക് ആയി മാത്രമാണു കണക്കാക്കുന്നത്. സ്ഥാനാര്‍ഥികളാക്കുന്നില്ല. കര്‍ണാടകയില്‍ ഞങ്ങള്‍ മുസ്‌ലിംകളെ സ്ഥാനാര്‍ഥികളാക്കില്ല, കാരണം, നിങ്ങള്‍ ഞങ്ങളെ (ബി.ജെ.പി) വിശ്വസിക്കുന്നില്ല. ഞങ്ങളെ വിശ്വസിക്കൂ, സീറ്റു നല്‍കാം, ഒപ്പം മറ്റു കാര്യങ്ങളും' - ഈശ്വരപ്പ പറഞ്ഞു.
മുന്‍പും ഈശ്വരപ്പ ഇത്തരത്തില്‍ വിവാദ പരാമര്‍ശങ്ങള്‍ നടത്തിയിട്ടുണ്ട്. '22 ആര്‍എസ്‌എസ് - ബിജെപി പ്രവര്‍ത്തകരെ കൊന്ന മുസ്ലീങ്ങള്‍ കോണ്‍ഗ്രസിനൊപ്പമാണ്. നല്ല മുസ്ലീങ്ങള്‍ ബി.ജെ.പിക്കൊപ്പവും' - കര്‍ണാടകയിലെ രാഷ്ട്രീയ സംഘട്ടനങ്ങള്‍ക്കിടെ ഒരിക്കല്‍ ഈശ്വരപ്പ പറഞ്ഞിരുന്നു. 'നിങ്ങളെ ആരെങ്കിലും ബലാത്സംഗം ചെയ്താല്‍ പ്രതിപക്ഷം എന്തു ചെയ്യും?' എന്ന് 2015ല്‍ ഒരു വനിതാ മാധ്യമപ്രവര്‍ത്തകയോട് ഈശ്വരപ്പ ചോദിച്ചത് വന്‍ വിവാദമായിരുന്നു. തുടര്‍ന്ന് കര്‍ണാടകയിലെ സ്ത്രീകള്‍ തന്റെ സഹോദരിമാരാണെന്ന പ്രസ്താന നടത്തി തടിയൂരാനും ഈശ്വരപ്പ ശ്രമിച്ചിരുന്നു.
https://www.facebook.com/Malayalivartha
