അബുദാബിയില് ഗള്ഫ് മേഖലയിലെ ആദ്യ ഹിന്ദു ക്ഷേത്രം ഉദ്ഘാടനം ചെയ്യാന് പ്രധാനമന്ത്രി നരേന്ദ്രമോദി ഒരുങ്ങുന്നു
ഏപ്രില് 20ന് അബുദാബിയില് ഗള്ഫ് മേഖലയിലെ ആദ്യ ഹിന്ദു ക്ഷേത്രം ഉദ്ഘാടനം ചെയ്യാന് പ്രധാനമന്ത്രി നരേന്ദ്രമോദി ഒരുങ്ങുന്നു. എന്നാല് റമദാന് തൊട്ടുമുമ്പ് ഇത്തരമൊരു പരിപാടിയുടെ ഉദ്ഘാടനം നടത്തുന്നതില് യുഎഇ സര്ക്കാരിന് എതിര്പ്പുണ്ടെന്നാണ് സൂചന. യുഎഇയും വിദേശമന്ത്രാലയ ഉദ്യോഗസ്ഥരും മോദിയുടെ സന്ദര്ശനവുമായി ബന്ധപ്പെട്ടുള്ള ചര്ച്ചകള് തുടരുകയാണ്.
ലോക്സഭാ തെരഞ്ഞെടുപ്പിന് മുമ്പ് പ്രധാനമന്ത്രി നരേന്ദ്രമോദിയുടെ അവസാനത്തെ വിദേശസന്ദര്ശനമാകും യുഎഇയിലേത്. കഴിഞ്ഞ വര്ഷം ഫെബ്രുവരിയില് യുഎഇ സന്ദര്ശിച്ചപ്പോള് പ്രധാനമന്ത്രി ഇതേ ക്ഷേത്രത്തിന്റെ തറക്കല്ലിടല് ചടങ്ങില് പങ്കെടുത്തിരുന്നു. ആഗോള സര്ക്കാര് ഉച്ചകോടിയില് പങ്കെടുക്കുന്നതിന് തൊട്ടുമുമ്പായിരുന്നു മോദിയുടെ ശിലാന്യാസ ചടങ്ങ്.
അതേസമയം, ചടങ്ങ് തെരഞ്ഞെടുപ്പ് ചട്ടലംഘനമാകുമെന്ന അഭിപ്രായവും ചില വിദഗ്ധര് മുന്നോട്ടുവയ്ക്കുന്നുണ്ട്. തെരഞ്ഞെടുപ്പ് കാലത്ത് വിദേശത്തായാലും ഹിന്ദു ക്ഷേത്രത്തിന്റെ ഉദ്ഘാടനച്ചടങ്ങില് പങ്കെടുക്കുന്നത് പ്രചാരണത്തിന്റെ ഭാഗമായിത്തന്നെ കണക്കാക്കേണ്ടി വരുമെന്നാണ് വിദഗ്ധര് വ്യക്തമാക്കുന്നത്.
അബുദാബിയില് പണിയുന്ന ക്ഷേത്രം ദില്ലിയിലുള്ള സ്വാമി നാരായണ് സന്സ്ഥ എന്ന സംഘടനയുടെ സ്വാമി നാരായണ് ക്ഷേത്രത്തിന്റെ തനിപ്പകര്പ്പാണ്. 55,000 സ്ക്വയര് മീറ്റര് ചുറ്റളവിലുള്ള ക്ഷേത്രത്തിനുള്ള ഭൂമി അബുദാബി കിരീടാവകാശി ഷെയ്ഖ് മുഹമ്മദ് ബിന് സയ്യിദ് അല് നഹ്യാന് ആണ് വിട്ടുനല്കിയത്.
റമദാനിന് തൊട്ടു മുമ്പ് ഇത്തരമൊരു പരിപാടിയുടെ ഉദ്ഘാടനം നടത്തുന്നതില് യുഎഇ സര്ക്കാരിനും തെരഞ്ഞെടുപ്പ് ചട്ടലംഘനമാകുമോ എന്നതില് ഉദ്യോഗസ്ഥ തലത്തിലും ആശങ്ക നിലനില്ക്കവെയാണ് മോദിയുടെ യുഎഇ പര്യടനം.
https://www.facebook.com/Malayalivartha