കുടുംബവഴക്കിനിടെ തിളച്ച എണ്ണ ഭർത്താവിന്റെ പുറത്തൊഴിച്ച ഭാര്യയെ പോലീസ് അറസ്റ്റ് ചെയ്തു. പൂനെയ്ക്കുസമീപത്തായിരുന്നു സംഭവം. ഗുരുതരമായി പൊള്ളലേറ്റ ഇമ്രാന്‍ സലിം ഷേക്കിനെ ആശുപത്രിയില്‍ പ്രവേശിപ്പിച്ചു. വീട്ടുജോലിക്കാരിയാണ് യുവതി. ഇമ്രാന്‍ കടയിലെ ജോലിക്കാരനും. ഇരുവരും വളരെ ഒത്തൊരുമയോടെയാണ് കഴിഞ്ഞിരുന്നത്. കഴിഞ്ഞദിവസം ജോലികഴിഞ്ഞെത്തിയ ഇമ്രാന്‍ നിസാര കാര്യത്തിന് ഭാര്യയുമായി വഴക്കിട്ടു. ഭാര്യയും വിട്ടുകൊടുത്തില്ല. അതോടെ വഴക്കുമൂത്തു. അല്പംകഴിഞ്ഞതോടെ വഴക്കവസാനിപ്പിച്ച്‌ ഭര്‍ത്താവ് കുളിക്കാന്‍പോയി.

കുളികഴിഞ്ഞുവന്നെങ്കിലും ഭാര്യയ്ക്ക് അരിശംമാറിയിരുന്നില്ല. പാകംചെയ്തുകൊണ്ടിരുന്ന അവര്‍ ഭര്‍ത്താവുമായി വീണ്ടും വഴക്കിട്ടു. ഇതിനിടെയാണ് തിളച്ച എണ്ണ ഭര്‍ത്താവിന്റെ ദേഹത്തൊഴിച്ചത്. ദേഹമാസകലം പൊള്ളിയ ഭര്‍ത്താവ് നിലവിളിച്ചതോടെ യുവതി സ്ഥലംവിടാനൊരുങ്ങി. നിലവിളികേട്ടെത്തിയ അയല്‍വാസികളാണ് ഇമ്രാനെ ആശുപത്രിയിലാക്കിയത്. നാട്ടുകാര്‍ യുവതിയെ തടഞ്ഞുവച്ച്‌ പൊലീസിനെ ഏല്‍പ്പിക്കുകായിരുന്നു. ഇമ്രാന്റെ പൊള്ളല്‍ ഗുരുതരമാണെങ്കിലും അപകട നില തരണംചെയ്തെന്നാണ് ഡോക്ടര്‍മാര്‍ പറയുന്നത്.