നരേന്ദ്ര മോദി സര്‍ക്കാരിന് ആത്മവിശ്വാസമുയര്‍ത്തി സി.എസ്.ഡി.എസ്-ലോക്നീതി- ദി ഹിന്ദു- തിരംഗ ടിവി - ദൈനിക് ഭാസ്‌കര്‍ സര്‍വേ. കഴിഞ്ഞ വര്‍ഷം നടത്തിയ സര്‍വേയ്ക്ക് ശേഷം എന്‍.ഡി.എ സര്‍ക്കാരിനോടുള്ള സമീപനം മാറുന്നുവെന്നാണ് വിലയിരുത്തല്‍. ആകെ 59 ശതമാനം പേര്‍ എന്‍.ഡി.എ സര്‍ക്കാരിന്റെ പ്രവര്‍ത്തനങ്ങളില്‍ സംതൃപ്തി രേഖപ്പെടുത്തിയപ്പോള്‍ 35 ശതമാനം പേരാണ് അതൃപ്തി അറിയിച്ചത്.

2018ല്‍ 51 ശതമാനമായിരുന്നു മോദി സര്‍ക്കാരില്‍ സംതൃപ്തി അറിയിച്ചിരുന്നത്. അഞ്ച് വര്‍ഷത്തെ എന്‍.ഡി.എ സര്‍ക്കാരിന്റെ പ്രവര്‍ത്തനങ്ങളില്‍ നിങ്ങള്‍ തൃപ്തരാണോ അല്ലയോ എന്ന ചോദ്യമാണ് സര്‍വേയില്‍ ഉന്നയിച്ചിരുന്നത്.അടുത്ത ചോദ്യമായി മോദി സര്‍ക്കാരിന് രണ്ടാമതൊരു അവസരം കൊടുക്കുമോ എന്നാണ് ചോദിച്ചത്. ഇതില്‍ 46 ശതമാനം പേര്‍ എന്‍.ഡി.എ സര്‍ക്കാരിന് വീണ്ടും അവസരം കൊടുക്കുമെന്ന് പറഞ്ഞപ്പോള്‍ 36 ശതമാനം പേര്‍ എതിര്‍ത്തു. കഴിഞ്ഞ യു.പി.എ സര്‍ക്കാരിന്റെ പ്രവര്‍ത്തനമാണ് മികച്ചതെന്ന് 27 ശതമാനം പറഞ്ഞപ്പോള്‍ 38 ശതമാനം മോദി സര്‍ക്കാരാണ് മികച്ചതെന്ന് വിലയിരുത്തി.എന്നാല്‍ പാവപ്പെട്ടവനും പണക്കാരനും തമ്മിലുള്ള അന്തരം, അഴിമതി, അവശ്യസാധനങ്ങളുടെ വില തുടങ്ങിയവ മോദി സര്‍ക്കാരിന്റെ കീഴില്‍ വര്‍ദ്ധിച്ചതായി സര്‍വേയില്‍ പറയുന്നു. അതേസമയം, മതങ്ങള്‍ തമ്മിലുള്ള ബന്ധം, തൊഴില്‍ അവസരങ്ങള്‍ തുടങ്ങിയവ കുറഞ്ഞതായും വിലയിരുത്തുന്നു. 19 സംസ്ഥാനങ്ങളിലായി മാര്‍ച്ച് 24 മുതല്‍ 31 വരെയാണ് സര്‍വെ നടത്തിയത്.