ഇനി ദിവസങ്ങൾ മാത്രം അവശേഷിക്കുന്ന ലോക്‌സഭാ തെരഞ്ഞെടുപ്പിന് മുന്നോടിയായി ബിജെപിയുടെ പ്രകടന പത്രിക പുറത്തിറക്കി. രാജ്യ സുരക്ഷക്ക് പ്രാമുഖ്യം നല്‍കിക്കൊണ്ടാണ് ബിജെപി പ്രകടന പത്രിക പുറത്തിറക്കിയിരിക്കുന്നത്. സങ്കല്‍പ്പ് പത്ര്എന്നാണ് പത്രികയ്ക്ക് പേരിട്ടിരിക്കുന്നത്.

ദേശീയ ആസ്ഥാനത്ത് നടന്ന ചടങ്ങില്‍ പ്രധാനമന്ത്രി നരേന്ദ്രമോദി, ബിജെപി അധ്യക്ഷൻ അമിത് ഷാ, കേന്ദ്രമന്ത്രിമാരായ സുഷമാ സ്വരാജ്, അരുൺ ജെയ്റ്റ്ലി എന്നിവരുടെ സാന്നിധ്യത്തിൽ കേന്ദ്ര ആഭ്യന്തരമന്ത്രി രാജ്നാഥ് സിങാണ് പത്രിക പുറത്തിറക്കിയിരിക്കുന്നത്.

രാജ്യം 75-ാം സ്വാതന്ത്ര്യ ദിനം ആഘോഷിക്കുന്ന വേളയിൽ 75 പദ്ധതികള്‍ ഉള്‍പ്പെടുത്തിയാണ് പ്രകടന പത്രിക പുറത്തിറക്കിയിരിക്കുന്നത്.

ശബരിമലയിലെ ആചാര സംരക്ഷണത്തിന് ആവശ്യമായ എല്ലാ ശ്രമങ്ങളും നടത്തുമെന്ന് പ്രകടന പത്രികയില്‍ പറയുന്നു. രാമക്ഷേത്ര നിര്‍മാണത്തിനുള്ള എല്ലാ വഴികളും തേടും. ഏകീകൃത സിവില്‍ കോഡ് നടപ്പാക്കും. പൌരത്വ ഭേതഗതി ബില്‍ പാസ്സാക്കും. സര്‍ക്കാരിന്റെ സ്ത്രീ ശാക്തീകരണം നടപ്പാക്കും. പാര്‍ലമെന്റിലും സംസ്ഥാന നിയമസഭകളിലും 33 ശതമാനം സ്ത്രീ പ്രാതിനിധ്യം ഉറപ്പുവരുത്തുവാന്‍ ഭരണ ഘടന ഭേതഗതി ചെയ്യും.

60 വയസ് കഴിഞ്ഞ ചെറുകിട ഇടത്തരം കര്‍ഷകര്‍ക്ക് പെന്‍ഷന്‍ നല്‍കും. കര്‍ഷകര്‍ക്ക് ഒന്നു മുതല്‍ അഞ്ച് വര്‍ഷത്തേക്ക് ഒരു ലക്ഷം രൂപ വരെ പലിശ രഹിത വായ്പ ലഭ്യമാക്കും. തുടങ്ങി 75 വാഗ്ദാനങ്ങളുമായാണ് പ്രകടന പത്രിക പുറത്തിറക്കിയത്.

രാഷ്ട്രസുരക്ഷക്ക് പ്രാധാന്യം നല്‍കിയാണ് ബിജെപിയുടെ പ്രകടന പത്രികയായ സങ്കല്‍പ് പത്ര പുറത്തിറക്കിയിരിക്കുന്നത്. ഭീകരര്‍ക്കെതിരെ ശക്തമായ നടപടി സ്വീകരിക്കുമെന്ന് വ്യക്തമാക്കുന്ന പ്രകടന പത്രികയില്‍ തീവ്രവാദികളോട് ബിജെപിക്ക് മൃദുസമീപനമുണ്ടാകില്ലെന്നും വ്യക്തമാക്കുന്നു.

രാജ്യസുരക്ഷയില്‍ വിട്ടുവീഴ്ചയില്ലെന്ന തീരുമാനത്തിന് പുറമെ ഏകസിവില്‍ കോഡ് നടപ്പാക്കും, അനധികൃത കുടിയേറ്റം ഒഴിവാക്കും, ആര്‍ട്ടിക്കിള്‍ 370 എന്നിവ റദ്ദാക്കുമെന്നും പറയുന്നു. ജമ്മു കശ്മീരിന് പ്രത്യേക അധികാരം നല്‍കുന്ന വകുപ്പാണ് ആര്‍ട്ടിക്കിള്‍ 370.

ഗ്രാമീണ കുടുംബങ്ങളെ ലക്ഷ്യമിട്ട് ഗ്രാമ സ്വരാജ് നടപ്പാക്കും. എല്ലാ കുടുംബങ്ങള്‍ക്കും 2022ഓടെ സ്ഥിരമായ പാര്‍പ്പിടം, 2024ഓടെ എല്ലാ വീടുകളിലും കുടിവെള്ളം എത്തിക്കും. അടിസ്ഥാന വികസനത്തിന് 2024ഓടെ 100ലക്ഷം കോടിയുടെ നിക്ഷേപം. കര്‍ഷകര്‍ക്ക് വര്‍ഷത്തില്‍ 6000 രൂപയും 60 വയസ്സിനു മുകളിലുള്ള ചെറുകിട, ഇടത്തരം കര്‍ഷകര്‍ക്ക് പെന്‍ഷനും നല്‍കും.

എല്ലാ നഗരങ്ങളെയും തുറന്ന സ്ഥലത്തെ മലമൂത്ര വിസര്‍ജന രഹിതമാക്കും. ദാരിദ്ര്യരേഖയ്ക്കുതാഴെയുള്ളവരുടെ എണ്ണം ഒറ്റ സംഖ്യയിലേക്കു കുറയ്ക്കുമെന്നും പ്രകടന പത്രികയില്‍ പറയുന്നു. സങ്കല്‍പ്പ് പത്ര് എന്ന് പേരിട്ടിരിക്കുന്ന പ്രകടന പത്രിക ദേശീയ ആസ്ഥാനത്ത് നടന്ന ചടങ്ങില്‍ പ്രധാനമന്ത്രി നരേന്ദ്ര മോദിയാണ് പത്രിക പുറത്തിറക്കിയത്.