18 വര്‍ഷത്തോളം തെളിയിക്കാനാകാതെ കിടന്ന കൊലക്കേസിലെ പ്രതികളെ ഒടുവില്‍ ഹൈദരാബാദ് പോലീസ് പിടികൂടി. മകന്റെ കൊലപാതകത്തിന് പിന്നില്‍ സ്വന്തം അമ്മ തന്നെയായിരുന്നെന്ന് പോലീസ് കണ്ടെത്തി. കുടുംബ വഴക്കിനെ തുടര്‍ന്ന് ബന്ധുക്കളില്‍ ഒരാള്‍ നടത്തിയ വെളിപ്പെടുത്തലാണ് കേസില്‍ നിര്‍ണായക വഴിത്തിരിവായത്.

ഹൈദരാബാദിനടുത്ത് ഹഷ്മാബാദില്‍ 2001 ജൂണിലാണ് ഇറച്ചിക്കച്ചവടക്കാരനായിരുന്ന മുഹമ്മദ് ഖ്വാജ(30)-യുടെ ജഡം കണ്ടെത്തിയത്. മദ്യപാനവും ചീട്ടുകളിയും ആയിരുന്നു ഖ്വാജയുടെ പ്രധാനജോലി. ആളുകളെ ഉപദ്രവിക്കുന്ന ശീലവുമുണ്ട്. വീട്ടിലും നാട്ടിലും ആക്രമണകാരിയായിരുന്നു ഖ്വാജ. മൂന്ന് ആണ്‍മക്കളും അഞ്ചു പെണ്‍മക്കളും ഉള്ള രോഗിയായ മസൂദ ബീവിയുടെ രണ്ടാമത്തെ മകനായിരുന്നു ഖ്വാജ. മസൂദാബീവിയുടെ ഭര്‍ത്താവിന്റെ മരണശേഷമാണു മക്കളുടെ കല്യാണം നടത്തിയത്. പക്ഷേ രണ്ടാമത്തെ മകനായ മുഹമ്മദ് ഖ്വാജയുടെ കല്യാണം മാത്രം നടത്താന്‍ മസൂദ തയാറായില്ല. ഇയാള്‍ വലിയ ഭാരമായിരുന്നു മസൂദയ്ക്ക്.

ഖ്വാജയുടെ ആക്രമണങ്ങള്‍ വീട്ടുകാര്‍ക്കു സഹിക്കാനാവാതെയായി. ഖ്വാജയുടെ ശല്യം തീര്‍ക്കാന്‍ എന്തു ചെയ്യാനാകുമെന്നു നാലാമത്തെയും അഞ്ചാമത്തെയും മരുമക്കളായ റഷീദിനോടും ബഷീറിനോടും മസൂദ ബീവി ആരാഞ്ഞു. ഇരുവരും, സുഹൃത്തും ഓട്ടോ ഡ്രൈവറുമായ ഹഷാമിനെ കണ്ട് ഇക്കാര്യം സംസാരിച്ചു. ഖ്വാജയെ വകവരുത്താന്‍ സഹായിക്കാമെന്നു ഹഷാം വാക്കുനല്‍കി.

മകനെ കൊല്ലുന്നതിനു സാമ്പത്തിക സഹായവും ഹഷാമിനു മസൂദ വാഗ്ദാനം ചെയ്തു. മദ്യാസക്തനായ ഖ്വാജയെ മദ്യം നല്‍കി വീഴ്ത്താന്‍ പദ്ധതിയിട്ടു. ബഷീറും റഷീദും ഖ്വാജയെ മദ്യപാനത്തിനു ക്ഷണിച്ചു. കള്ളു കുടിക്കാന്‍ ഹഷാമിന്റെ ഓട്ടോയില്‍ ഖ്വാജയെ ബന്ദ്‌ലാഗുഡയിലെ ഷാപ്പിലേക്കു കൊണ്ടുപോയി. മദ്യപിച്ചു മയങ്ങിയ ഖ്വാജയുടെ തലയില്‍ വലിയ ഗ്രാനൈറ്റ് കഷണം കൊണ്ട് ഇടിച്ചു കൊലപ്പെടുത്തുകയായിരുന്നു. ഖ്വാജ മരിച്ചെന്ന് ഉറപ്പാക്കിയ മൂവരും വിവരം മസൂദ ബീവിയെ അറിയിച്ചശേഷം പലവഴിക്കു രക്ഷപ്പെട്ടു.

സംഭവത്തില്‍ പോലീസ് കേസെടുത്തെങ്കിലും തെളിവിന്റെ അഭാവം മൂലം അന്വേഷണം എങ്ങുമെത്തിയില്ല. അടുത്തിടെ കുടുംബത്തിനുള്ളിലെ അസ്വാരസ്യം പരിധി വിട്ടപ്പോഴാണു കൊലപാതക കഥ പുറത്തായത്. തുടര്‍ന്ന് കുടംബാംഗങ്ങളിലൊരാളാണ് പൊലീസിന് വിവരം നല്‍കിയത്. അങ്ങനെ റഷീദ്, ബഷീര്‍, ഹഷാം എന്നിവരെ അറസ്റ്റ് ചെയ്തു. പക്ഷേ, ഖ്വാജയെ കൊല്ലാന്‍ പദ്ധതിയിട്ട മാതാവ് മസൂദ ബീവിയെ ഇതുവരെ പൊലീസിനു കണ്ടെത്താനായിട്ടില്ല.