തെരഞ്ഞെടുപ്പ് അടുത്തിരിക്കെ പ്രതിപക്ഷനേതാക്കളുടെ വീടുകളിലും മറ്റ് സ്ഥാപനങ്ങളിലും അടക്കം രാജ്യവ്യാപകമായി റെയ്ഡ് ശക്തമാക്കിയതോടെ തെരഞ്ഞെടുപ്പ് കമ്മീഷന് അതൃപ്തി, ആദായ നികുതി ബോര്ഡ് ചെയര്മാനും റവന്യൂ സെക്രട്ടറിയും തെരഞ്ഞെടുപ്പ് കമ്മീഷന് മുന്നില് ഹാജരാകും
തെരഞ്ഞെടുപ്പ് അടുത്തിരിക്കെ പ്രതിപക്ഷനേതാക്കളുടെ വീടുകളിലും മറ്റ് സ്ഥാപനങ്ങളിലും അടക്കം രാജ്യവ്യാപകമായി റെയ്ഡ് ശക്തമാക്കിയതോടെ തെരഞ്ഞെടുപ്പ് കമ്മീഷന് അതൃപ്തി. ആദായ നികുതി ബോര്ഡ് ചെയര്മാനെയും റവന്യൂ സെക്രട്ടറിയെയും തെരഞ്ഞെടുപ്പ് കമ്മീഷന് വിളിപ്പിച്ചു. ഇത് പ്രതിപക്ഷത്തിന് ആശ്വാസമായി. റവന്യൂ സെക്രട്ടറി എ ബി പാണ്ഡേ, സിഡിബിടി ബോര്ഡ് ചെയര്മാന് പി സി മോഡി എന്നിവര് ഇന്ന് തെരഞ്ഞെടുപ്പ് കമ്മീഷനെ നേരില് കണ്ട് കാര്യങ്ങള് വിശദീകരിക്കും. പ്രധാനമന്ത്രി നരേന്ദ്രമോദി ആദായ നികുതി വകുപ്പിനെ ഉപയോഗിച്ച് തങ്ങളെ ഭയപ്പെടുത്താന് നീക്കം നടത്തുകയാണെന്ന് പ്രതിപക്ഷ പാര്ട്ടികള് ആരോപിക്കുന്നു. ബഹുജന് സമാജ് വാദി പാര്ട്ടി നേതാവ് മായാവതി, കര്ണാടക മുഖ്യമന്ത്രി എച്ച് ഡി കുമാരസ്വാമി, മധ്യപ്രദേശ് മുഖ്യമന്ത്രി കമല്നാഥ് എന്നിവര്ക്കെതിരെയാണ് ആദായനികുതി വകുപ്പിന്റെ നീക്കം.
പരിശോധനകള് കമ്മീഷനെ അറിയിച്ച് വേണം നടത്തണമെന്ന് കമ്മീഷന് ഇന്നലെ നിര്ദ്ദേശിച്ചിരുന്നു. മധ്യപ്രദേശ് മുഖ്യമന്ത്രി കമല്നാഥിന്റെ സഹായികളുടെ വസതിയില് നിന്നും പണവും സ്റ്റഫ് ചെയ്ത മൃഗങ്ങളെയും കണ്ടെടുത്തതായി റിപ്പോര്ട്ടുണ്ട്. അതേസമയം റെയ്ഡ് രാഷ്ട്രീയ പ്രേരിതമാണെന്ന് കമല്നാഥ് ആരോപിച്ചു. റെയ്ഡ് ഉള്പ്പെടെ നിഷ്പക്ഷമായിരിക്കണമെന്ന് കമ്മീഷന് വിശദമാക്കിയിരുന്നു. മധ്യപ്രദേശ് മുഖ്യമന്ത്രി കമല് നാഥിന്റെ സഹായികളുടെ വീടുകളിലെ പരിശോധനയും മൊഴിയെടുക്കലും തുടരുകയാണ്. കമല് നാഥിന്റെ ബന്ധു രതുല് പുരി, ഓഫീസിന്റെ ചുമതലയുള്ള പ്രവീണ് കക്കാര്, മുന് ഉപദേഷ്ടാവ് രജേന്ദ്ര കുമാര് എന്നിവരുടെ വീടുകളിലും സ്ഥാപനങ്ങളിലും പരിശോധന തുടരുകയാണ്. പണം പിടിച്ചെടുത്തതോടെ ആരാണ് യഥാര്ത്ഥ കള്ളന്മാരെന്ന് ജനംതിരിച്ചറിഞ്ഞെന്ന് പ്രധാനമന്ത്രി നരേന്ദ്രമോദി പ്രതികരിച്ചതോടെ പ്രതിപക്ഷം വലിയ പ്രതിരോധത്തിലായി.
ബി.ജെ.പി ഏറ്റവും വലിയ ഒറ്റകക്ഷിയായിട്ടും അധികാരത്തിലേറാനാകാത്ത കര്ണാടകത്തില് കോണ്ഗ്രസ്, ജനതാദള് നേതാക്കളെ ഭീഷണിപ്പെടുത്തി വലയിലാക്കാന് ആദായനികുതി വകുപ്പ് പരിശോധന നടത്തിയതായി ഇരുപാര്ട്ടികളും ആരോപിച്ചിരുന്നു. ജനതാദള് നേതാക്കളുമായി ബന്ധമുള്ളവരുടെ വീടുകളില് ആദായ നികുതിവകുപ്പ് പരിശോധന നടത്തിയിരുന്നു. പ്രധാനമന്ത്രി പ്രതികാര രാഷ്ട്രീയം കളിക്കുകയാണെന്നായിരുന്നു മുഖ്യമന്ത്രി എച്ച് ഡി കുമാര സ്വാമിയുടെ ആരോപണം. എന്നാല് കോണ്ഗ്രസ് നേതാവ് ഡി.കെ ശിവകുമാറിന്റെ വീട്ടില് നടത്തിയ പരിശോധനയില് ബി.ജെ.പി നേതാവ് യെദ്യൂരപ്പ ഉന്നത ബി.ജെ.പി നേതാക്കള്ക്ക് കോടിക്കണക്കിന് രൂപ നല്കിയതിന്റെ കണക്കുകള് വ്യക്തമാക്കുന്ന ഡയറി കണ്ടെത്തിയിരുന്നു. ഡയറിയുടെ പകര്പ്പ് കോണ്ഗ്രസ് നേതക്കള് പുറത്ത് വിട്ടെങ്കിലും ഇക്കാര്യം മുമ്പ് അന്വേഷിച്ചതാണെന്നും ഡയറിയുടെ ഫോട്ടോ കോപ്പിയായതിനാല് കാര്യമായ അന്വേഷണം നടത്താനാകില്ലെന്നും അധികൃതര് അറിയിച്ചു.
അതോടെ പ്രതിപക്ഷനേതാക്കളെയും അവരുമായി ബന്ധമുള്ളവരെയും മാത്രം ലക്ഷ്യം വെച്ചാണ് റെയ്ഡ് നടത്തുന്നതെന്ന ആക്ഷേപം ശക്തമായി. നിരവധി കേസുകളുമായി ബന്ധപ്പെട്ട് കോണ്ഗ്രസ് ജനറല് സെക്രട്ടറി പ്രിയങ്കാ ഗാന്ധിയുടെ ഭര്ത്താവ് റോബര്ട്ട് വാദ്രയെ ആദായനികുതി വകുപ്പും എന്ഫോഴ്സ്മെന്റും നിരവധി തവണ വിളിച്ചുവരുത്തുകയും ചോദ്യം ചെയ്യുകയും ചെയ്തിരുന്നു. വാദ്രയുടെ പ്രായമായ അമ്മയെ പോലും രാജസ്ഥാനിലെ ഭൂമി ഇടപാടുമായി ബന്ധപ്പെട്ട് ചോദ്യം ചെയ്യാന് വിളിച്ചുവരുത്തിയിരുന്നു. പ്രതിരോധമന്ത്രി നിര്മലാ സീതാരാമന്റെ വ്യാജ ഒപ്പിട്ട് റിയല് എസ്റ്റേറ്റുകാരില് നിന്ന് പണം തട്ടിയ ബി.ജെ.പി ദേശീയ ജനറല് സെക്രട്ടറി മുരളീധര റാവുവിനെതിരെ കേസ് എടുത്തെങ്കിലും അന്വേഷണം കാര്യക്ഷമമല്ലെന്ന് പ്രതിപക്ഷം ആരോപിക്കുന്നു.
https://www.facebook.com/Malayalivartha
