കാവല്‍ക്കാരന്‍ കള്ളന്‍ മാത്രമല്ല ഭീരുവും!!; പ്രധാനമന്ത്രി നരേന്ദ്ര മോദിക്കെതിരെ ആഞ്ഞടിച്ച്‌ കോണ്‍ഗ്രസ് പ്രസിഡന്റ് രാഹുല്‍ ഗാന്ധി
പൊതു തെരഞ്ഞെടുപ്പിന്റെ ഒന്നാം ഘട്ട പ്രചരണത്തിന്റെ അവസാന ദിവസവും പ്രധാനമന്ത്രി നരേന്ദ്ര മോദിക്കെതിരെ ആഞ്ഞടിച്ച്‌ കോണ്‍ഗ്രസ് പ്രസിഡന്റ് രാഹുല്‍ ഗാന്ധി. കാവല്‍ക്കാരന്‍ കള്ളന്‍ മാത്രമല്ല ഭീരുവെന്നും കോണ്‍ഗ്രസ് അധ്യക്ഷന്‍ രാഹുല്‍ ഗാന്ധി. പ്രതിപക്ഷ പാര്‍ട്ടിയുടെ നേതാവുമായി സംവാദത്തില്‍ ഏര്‍പ്പെടാന്‍ മടിക്കുന്ന മോദി ഭീരുവെന്നാണ് രാഹുല്‍ ഗാന്ധിയുടെ പരിഹാസം. ആസാമിലെ ഹെയ്‌ലാകണ്ടിയില്‍ നടന്ന പൊതുപരിപാടിയിലാണ് പ്രധാനമന്ത്രി നരേന്ദ്ര മോദിക്കെതിരെ രാഹുല്‍ ഗാന്ധി വിമര്‍ശനം ഉന്നയിച്ചത്.
അഴിമതിയെക്കുറിച്ച്‌ സംസാരിക്കുന്ന കാവല്‍ക്കാരനെ സംവാദത്തിലേര്‍പ്പെടാന്‍ താന്‍ ക്ഷണിച്ചുവെങ്കിലും അതിനുള്ള ധൈര്യമില്ലാത്തതിനാല്‍ അദ്ദേഹം ഓടിയൊളിച്ചു. രണ്ടു കോടി ജോലികളും കര്‍ഷകര്‍ക്ക് ന്യായവിലകളും 15 ലക്ഷം രൂപ ജനങ്ങളുടെ ബാങ്ക് അക്കൗണ്ടിലും ഇടുമെന്ന് പറഞ്ഞ് ജനങ്ങളെ പറ്റിച്ച മോദി നോട്ട് നിരോധനത്തിലൂടെയും ജിഎസ്ടിയിലൂടെയും പകരം ജനങ്ങളുടെ പണം കവര്‍ന്നു.
മോദിയുടെ കഴിഞ്ഞ അഞ്ചുവര്‍ഷത്തെ ഭരണത്തിന്റെ ഗുണഭോക്തക്കള്‍ വ്യവസായികളായ അനില്‍ അംബാനി,മെഹുല്‍ ചോക്‌സി, നീരവ് മോദി എന്നിവരാണ്. എന്നാല്‍ കോണ്‍ഗ്രസ് അധികാരത്തില്‍ എത്തിയാല്‍ രാജ്യത്തെ ദരിദ്രരായ ജനങ്ങള്‍ക്ക് പണം നല്‍കും. അതുപോലെ രാജ്യസഭയിലും ലോക് സഭയിലും വിധാന്‍ സഭയിലും സ്ത്രീകള്‍ക്ക് 33 ശതമാനം സംവരണം നല്‍കുമെന്നും രാഹുല്‍ പറഞ്ഞു.
അതേസമയം, കാവല്‍ക്കാരന്‍ കള്ളനെന്ന് പറയുന്നവരാണ് യഥാര്‍ത്ഥത്തില്‍ കള്ളന്മാരെന്ന് ആദായനികുതി വകുപ്പ് നടത്തിയ റെയ്ഡുകള്‍ തെളിയിച്ചു എന്നായിരുന്നു പ്രധാനമന്ത്രി നരേന്ദ്രമോദിയുടെ ഇന്നത്തെ പ്രസംഗം. നോട്ടുകെട്ടുകള്‍ പിടിച്ചെടുത്തതോടെ യഥാര്‍ത്ഥ കള്ളന്മാര്‍ ആരെന്ന് ബോധ്യമായെന്നും മഹാരാഷ്ട്രയിലെ ലാത്തൂരില്‍ നടന്ന തെരഞ്ഞെടുപ്പ് റാലിയില്‍ മോദി പറഞ്ഞു.
https://www.facebook.com/Malayalivartha
