തിരുമല ദേവന് (തിരുപ്പതി) വിവിധ ബാങ്കുകളിലുള്ള സ്വര്‍ണനിക്ഷേപം 9,253 കിലോഗ്രാം. ഇതില്‍ 553 കിലോഗ്രാം സ്വര്‍ണം ക്ഷേത്ര ട്രഷറിയില്‍ സൂക്ഷിച്ചിരിക്കുകയാണ്. തിരുപ്പതി ദേവനെ ദര്‍ശിക്കാനെത്തുന്ന ലക്ഷക്കണക്കിന് ഭക്തര്‍ കാണിക്കയായി നല്‍കുന്നതാണ് ഇവ. ദേവസ്ഥാനം എക്‌സിക്യുട്ടീവ് ഓഫീസര്‍ അനില്‍കുമാര്‍ സിംഗാളാണ് ക്ഷേത്ര സ്വത്തിന്റെ കണക്ക് പുറത്തുവിട്ടത്.
സര്‍ക്കാര്‍ ഉത്തരവനുസരിച്ച് ക്ഷേത്രാവശ്യത്തില്‍ കൂടുതലുള്ള സ്വര്‍ണം സ്വര്‍ണനിക്ഷേപ പദ്ധതി പ്രകാരം ബാങ്കുകളില്‍ നിക്ഷേപിച്ചിട്ടുണ്ട്. സ്‌റ്റേറ്റ് ബാങ്ക് ഓഫ് ഇന്ത്യയില്‍ 5,387 കിലോയും ഇന്ത്യന്‍ ഓവര്‍സീസ് ബാങ്കില്‍ 1,938 കിലോയും പഞ്ചാബ് നാഷണല്‍ ബാങ്കില്‍ 1,381 കിലോയും നിക്ഷേപമുണ്ട്.
തിരുപ്പതി ക്ഷേത്രത്തില്‍ നിന്ന് മോഷണം പോയ വിഗ്രഹങ്ങളുടെ മൂന്ന് സ്വര്‍ണക്കിരീടങ്ങളും രണ്ടുമാസത്തിനുശേഷം തിരുപ്പതി പോലീസ് കണ്ടെടുത്തിരുന്നു. ദാദര്‍ റെയില്‍വേ സ്‌റ്റേഷനില്‍വെച്ചാണ് അന്ന് മോഷ്ടാവിനെ പിടികൂടിയത്. പിടികൂടിയ സ്വര്‍ണം കിരീടത്തിന്റെ രൂപത്തില്‍ അല്ലെങ്കിലും തത്തുല്യമായ 1,351 ഗ്രാം സ്വര്‍ണം പോലീസ് പിടിച്ചെടുക്കുകയായിരുന്നു.