പ്രമുഖ ബിസ്‌ക്കറ്റ് കമ്ബനിയായ പാര്‍ലെജിയുടെ ഛത്തീസ്ഗഡ് അമാസിവ്‌നി മേഖലയിലെ നിര്‍മാണശാലയില്‍ നിന്നും ബാലവേലക്ക് നിയോഗിച്ചിരുന്ന 26 കുട്ടികളെ മോചിപ്പിച്ചു. വിവരം ലഭിച്ചതിന്റെ അടിസ്ഥാനത്തില്‍ പോലീസ് നടത്തിയ പരിശോധനയിലാണ് ബാലവേല നടത്തുന്നതായി കണ്ടെത്തിയത്. രക്ഷപ്പെടുത്തിയ കുട്ടികളെ ജുവനൈല്‍ അഭയകേന്ദ്രങ്ങളിലേക്കു മാറ്റി.

സംഭവത്തില്‍ വനിതാ ശിശുക്ഷേമ വകുപ്പ് അധികൃതരുടെ പരാതിയില്‍ നിര്‍മാണ ശാല ഉടമക്കെതിരേ പോലീസ് കേസെടുത്തു. 13 മുതല്‍ 17 വയസ് വരെ പ്രായമുള്ള കുട്ടികളെയാണ് ജോലിക്കു നിര്‍ത്തിയിരുന്നത്.

ഇവരില്‍ ചില കുട്ടികള്‍ ഒഡീഷ, മധ്യപ്രദേശ്, ജാര്‍ഖണ്ഡ് എന്നിവിടങ്ങളിലെ നിര്‍മാണശാലകളിലും ജോലി ചെയ്തിട്ടുണ്ടെന്നാണ് സൂചന. രാവിലെ എട്ടു മണി മുതല്‍ വൈകിട്ട് എട്ടു മണി വരെയാണ് കുട്ടികളെ ജോലി ചെയ്യിച്ചിരുന്നത്. മാസ ശമ്ബളമായി 5000 മുതല്‍ 7000 രൂപ വരെ നല്‍കിയിരുന്നതായും പോലീസ് അറിയിച്ചു.