ബാബ്റി മസ്ജിദ് കേസില് ഒന്പത് മാസത്തിനകം വിധി പറയുമെന്ന് സുപ്രീംകോടതി
ബാബ്റി മസ്ജിദ് കേസില് ഒന്പത് മാസത്തിനകം വിധി പറയുമെന്ന് സുപ്രീംകോടതി. ഇന്ന് മുതല് ഒന്പത് മാസത്തിനകം കേസിലെ വാദം പൂര്ത്തിക്കുമെന്നും ഇതിനു ശേഷം വേഗത്തില് വിധി പറയുമെന്നുമാണ് കോടതി അറിയിച്ചത്. . വിചാരണ നടക്കുന്ന ലക്നോ പ്രത്യേക കോടതിക്കാണ് സുപ്രീംകോടതി നിര്ദേശം നല്കിയത്. സെപ്റ്റംബര് 30ന് ജസ്റ്റിസ് എസ്.കെ യാദവിന്റെ കാലാവധി തീരുന്ന സാഹചര്യത്തിലാണ് സുപ്രീംകോടതി നടപടി.
1992 ഡിസംബര് ആറിന് ബാബരി മസ്ജിദ് തകര്ത്തതിലെ ഗൂഢാലോചനക്കുറ്റത്തില് നിന്ന് എല്.കെ. അദ്വാനി, മനോഹര് ജോഷി, കല്യാണ് സിങ്, ഉമാഭാരതി, വിനയ് കത്യാര്, അശോക് സിംഗാള്, സാധ്വി ഋതംഭര, വി.എച്ച്. ദാല്മിയ, മഹന്ത് അവൈദ്യനാഥ്, ഗിരിരാജ് കിഷോര്, സതീശ് പ്രധാന്, സി.ആര്. ബന്സല്, ആര്.വി. വേദാന്തി, പരമഹംസ് രാംചന്ദ്ര ദാസ്, ജഗദീഷ് മുനി മഹാരാജ്, ബി.എല്. ശര്മ, നൃത്യ ഗോപാല് ദാസ്, ധരംദാസ്, സതീശ് നഗര്, മൊരേശ്വര് സാവെ എന്നിവരടക്കമുള്ള ബി.ജെ.പി, വി.എച്ച്.പി നേതാക്കളെ ഒഴിവാക്കാനാവില്ലെന്ന് ജസ്റ്റിസ് രോഹിങ്ടണ് നരിമാന് അധ്യക്ഷനായ സുപ്രീംകോടതി ബെഞ്ച് വിധിച്ചിരുന്നു.
2017 ഏപ്രില് 19ലെ സുപ്രീംകോടതി വിധിയുടെ അടിസ്ഥാനത്തിലാണ് പ്രത്യേക കോടതിയില് മുതിര്ന്ന സംഘ്പരിവാര് നേതാക്കള്ക്കെതിരായ ക്രിമിനല് കേസിലെ വിചാരണ നടക്കുന്നത്. ഒരു ദിവസവും മുടങ്ങാതെ പള്ളി തകര്ത്ത ക്രിമിനല് കേസിലെ വിചാരണ പൂര്ത്തിയാക്കണമെന്നാണ് സുപ്രീംകോടതി നിര്ദേശം.
https://www.facebook.com/Malayalivartha
