അഞ്ച് ദിവസങ്ങള്‍ക്കു ശേഷം കശ്മീരില്‍ ഇന്റര്‍നെറ്റ്, ടെലിഫോണ്‍ സേവനങ്ങള്‍ ഭാഗികമായി പുനഃസ്ഥാപിച്ചു. ഈദ് പ്രമാണിച്ചാണ് വെള്ളിയാഴ്ച രാവിലെയോടെ സേവനങ്ങള്‍ ഭാഗികമായി പുനഃസ്ഥാപിച്ചത്.
ജമ്മു കശ്മീരിന് പ്രത്യേക പദവി നല്‍കിയിരുന്ന ഭരണഘടനയിലെ 370, 370എ അനുച്ഛേദങ്ങള്‍ റദ്ദാക്കുന്നതിന്റെ മുന്നോടിയായി ഏര്‍പ്പെടുത്തിയ സുരക്ഷാ ക്രമീകരണങ്ങളുടെ ഭാഗമായാണ് ഈ സേവനങ്ങള്‍ നിര്‍ത്തിവെച്ചിരുന്നത്. ഗവര്‍ണര്‍ സത്യപാല്‍ മല്ലിക്ക് കഴിഞ്ഞ ദിവസം സാഹചര്യം വിലയിരുത്തിയിരുന്നു. വെള്ളിയാഴ്ച പ്രാര്‍ത്ഥനക്കും ഈദിനും നിയന്ത്രണങ്ങളില്‍ ഇളവ് ഉണ്ടാകുമെന്ന് വ്യക്തമാക്കിയിരുന്നു.
ശ്രീനഗറിലെ പ്രധാന ജുമാ മസ്ജിദിന്റെ ഗേറ്റ് പൂട്ടിയിട്ടിരിക്കുകയാണ്. എന്നാല്‍, വിവിധ മേഖലകളിലെ ചെറിയ പള്ളികളില്‍ പ്രാര്‍ത്ഥന അനുവദിക്കുമെന്നാണ് അധികൃതര്‍ പറയുന്നത്. ജനങ്ങള്‍ക്ക് തങ്ങളുടെ സമീപ പ്രദേശത്ത് പ്രാര്‍ത്ഥനയില്‍ പങ്കെടുക്കാം. അതില്‍ തടസ്സമില്ല പൊലീസ് ചീഫ് ദില്‍ബാഗ് സിങ് പറഞ്ഞു. ഈ വര്‍ഷം 53ാമത് തവണയാണ് ജമ്മു കശ്മീരില്‍ ഇന്റര്‍നെറ്റ് ബന്ധം വിച്ഛേദിച്ചത്.