ദില്ലിയിൽ മരുമകളെ തോക്ക് ചൂണ്ടി ഭീഷണിപ്പെടുത്തി പീഡിപ്പിച്ച സംഭവത്തില്‍ മുന്‍ ബി.ജെ.പി എം.എല്‍.എ മനോജ് ഷൊക്കീനെതിരെ കേസെടുത്ത് ഡൽഹി പോലീസ്. കേസില്‍ ഇരയായ പെണ്‍കുട്ടി പൊലീസിനെ സമീപിക്കുകയും എഫ്.ഐ.ആര്‍ രജിസ്റ്റര്‍ ചെയ്യുകയായിരുന്നു. കേസില്‍ ബി.ജെ.പി എം.എല്‍.എക്കെതിരെ ഐ.പി.സി സെക്ഷന്‍ 376, 506 എന്നി വകുപ്പുകള്‍ പ്രകാരമാണ് കേസെടുത്തിരിക്കുന്നത്. 2018 ഡിസംബര്‍ 31നാണ് കേസിനാസ്പദമായ സംഭവം നടക്കുന്നത്.

അമ്മയുടെ വീട്ടില്‍ നിന്നും ഭര്‍ത്താവിന്റെയും സഹോദരന്റെയും കൂടെ മീരാബാഗിലുള്ള വീട്ടിലേക്ക് വരുന്ന വഴിയാണ് പീഡനം നടക്കുന്നത്. വരും വഴി താമസിക്കുന്നതിനായി ഹോട്ടലെടുക്കുകയും അന്ന് അവിടെ പുതുവര്‍ഷം ആഘോഷിക്കുകയും ചെയ്ത യുവതിയും സംഘവും പിറ്റേന്ന് പാര്‍ട്ടി കഴിഞ്ഞ് രാത്രി വീട്ടില്‍ തിരിച്ചെത്തി. ശേഷം യുവതി ഉറങ്ങാന്‍ കിടക്കുകയും ഭര്‍ത്താവ് സുഹൃത്തുക്കളുടെ കൂടെ പുറത്തുപോവുകയും ചെയ്തു. ഈ സമയം ഭര്‍ത്താവിന്റെ പിതാവ് യുവതിയോട് സംസാരിക്കണമെന്ന് ആവശ്യപ്പെട്ട് തന്റെ മുറിയിലേക്ക് വിളിച്ചു വരുത്തി തോക്ക് ചൂണ്ടി ഭീഷണിപ്പെടുത്തി പീഡിപ്പിക്കുകയായിരുന്നു. സംഭവം പുറത്തുപറഞ്ഞാല്‍ സഹോദരനെ കൊല്ലുമെന്നും ഭീഷണിപ്പെടുത്തിയതായി യുവതി വെളിപ്പെടുത്തി.

വിവാഹം കഴിഞ്ഞ സമയമായതിനാല്‍ അന്ന് കേസ് കൊടുത്തില്ലെന്നും യുവതി പറഞ്ഞു.സംഭവം അന്വേഷിച്ച്‌ ആവശ്യമായ നടപടിയെടുക്കുമെന്ന് ഡെപ്യൂട്ടി പൊലീസ് കമ്മീഷണര്‍ സെജു പി കുരുവിള അറിയിച്ചു. നേരത്തെ ഗാര്‍ഹിക പീഡനത്തിനും ബി.ജെ.പി എം.എല്‍.എക്കെതിരെ കേസ് രജിസ്റ്റര്‍ ചെയ്തിട്ടുണ്ട്.