ഗോരഖ്പൂരില്‍ ഓക്‌സിജന്‍ കിട്ടാതെ കുട്ടികള്‍ മരിച്ച സംഭവത്തില്‍ ആരോപണ വിധേയനായ ഡോക്ടര്‍ കഫീല്‍ ഖാന്‍ കുറ്റക്കാരനല്ലെന്ന് സംസ്ഥാന സര്‍ക്കാര്‍ നിയോഗിച്ച വകുപ്പുതല അന്വേഷണ സമിതി. രണ്ടുവര്‍ഷം നീണ്ട സസ്‌പെന്‍ഷനും ജയില്‍വാസത്തിനുമൊടുവില്‍ ഡോ. കഫീല്‍ഖാന് അന്വേഷണ കമ്മിഷന്റെ ക്ലീന്‍ ചിറ്റ്. 'സംഭവത്തില്‍ ഡോ. ഖാന്‍ ചികിത്സാപ്പിഴവോ, കുറ്റകരമായ അനാസ്ഥയോ കാട്ടിയെന്നതിന് തെളിവില്ല. കഫീല്‍ ഖാന്‍ 500 ഓക്‌സിജന്‍ സിലിണ്ടറുകള്‍ എത്തിച്ചിരുന്നു.
ഓക്‌സിജന്‍ സിലിണ്ടറുകളുടെ ഓര്‍ഡര്‍ നല്‍കുന്ന പ്രോസസില്‍ ഖാന്‍ ഭാഗമല്ല. ഡോക്ടര്‍ക്കെതിരെ ഉന്നയിച്ച ആരോപണം നിലനില്‍ക്കുന്നതല്ലെന്നും മെഡിക്കല്‍ കമ്മിഷന്‍ റിപ്പോര്‍ട്ടില്‍ വ്യക്തമാക്കി. ഗൊരഖ്പുരിലെ ബിആര്‍ഡി മെഡിക്കല്‍ കോളജില്‍ 2017 ഓഗസ്റ്റില്‍ 70 ശിശുക്കള്‍ പ്രാണവായു ലഭിക്കാതെ മരിച്ചതിനു പിന്നില്‍ ഡോ. കഫീല്‍ ഖാന്റെ അനാസ്ഥയും കൃത്യവിലോപവും ഉണ്ടെന്നായിരുന്നു ആരോപണം.

മസ്തിഷ്‌കജ്വരത്തിനു ചികിത്സ തേടിയിരുന്ന കുട്ടികളാണു മരിച്ചത്. പ്രാഥമികാന്വേഷണത്തെത്തുടര്‍ന്ന് ഡോ.ഖാനെ സസ്പന്‍ഡ് ചെയ്തിരുന്നു. 2017 ആഗസ്റ്റ് 10നാണ് 60 ഓളം കുഞ്ഞുങ്ങള്‍ ശ്വാസം കിട്ടാതെ ആശുപത്രിയില്‍ മരണമടഞ്ഞത്. ഓക്‌സിജന്‍ കുറവാണെന്ന കാര്യം കഫീല്‍ ഖാന്‍ അറിയിക്കാതിരുന്നതാണ് കൂട്ടമരണത്തിനിടയാക്കിയതെന്നാരോപിച്ചാണ് പൊലീസിന്റെ പ്രത്യേക അന്വേഷണ സംഘം അദ്ദേഹത്തെ അറസ്റ്റ് ചെയ്തത്.