ദീപാവലി ആഘോഷം കൊഴിപ്പിക്കാന്‍ പിസ്റ്റള്‍ ഉപയോഗിച്ച് ആകാശത്തേക്ക് വെടിവച്ച ബിസിനസുകാരനും ഭാര്യയും വെട്ടിലായിരിക്കുകയാണ്. ഉത്തര്‍ പ്രദേശിലെ റായ് ബറേലിയിലുള്ള ഇസത് നഗറില്‍ വച്ചാണ് സംഭവം നടന്നത്. ദീപാവലി ആഘോഷത്തിനിടെ ബിസിനസുകാരനായ അജയ് മെഹ്തയും ഭാര്യയും ആകാശത്തേക്ക് വെടിവച്ച് ദീപാവലി ആഘോഷിച്ചത്. ഇത് പോരാഞ്ഞ് ഹിന്ദി ക്ലാസിക് സിനിമയായ 'ഷോലേ'യിലെ പ്രശസ്തമായ 'തേരാ ക്യാ ഹോഗാ കാലിയാ' എന്ന ഡയലോഗും ഇയാള്‍ വിളിച്ചുപറയുന്നുണ്ട്.

മെഹ്തയുടെ പ്രവര്‍ത്തിയില്‍ പരിഭ്രാന്തരായ സമീപവാസികള്‍ ഉടന്‍ തന്നെ അപകടങ്ങളില്‍ നിന്നും രക്ഷപ്പെടാന്‍ തങ്ങളുടെ വീടുകളില്‍ അഭയം തേടുകയായിരുന്നു. സംഭവത്തിന്റെ വീഡിയോ പുറത്ത് വന്നതോടെ പൊലീസ് വിഷയത്തില്‍ അന്വേഷണം ആരംഭിച്ചു. എന്നാല്‍ താനും ഭാര്യയും കളിത്തോക്കുപയോഗിച്ചാണ് വെടിവച്ചതെന്നാണ് അജയ് മെഹ്ത പറയുന്നത്. ഇത് സംബന്ധിച്ച് പൊലീസ് ഇയാളെ സ്‌റ്റേഷനിലേക്ക് വിളിച്ചുവരുത്തിയിട്ടുണ്ട്. ഇയാള്‍ ഉപയോഗിച്ചത് യാഥാര്‍ത്ഥ പിസ്റ്റളാണെന്ന് കണ്ടെത്തിയാല്‍ പരിഭ്രാന്തി സൃഷ്ടിച്ചതിന് പൊലീസ് കേസ് എടുത്തേക്കും.
തോക്കിനുള്ള ലൈസന്‍സും റദ്ദാക്കും. എന്നാല്‍ അജയ് മെഹ്തയുടെ പേരില്‍ ഇസത് നഗറിലും കന്റോണ്‍മെന്റ് സ്‌റ്റേഷനിലും വെടിക്കോപ്പുകളൊന്നും രജിസ്റ്റര്‍ ചെയ്തിട്ടില്ലെന്നാണ് സമീപത്തെ പൊലീസ് സ്‌റ്റേഷനിലെ ഇന്‍സ്‌പെക്ടര്‍ കെ.കെ വര്‍മ പറയുന്നത്. മുന്‍പ് ആഘോഷവേളകളില്‍ വെടിക്കോപ്പുകളും ഉപയോഗിച്ചത് കാരണം ഉത്തര്‍ പ്രദേശില്‍ ചിലര്‍ മരണത്തിനിരയായിട്ടുണ്ട്. ഇത് കാരണം, സംസ്ഥാന സര്‍ക്കാര്‍ ഈ ഏര്‍പ്പാട് നിരോധിച്ചിരുന്നു.