രാജ്യത്തെ ഏറ്റവും വലിയ ബാങ്കായ എസ്ബിഐ സ്ഥിര നിക്ഷേപങ്ങളുടെ പലിശ കുറച്ചു. പുതിയ നിരക്കുകള്‍ നവംബര്‍ 10 മുതല്‍ പ്രാബല്യത്തില്‍വരും. ഈ വര്‍ഷം ഇതുവരെ റിപ്പോ നിരക്ക് 135 ബേസിസ് പോയന്റ് കുറച്ചതിനെതുടര്‍ന്ന് മറ്റു ബാങ്കുകളും നിക്ഷേപ പലിശ ഇടക്കിടെ കുറവുവരുത്തിയിരുന്നു. ഒരുവര്‍ഷത്തിനും രണ്ടുവര്‍ഷത്തിനുമിടയില്‍ കാലാവധിയുള്ള സ്ഥിര നിക്ഷേപത്തിന്റെ പലിശ നിരക്കില്‍ ഇത്തവണ 15 ബേസിസ് പോയന്റാണ് കുറവുവരുത്തിയത്. രണ്ടു കോടി രൂപയ്ക്കുമുകളിലുള്ള നിക്ഷേപങ്ങള്‍ക്കുള്ള പലിശയും കുറച്ചിട്ടുണ്ട്. 30 മുതല്‍ 75 ബേസിസ് പോയന്റുവരെയാണ് കുറവുവരുത്തിയിട്ടുള്ളത്.
വായ്പാ പലിശയും ഇതോടൊപ്പം കുറച്ചു. മാര്‍ജിനല്‍ കോസ്റ്റ് ഓഫ് ലെന്റിങ് റേറ്റ് അടിസ്ഥാനമാക്കിയുള്ള പലിശ നിരക്കില്‍ 5 ബേസിസ് പോയന്റിന്റെ കുറവാണ് വരുത്തിയിട്ടുള്ളത്. ഇതോടെ ഒരുവര്‍ഷ കാലാവധിയുള്ള എംസിഎല്‍ആര്‍ നിരക്ക് 8.05 ശതമാനത്തില്‍നിന്ന് 8 ശതമാനമാകും.

7 ദിവസം മുതല്‍ 45 ദിവസംവരെ 4.50ശതമാനം, 46 ദിവസം മുതല്‍ 179 ദിവസംവരെ 5.50 ശതമാനം,80 ദിവസം മുതല്‍ 210 ദിവസംവരെ 5.80 ,തമാനം,211 ദിവസം മുതല്‍ ഒരുവര്‍ഷംവരെ 5.80 ശതമാനം,ഒരു വര്‍ഷം മുതല്‍ 2 വര്‍ഷംവരെ 6.25 ശതമാനം,2 വര്‍ഷം മുതല്‍ 3 വര്‍ഷംവരെ 6.25 ശതമാനം,3 വര്‍ഷം മുതല്‍ 5 വര്‍ഷംവരെ 6.25 ശതമാനം,5 വര്‍ഷം മുതല്‍ 10 വര്‍ഷംവരെ 6.25 ശതമാനവുമാണ്. മുതിര്‍ന്ന പൗരന്മാര്‍ക്ക് അരശതമാനംവരെ അധിക പലിശ ലഭിക്കും. നവംബര്‍ 10 മുതലാണ് ഈ നിരക്കും പ്രാബല്യത്തില്‍വരിക.