അഘാടിയില്‍ കല്ലുകടി; മഹാരാഷ്ട്രയില്‍ ശിവസേനയുള്‍പ്പെട്ട ബിജെപി ഇതര സര്‍ക്കാരില്‍ മുഖ്യമന്ത്രിയടക്കം 43 മന്ത്രിമാരെ ഉള്‍പ്പെടുത്താന്‍ കോണ്‍ഗ്രസ എന്‍സിപി നേതൃയോഗത്തില്‍ പ്രാഥമിക ധാരണ
മഹാരാഷ്ട്രയില്‍ ശിവസേനയുള്‍പ്പെട്ട ബിജെപി ഇതര സര്‍ക്കാരില്‍ മുഖ്യമന്ത്രിയടക്കം 43 മന്ത്രിമാരെ ഉള്‍പ്പെടുത്താന്‍ കോണ്‍ഗ്രസ എന്‍സിപി നേതൃയോഗത്തില്‍ പ്രാഥമിക ധാരണ. 3 കക്ഷികളും ഇന്നു മുംബൈയില്‍ ചര്‍ച്ച നടത്തി സര്‍ക്കാര്‍ രൂപീകരണ നടപടികളിലേക്കു കടക്കും.
കോണ്‍ഗ്രസും എന്‍സിപിയും ചേര്‍ന്നു രൂപം നല്‍കിയ പൊതു മിനിമം പരിപാടിക്കു സേനയുടെ അംഗീകാരം സര്‍ക്കാര്‍ രൂപീകരണത്തില്‍ നിര്‍ണായകമാകും. സേനയുമായി കൈകോര്‍ക്കാനുള്ള കോണ്‍ഗ്രസ് തീരുമാനത്തിനു പാര്‍ട്ടിയുടെ പ്രവര്‍ത്തക സമിതി അംഗീകാരം നല്‍കി. മുഖ്യമന്ത്രിപദം 5 വര്‍ഷം സേനയ്ക്കു നല്‍കുന്നതില്‍ ഇരു കക്ഷികള്‍ക്കും എതിര്‍പ്പില്ലെന്നാണു സൂചനയെങ്കിലും അന്തിമ തീരുമാനമായിട്ടില്ല.
രണ്ടര വര്‍ഷം വീതം മുഖ്യമന്ത്രി സ്ഥാനം പങ്കിടണമെന്ന ആഗ്രഹം എന്‍സിപിക്കുണ്ട്. കോണ്‍ഗ്രസിനും എന്‍സിപിക്കും ഓരോ ഉപമുഖ്യമന്ത്രിമാര്‍. സ്പീക്കര്‍ പദവിക്ക് കോണ്‍ഗ്രസ് അവകാശമുന്നയിക്കും. ശിവസേനയ്ക്ക് 16, എന്‍സിപിക്ക് 15, കോണ്‍ഗ്രസിന് 12 എന്നിങ്ങനെയാണു മന്ത്രിസഭാ പ്രാതിനിധ്യം പരിഗണിക്കുന്നത്. എംഎല്‍എമാരുടെ എണ്ണത്തിന് ആനുപാതികമായി മന്ത്രിപദവി എന്ന കോണ്‍ഗ്രസ് നിര്‍ദേശത്തിന്റെ അടിസ്ഥാനത്തിലാണിത്. വകുപ്പ് വിഭജനം പിന്നീട് തീരുമാനിക്കും.
അപ്രധാന വകുപ്പുകളാണു ലഭിക്കുന്നതെങ്കില്‍ കൂടുതല്‍ മന്ത്രിമാരെ കോണ്‍ഗ്രസ് ആവശ്യപ്പെട്ടേക്കുമെന്നാണ് പാര്‍ട്ടി കേന്ദ്രങ്ങള്‍ നല്‍കുന്ന സൂചന. എന്‍സിപി അധ്യക്ഷന്‍ ശരദ് പവാറിന്റെ വസതിയില്‍ ചേര്‍ന്ന നേതൃയോഗത്തില്‍ മഹാ വികാസ് അഘാടി (മഹാ പുരോഗമന സഖ്യം) എന്ന പേര് സഖ്യത്തിനു നല്‍കുന്നതു ചര്‍ച്ചയായി. സര്‍ക്കാര്‍ രൂപീകരണത്തിനുള്ള പൊതു മിനിമം പരിപാടിയുടെ ഉള്ളടക്കം സംബന്ധിച്ച് ഇരു കക്ഷികളും യോഗത്തില്‍ ധാരണയിലെത്തി.
ഭരണഘടന വിഭാവനം ചെയ്യുന്ന മതനിരപേക്ഷതയില്‍ സഖ്യം അടിയുറച്ചു നില്‍ക്കുമെന്ന പരാമര്‍ശം കോണ്‍ഗ്രസിന്റെ ആവശ്യപ്രകാരം പൊതു മിനിമം പരിപാടിയില്‍ ഉള്‍പ്പെടുത്തി. ഭരണഘടനയുടെ ആമുഖ വാചകങ്ങളും ചേര്‍ക്കും. ഇക്കാര്യം പവാര്‍ മുഖേന സേനാ നേതൃത്വത്തെ കോണ്‍ഗ്രസ് അറിയിച്ചു.
ഇന്നലെ കോണ്‍ഗ്രസ് പ്രസിഡന്റ് സോണിയ ഗാന്ധിയുടെ വസതിയില്‍ ചേര്‍ന്ന അടിയന്തര പ്രവര്‍ത്തക സമിതി യോഗത്തിന്റെ നിര്‍ദേശപ്രകാരമാണു മതനിരപേക്ഷതയ്ക്ക് ഊന്നല്‍ നല്‍കാനുള്ള തീരുമാനം. കോണ്‍ഗ്രസ് നേതാക്കളായ മല്ലികാര്‍ജുന്‍ ഖര്‍ഗെ, ജയറാം രമേശ്, കെ.സി. വേണുഗോപാല്‍, പൃഥ്വിരാജ് ചവാന്‍, അശോക് ചവാന്‍, മഹാരാഷ്ട്ര പിസിസി പ്രസിഡന്റ് ബാലാസാഹേബ് തോറാട്ട് തുടങ്ങിയവരാണു പവാറുമായി ചര്‍ച്ച നടത്തിയത്.
മുംബൈ ന്മ കോണ്‍ഗ്രസ്, എന്‍സിപി, ശിവസേന നേതാക്കള്‍ തമ്മില്‍ നടത്തുന്ന ചര്‍ച്ചയില്‍ അഭിപ്രായ ഐക്യമായാല്‍ ഇന്നു തന്നെ മഹാരാഷ്ട്രയിലെ പുതിയ രാഷ്ട്രീയ കൂട്ടുകെട്ടായ മഹാ പുരോഗമന സഖ്യം പ്രഖ്യാപിച്ചേക്കും. ഒപ്പം മുഖ്യമന്ത്രി സ്ഥാനാര്‍ഥിയുടെ പേരും. പൊതുമിനിമം പരിപാടിയുടെ കരടിനു ശേഷം ആദ്യമായാണു മൂന്നു പാര്‍ട്ടികളുടെയും നേതാക്കളും പരസ്പരം ചര്‍ച്ച നടത്തുന്നത്.
https://www.facebook.com/Malayalivartha
