ജമ്മു കശ്മീരില്‍ നിര്‍ത്തലാക്കിയ ഇന്റര്‍നെറ്റ് സേവനങ്ങള്‍ ഇന്നു മുതല്‍ ഭാഗികമായി പുനഃസ്ഥാപിക്കും. എന്നാല്‍ സമൂഹ മാധ്യമങ്ങള്‍ക്കുള്ള നിയന്ത്രണം തുടരും. സര്‍ക്കാര്‍ വെബ്സൈറ്റുകള്‍, മറ്റു സേവനങ്ങള്‍ കൈകാര്യം ചെയ്യുന്ന വെബ്സൈറ്റുകള്‍, ഇബാങ്കിങ് എന്നിവിടങ്ങളില്‍ ഇന്റര്‍നെറ്റ് സേവനം ലഭ്യമാകും. ജമ്മു-കശ്മീരിന് നല്‍കിയിരുന്ന പ്രത്യേക പദവി റദ്ദാക്കിയതിനെ തുടര്‍ന്ന് ആയിരുന്നു നിയന്ത്രണങ്ങള്‍ ഏര്‍പ്പെടുത്തിയത്.

എന്നാല്‍ ഇന്റര്‍നെറ്റിന്റെ ദുരുപയോഗം തടയുന്നതിന് സ്ഥാപനങ്ങള്‍ക്ക് ഉത്തരവാദിത്തമുണ്ടെന്നും നോഡല്‍ ഓഫിസര്‍മാരെ നിയമിക്കുക, റെക്കോര്‍ഡ് സൂക്ഷിക്കുക, ഉപയോഗം നിരീക്ഷിക്കുക, അംഗീകൃത ഉപയോക്താക്കള്‍ ഉണ്ടായിരിക്കുക എന്നിവ ഉള്‍പ്പെടെ ആവശ്യമായ മുന്‍കരുതലുകള്‍ സ്വീകരിക്കേണ്ടതുണ്ടെന്നും ഉത്തരവില്‍ പറയുന്നു.

ശ്രീനഗറിലാണ് ഇന്റര്‍നെറ്റ് ആദ്യം പുനഃസ്ഥാപിക്കുന്നത്. രണ്ടു ദിവസങ്ങള്‍ക്കു ശേഷം വടക്കന്‍ കശ്മീരിലെ കുപ്വാര, ബന്ദിപോര, ബാരാമുള്ള എന്നിവിടങ്ങളിലും , പിന്നീട് ദക്ഷിണ കശ്മീരിലെ പുല്‍വാമ, കുല്‍ഗാം, ഷോപിയാന്‍, അനന്ത്‌നാഗ് എന്നിവിടങ്ങളിലും പുനഃസ്ഥാപിക്കും. ഒരാഴ്ചയ്ക്കു ശേഷം അവലോകനം നടത്തുമെന്നും സെല്‍ഫോണ്‍ ഇന്റര്‍നെറ്റ് പുനഃസ്ഥാപിക്കുന്നതിനെക്കുറിച്ച് ലഫ്റ്റനന്റ് ഗവര്‍ണര്‍ അറിയിക്കുമെന്നും ബന്ധപ്പെട്ട വൃത്തങ്ങള്‍ വ്യക്തമാക്കി.

ജമ്മു കശ്മീരിന് ആര്‍ട്ടിക്കിള്‍ 370 പ്രകാരം നല്‍കിയിരുന്ന പ്രത്യേക പദവി ഓഗസ്റ്റില്‍ റദ്ദാക്കി, സംസ്ഥാനത്തെ രണ്ടു കേന്ദ്രഭരണ പ്രദേശങ്ങളായി വിഭജിച്ചിരുന്നു. ഇതിനു മുന്നോടിയായി മുന്‍കരുതല്‍ നടപടി എന്ന നിലയില്‍ ഇന്റര്‍നെറ്റ് സേവനങ്ങള്‍ നിര്‍ത്തലാക്കി. ഇതിനെതിരെ സുപ്രീം കോടതിയില്‍ സമര്‍പ്പിച്ച ഹര്‍ജിയില്‍ എല്ലാ നിയന്ത്രണങ്ങളും ഉത്തരവുകളും പുനഃപരിശോധിക്കണമെന്ന് കോടതി കഴിഞ്ഞ ആഴ്ച ഉത്തരവിട്ടു. സംസ്ഥാനത്ത് സെക്ഷന്‍ 144 ആവര്‍ത്തിച്ച് ഉപയോഗിക്കുന്നതിനെ വിമര്‍ശിച്ച കോടതി, ഇന്റര്‍നെറ്റ് സേവനം ഭരണഘടനയുടെ ആര്‍ട്ടിക്കിള്‍ 19 (1) (എ) യുടെ അവിഭാജ്യ ഘടകമാണെന്നും കൂട്ടിച്ചേര്‍ത്തു.