ജമ്മു കശ്മീര്‍ മുഖ്യമന്ത്രി മുഫ്തി മുഹമ്മദ് സെയ്ദിന്റെ വിവാഹ പരാമര്‍ശത്തില്‍ പാര്‍ലമെന്റില്‍ ഇന്നും പ്രതിപക്ഷ ബഹളം. സെയ്ദിന്റെ പ്രസ്താവനയില്‍ പ്രധാനമന്ത്രി വിശദീകരണം നല്‍കണമെന്നാവശ്യപ്പെട്ടാണ് പ്രതിപക്ഷം ലോക്‌സഭ പ്രക്ഷുബ്ദമാക്കിയത്. സെയ്ദിന്റെ പരാമര്‍ശം സര്‍ക്കാര്‍ സ്വാഗതം ചെയ്യുന്നില്ലെന്നും ഇത്തരം പ്രസ്താവനകളെ സാക്ഷ്യപ്പെടുത്തുന്നില്ലെന്നും ആഭ്യന്തരമന്ത്രി രാജ്‌നാഥ് സിംഗ് ഇന്നും അറിയിച്ചു.
ആഭ്യന്തരമന്ത്രി പറഞ്ഞതാണ് സഭയുടെ വികാരമെന്നും നടപടികളുമായി മുന്നോട്ടുപോകാന്‍ അനുവദിക്കണമെന്നും പാര്‍ലമെന്ററി കാര്യമന്ത്രി വെങ്കയ്യ നായിഡുവും പ്രതിപക്ഷത്തോട് അഭ്യര്‍ഥിച്ചു. സര്‍ക്കാരിനെതിരെ പ്രതിപക്ഷം ഒറ്റക്കെട്ടായാണ് ഇന്ന് സഭയില്‍ പ്രതിഷേധിച്ചത്. ചോദ്യോത്തരവേള തടസ്സപ്പെടുത്തിയ പ്രതിപക്ഷ ബഹളത്തില്‍ സഭ രണ്ടു തവണ നിര്‍ത്തിവയ്‌ക്കേണ്ടിയും വന്നു.
സഭ ചേര്‍ന്നപ്പോള്‍ വിഷയത്തില്‍ അടിയന്തര പ്രമേയത്തിന് നോട്ടീസ് നല്‍കാന്‍ തൃണമൂല്‍ കോണ്‍ഗ്രസിലെ സൗഗത റോയ്ക്കും കോണ്‍ഗ്രസിലെ ദീപേന്ദര്‍ ഹൂഡയ്ക്കും സ്പീക്കര്‍ സുമിത്ര മഹാജന്‍ അനുമതി നല്‍കി. വിഷയത്തില്‍ പ്രധാനമന്ത്രിയെ എല്ലാം ധരിപ്പിച്ചിട്ടുണ്ടെന്നാണ് മുഫ്തിയുടെ നിലപാട്. ഈ സാഹചര്യത്തില്‍ വിശദീകരണം നല്‍കാന്‍ മോഡി ബാധ്യസ്ഥനാണെന്ന് സൗഗത റോയ് ചൂണ്ടിക്കാട്ടി. മുഫ്തിയുടെ പരാമര്‍ശം അനാവശ്യമാണെന്നും ഇതില്‍ അപലപിച്ചുള്ള പ്രമേയം സഭ പാസാക്കണമെന്നും ഹൂഡ ആവശ്യപ്പെട്ടൂ.
എന്നാല്‍ വിഷയത്തില്‍ സര്‍ക്കാര്‍ ഇതിനകം വിശദീകരണം നല്‍കിയതാണെന്നും ഇനി വിഷയം ഉന്നയിക്കേണ്ട കാര്യമില്ലെന്നുമായിരുന്നു നോട്ടീസില്‍ മറുപടി നല്‍കിയത രാജ്‌നാഥ് സിംഗിന്റെ നിലപാട്. സര്‍ക്കാരിന്റെ നിലപാട് അറിയാന്‍ ജനങ്ങള്‍ക്ക് ആഗ്രഹമുണ്ടെന്നും അതിനാല്‍ പ്രധാനമന്ത്രിയുടെ പ്രസ്താവന അനിവാര്യമാണെന്നും കോണ്‍ഗ്രസ് നേതാവ് മല്ലികാര്‍ജുന്‍ ഖാര്‍ഗെ ഉന്നയിച്ചു. പ്രസ്താവന നടത്തിയെന്നു കരുതി പ്രധാനമന്ത്രിക്ക് ഒന്നും നഷ്ടപ്പെടാന്‍ പോകുന്നില്ലെന്നും ഖാര്‍ഗെ പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha