ഗവര്‍ണര്‍ ആരിഫ് മുഹമ്മദ് ഖാനെ തിരിച്ചുവിളിക്കണമെന്ന പ്രതിപക്ഷത്തിന്റെ പ്രമേയത്തില്‍ അനിശ്ചിതത്വം തുടരുന്നു... പ്രമേയത്തില്‍ തീരുമാനം വെള്ളിയാഴ്ച ഉണ്ടായേക്കുമെന്ന സൂചനഗവര്‍ണര്‍ ആരിഫ് മുഹമ്മദ് ഖാനെ തിരിച്ചുവിളിക്കണമെന്ന പ്രതിപക്ഷത്തിന്റെ പ്രമേയത്തില്‍ അനിശ്ചിതത്വം തുടരുന്നു. അതേസമയം പ്രമേയത്തില്‍ തീരുമാനം വെള്ളിയാഴ്ച ഉണ്ടായേക്കുമെന്ന സൂചനയും ഉയരുന്നുണ്ട്.നിയമസഭയുടെ കാര്യോപദേശക സമിതിയുടെ യോഗമാണ് വെള്ളിയാഴ്ച ചേരുക. ഈ യോഗത്തില് പ്രമേയത്തിന് അനുമതി നല്‍കണോ എന്ന് തീരുമാനിക്കും.
ഗവര്‍ണറെ തിരിച്ചുവിളിക്കണമെന്ന് കേന്ദ്രത്തോട് ആവശ്യപ്പെടുന്ന പ്രമേയമാണ് പ്രതിപക്ഷം മുന്നോട്ട് വെച്ചിരിക്കുന്നത്. ചട്ടം 130 പ്രകാരം പ്രതിപക്ഷ നേതാവിന്റെ നോട്ടീസ് നിയമപരമായി നിലനില്‍ക്കുമെന്ന് സ്പീക്കര്‍ പി. ശ്രീരാമകൃഷ്ണന്‍ വ്യക്തമാക്കിയിരുന്നു. സ്പീക്കര്‍ക്ക് തീരുമാനമെടുക്കാമെന്നാണ് നടപടിക്രമവും കാര്യനിര്‍വ്വഹണവും സംബന്ധിച്ച ചട്ടം. പ്രമേയത്തിന്റെ യോഗ്യത സ്പീക്കര്‍ക്ക് തീരുമാനിക്കാമെന്നാണ് ചട്ടം 134 പറയുന്നത്. അതേസമയം, പ്രമേയത്തിന്റെ ഉദ്ദേശശുദ്ധിയെ കുറിച്ച് സംശയമുണ്ടെങ്കില്‍ സ്പീക്കര്‍ക്ക് അത് അനുവദിക്കാതിരിക്കാം. മുഖ്യമന്ത്രിയോട് ആലോചിച്ച് ചര്‍ച്ചയ്ക്ക് ശേഷമാകും സ്പീക്കര്‍ തീരുമാനമെടുക്കുക.

നേരത്തേയും ഇത്തരം പ്രമേയങ്ങള്‍ നിയമസഭ പാസാക്കിയിട്ടുണ്ട്. പ്രമേയത്തിനെതിരേ ഗവര്‍ണര്‍ക്ക് എതിര്‍പ്പുണ്ടെങ്കില്‍ സ്പീക്കറെ രേഖാമൂലം അറിയിക്കാം എന്നാണ് നിയമം. ഏതു നിയമത്തിനെതിരെയും പ്രമേയം പാസാക്കാനുള്ള അവകാശം നിയമസഭയ്ക്കുണ്ടെന്നും അതില്‍ ഭരണഘടനാവിരുദ്ധമായി ഒന്നുമില്ലെന്നും മുന്‍ സുപ്രീംകോടതി ജഡ്ജിയും സംസ്ഥാന ഗവര്‍ണറുമായിരുന്ന ജസ്റ്റിസ് പി. സദാശിവം വ്യക്തമാക്കിയിട്ടുണ്ട്.