രാജ്യം ഏറെ ആകാംക്ഷയോടെ കാത്തിരിക്കുന്ന തിരഞ്ഞെടുപ്പാണ് തലസ്ഥാനേത്തേത്. നിലവിലെ രാഷ്ട്രീയ സാഹചര്യങ്ങളുടെ അടിസ്ഥാനത്തില്‍ അരവിന്ദ് കെജ്രിവാളിന് ഭരണത്തുടര്‍ച്ചയുണ്ടാകുമെന്നാണ് രാഷ്ട്രീയ നിരീക്ഷകര്‍ വിലയിരുത്തുന്നത്. അതേസമയം തലസ്ഥാനത്ത് അധികാരത്തിലെത്തുക എന്നത് ബി.ജെ.പി അഭിമാനപ്രശ്നമായാണ് കാണുന്നത്.
ഡല്‍ഹി മുഖ്യമന്ത്രി അരവിന്ദ് കെജ്രിവാളിനെതിരെ ആഞ്ഞടിച്ച് കേന്ദ്ര ആഭ്യന്തരമന്ത്രി അമിത് ഷാ. കെജ്രിവാള്‍ ബിജെപിയെ രാജ്യസ്നേഹം പഠിപ്പിക്കണ്ടെന്നും താന്‍ വളരെ ചെറുപ്പത്തില്‍ തന്നെ ബിജെപിയിലെത്തിയതാണെന്നും അമിത് ഷാ പറഞ്ഞു. റായ്പൂരില്‍ നടന്ന പൊതുപരിപാടിയില്‍ സംസാരിക്കുകയായിരുന്നു അദ്ദേഹം.

പൗരത്വ ഭേദഗതി നിയമത്തിനെതിരെ ഇത്തരക്കാര്‍ വ്യാജ പ്രചാരണങ്ങള്‍ അഴിച്ചുവിടുന്നത് രാജ്യത്ത് കലാപം ഉണ്ടാക്കാനാണ്. ബിജെപിക്ക് പാകിസ്താനികളേയാണ് ഇഷ്ടമെന്ന് കെജ്രിവാള്‍ പറഞ്ഞതായി ശ്രദ്ധയില്‍പ്പെട്ടു. അദ്ദേഹം ഞങ്ങളെ രാജ്യസ്നേഹം പഠിപ്പിക്കേണ്ടതില്ല. ഇന്ത്യക്കാരായ മുസ്ലീങ്ങളുടെ പൗരത്വം നഷ്ടപ്പെടില്ലെന്ന് വീണ്ടും ആവര്‍ത്തിക്കുന്നു. അമിത് ഷാ പറഞ്ഞു.

ജെഎന്‍യുവില്‍ രാജ്യവിരുദ്ധ മുദ്രാവാക്യങ്ങള്‍ മുഴക്കിയവര്‍ക്കെതിരെ നടപടി സ്വീകരിക്കാത്തതിന് കെജ്രിവാളിനെ അദ്ദേഹം രൂക്ഷമായി വിമര്‍ശിച്ചു. രണ്ട് വര്‍ഷം മുന്‍പും സമാനമായ രീതിയില്‍ ജെഎന്‍യുവില്‍ രാജ്യവിരുദ്ധ മുദ്രാവാക്യങ്ങള്‍ മുഴക്കിയിരുന്നു. അന്ന് കനയ്യ കുമാര്‍ ഉള്‍പ്പെടെയുള്ളവരെ വിചാരണ ചെയ്യാന്‍ കെജ്രിവാള്‍ വിസമ്മതിച്ച സംഭവവും അമിത് ഷാ ചൂണ്ടിക്കാട്ടി.

മുമ്പും ആംആദ്മിയുടെ അഞ്ച് വര്‍ഷത്തെ ഭരണം ഡല്‍ഹിയെ പിന്നോട്ട് വലിച്ചതായി അമിത് ഷാ പറഞ്ഞു. തെരഞ്ഞെടുപ്പ് വേളയില്‍ ജനങ്ങള്‍ക്ക് നല്‍കിയ വാഗ്ദാനങ്ങള്‍ പാലിക്കാതെ വഞ്ചിക്കുകയാണ് എഎപിയും അരവിന്ദ് കെജ്രിവാളും ചെയ്തത്. ഡല്‍ഹിയില്‍ സംഘടിപ്പിച്ച പരിപാടിയില്‍ സംസാരിക്കുകയായിരുന്നു അദ്ദേഹം.

സുരക്ഷയ്ക്കായി നഗരത്തിന്റെ വിവിധയിടങ്ങളില്‍ 15 ലക്ഷം സിസിടിവി ക്യാമറകള്‍ സ്ഥാപിക്കുമെന്നാണ് തെരഞ്ഞെടുപ്പ് വേളയില്‍ കെജ്രിവാള്‍ പറഞ്ഞത്. നഗരത്തില്‍ എവിടെയാണ് അദ്ദേഹം ക്യാമറകള്‍ സ്ഥാപിച്ചത്. ഡല്‍ഹി ട്രാന്‍സ്പോര്‍ട്ട് കോര്‍പ്പറേഷന് വേണ്ടി 5,000 ബസുകള്‍ വാങ്ങുമെന്നാണ് കെജ്രിവാള്‍ വാഗ്ദാനം ചെയ്തത്. എന്നാല്‍ 300 എണ്ണം മാത്രമാണ് ഇതുവരെ വാങ്ങിയത്. ഡല്‍ഹിയില്‍ സ്‌കൂളുകള്‍ ആരംഭിക്കുന്നത് മുതല്‍ യമുന നദി വൃത്തിയാക്കുന്നത് വരെയുള്ള വാഗ്ദാനങ്ങളാണ് ആംആദ്മി ആളുകള്‍ക്ക് നല്‍കിയിരുന്നത്. ഇതെല്ലാം അരവിന്ദ് കെജ്രിവാളിന് ഓര്‍മ്മയുണ്ടോ എന്നും അദ്ദേഹം ചോദിച്ചു.

എവിടെയാണ് പുതിയ സ്‌കൂളുകള്‍ നിര്‍മ്മിച്ചതെന്ന് കെജ്രിവാള്‍ പറഞ്ഞ് തരണം. ഡല്‍ഹിയിലെ സ്‌കൂളുകളില്‍ ഏകദേശം 700 സ്‌കൂളുകളില്‍ ഇന്നും പ്രധാനാദ്ധ്യാപകര്‍ ഇല്ലാത്ത സ്ഥിതിയാണ്. പല സ്‌കൂളുകളിലും ശാസ്ത്രവിഭാഗം ഇല്ല. സംസ്ഥാനത്തെ സ്‌കൂളുകളില്‍ 19,000 ത്തിലധികം അദ്ധ്യാപകരുടെ കുറവാണ് ഉള്ളതെന്നും അമിത് ഷാ ചൂണ്ടിക്കാട്ടി. യമുന നദി ശരിയാം വിധം ശുചിയാക്കാന്‍ പോലും സര്‍ക്കാരിന് കഴിഞ്ഞിട്ടില്ലെന്നും അമിത് ഷാ കൂട്ടിച്ചേര്‍ത്തു.