മഹാരാഷ്ട്രയില് ഒടുവില് അത് തന്നെ സംഭവിച്ചു; ഇരു സഭകളും പാസാക്കി രാഷ്ട്രപതി ഒപ്പുവെച്ച പൗരത്വ ഭേദഗതി നിയമത്തിനെതിരെ മഹാരാഷ്ട്രയില് പ്രമേയം പാസാക്കാന് ഇല്ലെന്ന് ഉപമുഖ്യമന്ത്രിയും എന്സിപി നേതാവുമായ അജിത് പവാര്
ഇരു സഭകളും പാസാക്കി രാഷ്ട്രപതി ഒപ്പുവെച്ച പൗരത്വ ഭേദഗതി നിയമത്തിനെതിരെ മഹാരാഷ്ട്രയില് പ്രമേയം പാസാക്കാന് ഇല്ലെന്ന് ഉപമുഖ്യമന്ത്രിയും എന്സിപി നേതാവുമായ അജിത് പവാര് അറിയിച്ചു. പൂനെയില് മാധ്യമ പ്രവര്ത്തകരോട് സംസാരിക്കവേയാണ് ഇക്കാര്യം അറിയിച്ചത്.
സിഎഎയ്ക്കെതിരായി പ്രമേയം കൊണ്ടുവരാന് മഹാരാഷ്ട്ര മുഖ്യമന്ത്രി ഉദ്ധവ് താക്കറെ അനുമതി നല്കില്ല. കേരളം, പഞ്ചാബ്, രാജസ്ഥാന് എന്നീ സംസ്ഥാനങ്ങളുടെ മാതൃകയില് പൗരത്വ നിയമ ഭേദദഗതിക്കെതിരെ പ്രമേയം പാസാക്കാന് മഹാരാഷ്ട്ര സര്ക്കാരിന് സാധിക്കില്ല. ഈ സംസ്ഥാനങ്ങളെ അപേക്ഷിച്ച് വ്യത്യസ്തമായ കൂട്ടുകക്ഷി ഭരണമാണ് മഹാരാഷ്ട്രയില് നിലനില്ക്കുന്നത്. അതുകൊണ്ടുതന്നെ സിഎഎയെ എതിര്ത്ത് പ്രമേയം കൊണ്ടുവരാനുള്ള സാധ്യതയും കുറവാണെന്നും പവാര് പറഞ്ഞു.
എന്സിപി കോണ്ഗ്രസ് സഖ്യം ശിവസേനയുമായി ചേര്ന്നാണ് മഹാരാഷ്ട്രയില് ത്രികക്ഷി സര്ക്കാര് ഉണ്ടാക്കിയിരിക്കുന്നത്. തെരഞ്ഞെടുപ്പ് പ്രഖ്യാപന വേളയില് ബിജെപിയുമായി ചേര്ന്ന് വോട്ട് നേടുകയും തുടര്ന്ന് ഫലം പുറത്തുവന്നതോടെ ശിവസേന എന്സിപി കോണ്ഗ്രസ്സിനൊപ്പം ചേര്ന്ന് സര്ക്കാര് രൂപീകരിക്കുകയായിരുന്നു. തീവ്ര ഹിന്ദു നിലപാടുള്ള ശിവസേനയ്ക്കൊപ്പം നില്ക്കാന് കോണ്ഗ്രസ് നേതൃത്വം എതിര്പ്പ് പ്രകടിപ്പിച്ചതാണ്. പ്രവര്ത്തകര്ക്കിടയിലും വിഷയത്തില് രണ്ട് അഭിപ്രായമാണുള്ളത്.
അതേസമയം പൗരത്വനിയമ ഭേദഗതിയെ ലോക്സഭയില് പിന്തുണച്ചെങ്കിലും, രാജ്യസഭയില് അവതരിപ്പിച്ചപ്പോള് കോണ്ഗ്രസ്സിന്റെ എതിര്പ്പിനെ തുടര്ന്ന് ശിവസേന വോട്ടിങ്ങിന്റെ സമയത്ത് ഇറങ്ങിപ്പോവുകയായിരുന്നു.
അതിനിടെ പാക്കിസ്ഥാനില്നിന്നും ബംഗ്ലാദേശില് നിന്നുമുള്ള മുസ്ലിങ്ങളെ ഇന്ത്യയില്നിന്ന് പുറത്താക്കണമെന്ന പ്രഖ്യാപനം കഴിഞ്ഞദിവസം പാര്ട്ടിയുടെ മുഖപത്രമായ സാമ്നയിലൂടെയാണ് ശിവസേന നടത്തിയത്.
https://www.facebook.com/Malayalivartha