പഠിച്ച പടങ്ങൾ ഒരിക്കലും വെറുതെ ആകില്ല എന്നും എന്നെങ്കിലും ഒരിക്കൽ ജീവിതത്തിൽ അത് ഉപകാരപ്പെടും എന്നതിന് ഉദാഹരണം ആണ് ഇപ്പോൾ സമൂഹ മാധ്യമങ്ങളിൽ വൈറലായിക്കൊണ്ടിരിക്കുന്ന ഒരു വീഡിയോയും അതിലെ താരങ്ങളായ ഉദ്യോഗസ്ഥരും. പല സിദ്ധാന്തങ്ങളും തത്വങ്ങളും ഒക്കെ പഠിക്കേണ്ടതുണ്ടോ എന്ന് വലുതാകുമ്പോൾ നമ്മളിൽ പലരും ചിന്തിക്കാറുണ്ട്. വിദ്യാർത്ഥികളായിരിക്കുമ്പോൾ നമ്മൾ പുസ്തകങ്ങളിൽ പഠിച്ച പല കാര്യങ്ങളും മുന്നോട്ടുള്ള ജീവിതത്തിൽ പ്രവർത്തികമാക്കുന്നില്ല അല്ലെങ്കിൽ ഉപയോഗിക്കുന്നില്ല എന്നതാണ് പലപ്പോഴും ഈ ചിന്തകളുടെ കാരണം. ഇത്തരത്തിൽ പല ട്രോളുകളും പ്രചാരത്തിലുണ്ട്. മാത്രമല്ല പല പ്രമുഖരും ഇതേപ്പറ്റിയൊക്കെ അഭിപ്രായങ്ങളും പ്രകടിപ്പിച്ചിട്ടുണ്ട്. എന്നാൽ പഠിച്ച പാഠങ്ങൾ എന്നെങ്കിലും ഉപകാരപ്പെടും എന്നതിന്റെ തെളിവായി ആണ് ഇപ്പോൾ ഒരു വാർത്ത പുറത്തു വന്നിരിക്കുന്നത്. കിണറ്റിൽ വീണ ആനക്കുട്ടിയെ രക്ഷിക്കാൻ പതിനെട്ടടവും പയറ്റി ഒടുവിൽ ഉദ്യോഗസ്ഥർക്ക് തുണയായത് പുരാതന ഗ്രീക്ക് ഗണിതശാസ്ത്രജ്ഞനും കണ്ടുപിടുത്തക്കാരനുമായ ആർക്കിമിഡീസിന്റെ സിദ്ധാന്തമാണ്. ഈ വാർത്തയെ സംബന്ധിച്ച വീഡിയോ ആണ് ഇപ്പോൾ സമൂഹ മാധ്യമങ്ങളിലെ മുഖ്യ ചർച്ച വിഷയം.

ജാര്‍ഖണ്ഡിലെ ഗുമ്ലയിലാണ് കഴിഞ്ഞ ദിവസം കിണറ്റിനുള്ളില്‍ ആനക്കുട്ടി അബദ്ധത്തില്‍ വീണത്. സംഭവമറിഞ്ഞ് സ്ഥലത്തെത്തിയ വനം വകുപ്പ് ഉദ്യോഗസ്ഥരും ഗ്രാമവാസികളും ചേര്‍ന്ന് ആനക്കുട്ടിയെ കരയ്‌ക്കെത്തിക്കാന്‍ മണിക്കൂറുകള്‍ നീണ്ട പരിശ്രമംനടത്തിയെങ്കിലും ഒന്നും ഫലം കണ്ടില്ല. പെട്ടന്നാണ് ഉദ്യോഗസ്ഥരിൽ ഒരാളുടെ തലയിൽ ബുദ്ധിയുദിക്കുന്നത്. പിന്നോട്ടും താമസിച്ചില്ല. ഉദ്യോഗസ്ഥര്‍ ആര്‍ക്കമിഡീസ് സിദ്ധാന്തം പ്രയോഗിച്ചുള്ള പരീക്ഷണം നടത്താൻ തീരുമാനിക്കുകയായിരുന്നു.

ജലം നിറച്ച പാത്രത്തില്‍ വീഴുന്ന വസ്തുവിന്റെ ഭാരത്തിന് തുല്യ അളവായിരിക്കും പുറത്തേക്കൊഴുകുന്ന ജലത്തിന്റെ അളവ് എന്നതാണ് ആര്‍ക്കമിഡീസ് സിന്താദ്ധം പറയുന്നത്. തുടർന്ന് കിണറ്റിലേക്ക് വെള്ളം പമ്പ് ചെയ്യാനാരംഭിച്ചു. പിന്നെ കണ്ടത് അത്ഭുത കാഴ്ചയാണ്. ഏവരെയും ഞെട്ടിച്ചു കൊണ്ട് കിണറ്റില്‍ നിന്ന് വെള്ളം ഉയര്‍ന്നു വന്നതോടെ ആനക്കുട്ടിയും വെള്ളത്തോടൊപ്പം മുകളിലേക്ക് എത്താൻ തുടങ്ങി. ഒടുവിൽ മുകളിലെത്തിയപ്പോൾ ആനയെ പുറത്തെത്തിച്ച് രക്ഷപ്പെടുത്തുകയായിരുന്നു. ആനക്കുട്ടിയെ രക്ഷപ്പെടുത്തിയ ഉദ്യോസ്ഥരെ ഇന്ത്യന്‍ വനം വകുപ്പ് ഉദ്യോസസ്ഥന്‍ രമേഷ് പാണ്ഡെ വാനോളം പുകഴ്ത്തി . രക്ഷാപ്രവര്‍ത്തനത്തിന്റെ വീഡിയോ രമേഷ് പാണ്ഡെ തന്നെയാണ് സമൂഹ മാധ്യമങ്ങളിൽ പങ്കുവെച്ചത്. വീഡിയോ ഇതിനോടകം തന്നെ തരംഗമായി കഴിഞ്ഞു.

വിദ്യാഭ്യാസ കാലത്തേ അറിവുകൾ ഒരിക്കലും പാഴാകില്ല എന്നതിന്റെ തെളിവാണ് ഈ വാർത്ത. പാഠപുസ്തകത്തിൽ ഉൾപ്പെടുത്തിയിരിക്കുന്ന എല്ലാ അറിവുകളും പ്രധാനം തന്നെയാണ്. ഒരു വിധത്തിൽ അല്ലെങ്കിൽ മറ്റൊരു വിധത്തിൽ ഈ അറിവുകൾ സഹായകമാകുക തന്നെ ചെയ്യും. ആയതിനാൽ തന്നെ പഠന ഭാഗങ്ങളെ ഒരിക്കലും പുച്ഛിക്കാനോ തള്ളിപറയാനോ ശ്രമിക്കുന്നതിനു മുൻപ് ഈ വാർത്ത ഓർക്കുക. അറിവുകൾ എന്നും തുണക്കുക തന്നെ ചെയ്യും.