കൊറോണവൈറസ് ബാധ സൂറത്തിലെ വജ്രവിപണിയെ സാരമായി ബാധിച്ചേക്കുമെന്ന് റിപ്പോർട്ടുകൾ. 8000 കോടി രൂപയുടെ കയറ്റുമതി വ്യാപാരം നഷ്ടമായേക്കുമെന്നാണ് വിദഗ്ധരുടെ വിലയിരുത്തല്‍. കൊറോണ വൈറസ് ബാധയെ തുടര്‍ന്ന് അടുത്ത രണ്ട് മാസത്തേക്ക് ഹോങ്കോങ്ങിലേക്കുള്ള വജ്ര കയറ്റുമതി നിര്‍ത്തി വെക്കേണ്ടി വരുമെന്നാണ് സൂചന. സൂറത്തില്‍ നിന്ന് മുഖ്യമായും വജ്രം കയറ്റി അയയ്ക്കുന്നത് ഹോങ്കോങ്ങിലേക്കാണ്.

വിദ്യാഭ്യാസസ്ഥാപനങ്ങളും വ്യാപാര-വ്യവസായ സ്ഥാപനങ്ങളും അടഞ്ഞു കിടക്കുന്ന ഹോങ്കോങ്ങിലെ വ്യാപാരമേഖലയ്ക്ക് മാന്ദ്യം അനുഭവപ്പെട്ടു തുടങ്ങിയിരിക്കുകയാണ്. സൂറത്തില്‍ നിന്നുള്ള കയറ്റുമതിയില്‍ 37 ശതമാനം വജ്രമാണ്. ഹോങ്കോങ്ങില്‍ ഒരു മാസത്തോളം അവധി പ്രഖ്യാപിച്ചിരിക്കുന്നതിനാല്‍ ഗുജറാത്തില്‍ നിന്നുള്ള വ്യാപാരികള്‍ നാട്ടിലേക്ക് മടങ്ങിക്കൊണ്ടിരിക്കുകയാണ്.