ആരോഗ്യമുള്ള ഇന്ത്യയ്ക്ക് രൂപം നല്കുന്നതിന് വേണ്ടി; കോവിഡ്19 നേരിടാന് രാജ്യത്തോട് ധനസഹായം അഭ്യര്ത്ഥിച്ച് പ്രധാനമന്ത്രി നരേന്ദ്രമോദി
കോവിഡ്19 നേരിടാന് രാജ്യത്തോട് ധനസഹായം അഭ്യര്ത്ഥിച്ച് പ്രധാനമന്ത്രി നരേന്ദ്രമോദി. ഇതിന്റെ ഭാഗമായി പിഎം കെയറേഴ്സ് എന്ന പേരില് ദുരിതാശ്വാസനിധിക്ക് രൂപം നല്കി. ആരോഗ്യമുള്ള ഇന്ത്യയ്ക്ക് രൂപം നല്കുന്നതിന് വേണ്ടിയാണ് ഫണ്ടെന്ന് പ്രധാനമന്ത്രിയുടെ ഓഫീസ് അറിയിച്ചു.
കോവിഡിനെ നേരിടാനായി എല്ലാവരും സഹായം നല്കണമെന്ന് മോദി അഭ്യര്ത്ഥിച്ചു. ഇക്കാര്യത്തില് ജനങ്ങളുടെ ഭാഗത്തുനിന്നുണ്ടായിട്ടുള്ള സന്നദ്ധതാ മനോഭാവത്തെ തുടര്ന്നാണ് ഫണ്ടിന് രൂപം നല്കിയതെന്ന് മോദി ട്വിറ്ററില് കുറിച്ചു. ആരോഗ്യമുള്ള ഇന്ത്യയാണ് ലക്ഷ്യമിടുന്നതെന്നും ട്വിറ്ററില് പറയുന്നു.
കോവിഡ് 19നെതിരായ ഇന്ത്യയുടെ യുദ്ധത്തിന് സംഭാവന നല്കിക്കൊണ്ട് പിന്തുണയേകാന് എല്ലാ മേഖലകളിലുമുള്ള ആളുകള് ആഗ്രഹം പ്രകടിപ്പിച്ച് രംഗത്തെത്തിയിട്ടുണ്ട്. ആ മനോഭാവത്തെ മാനിച്ചാണ് പ്രധാനമന്ത്രിയുടെ സിറ്റിസണ് അസിസ്റ്റന്സ് ആന്ഡ് റിലീഫ് ഇന് എമര്ജന്സി സിറ്റ്വേഷന് ഫണ്ട് രൂപീകരിച്ചിട്ടുള്ളതെന്ന് പ്രധാനമന്ത്രി അറിയിച്ചു. ആരോഗ്യപൂര്ണമായ ഇന്ത്യയെ സൃഷ്ടിക്കുന്നതിന് വേണ്ടി ഇത് ദീര്ഘകാലം മുന്നോട്ട് പോകുമെന്നും അദ്ദേഹം ശുഭാപ്തി വിശ്വാസം പ്രകടിപ്പിച്ചു.
'എല്ലാ ഇന്ത്യക്കാരോടുമുള്ള എന്റെ അഭ്യര്ഥനയാണ് ഇത്. ദയവുചെയ്ത് പ്രധാനമന്ത്രി കെയറസ് ഫണ്ടിലേക്ക് സംഭാവന ചെയ്യണം. വരുംകാലങ്ങളില് സമാനമായ സാഹചര്യങ്ങള് ഉടലെടുക്കുകയാണെങ്കില് അതും മറികടക്കാന് ഈ ഫണ്ടിലൂടെ സാധിക്കും.'
ഏതൊരു പ്രശ്നത്തെയും ലഘൂകരിക്കാനുള്ള ഏറ്റവും ഫലപ്രദമായ മാര്ഗ്ഗം പൊതുജന പങ്കാളിത്തമാണ്. ഇക്കാര്യം വിശ്വസിക്കുകയും തന്റെ പ്രവര്ത്തനങ്ങളിലൂടെ പ്രകടമാക്കുകയും ചെയ്ത വ്യക്തിയാണ് പ്രധാനമന്ത്രി. പ്രധാനമന്ത്രിയുടെ കെയറെസ് ഫണ്ട് അതിനുള്ള മറ്റൊരു ഉദാഹരണമാണ്. ഇതുവഴി എത്ര ചെറിയ തുകയും സംഭാവനയായി നല്കാന് സാധിക്കും. അതുവഴി ഏതൊരാള്ക്കും ഇതിന്റെ ഭാഗമാകാന് കഴിയുമെന്നും ഫണ്ട് സംബന്ധിച്ച പത്രക്കുറിപ്പില് പറയുന്നു.
അതേ സമയം പ്രാദേശിക വികസന ഫണ്ടിൽ നിന്ന് ഒരു കോടി രൂപ ദേശിയ ദുരിതാശ്വസ നിധിയിലേക്ക് നൽകാൻ മുഴുവൻ ബിജെപി എംപിമാർക്കും ദേശീയ അധ്യക്ഷൻ ജെപി നദ്ദ നിർദേശം നൽകി. ബിജെപി എംപിമാരും എംഎൽഎമാരും ഒരു മാസത്തെ വേതനം ദേശിയ ദുരിതാശ്വസ നിധിയിലേക്ക് നല്കണമെന്നും നിർദേശമുണ്ട്. അതേ സമയം രാജ്യത്തെ കോവിഡ് പ്രതിരോധ പ്രവർത്തനങ്ങൾക്ക് ടാറ്റാ ട്രസ്റ് 500 കോടി നല്കുമെന്ന് ചെയർമാൻ രത്തൻ ടാറ്റാ അറിയിച്ചു.
https://www.facebook.com/Malayalivartha