കാരുണ്യത്തിന് അതിര്‍ത്തി വ്യത്യാസമില്ലെന്നു തെളിയിക്കുകയാണ് ഡപ്യൂട്ടി പൊലീസ് കമ്മിഷണര്‍ വിജയന്ത ആര്യ. കോവിഡ് ഭീതിയില്‍ ലോകം തന്നെ വിറങ്ങലിച്ചു നില്‍ക്കുമ്പോള്‍, ചുമതലാബോധവും ഉത്തരവാദിത്വവുമാണ് അവരെ മറ്റുള്ളവരില്‍നിന്നു വ്യത്യസ്തയാക്കുന്നതും ഇന്ത്യയുടെ മുഖമാക്കി മാറ്റുന്നതും. സഹായം ആവശ്യമുള്ള എല്ലാവര്‍ക്കും അത് എത്തിച്ചുകൊടുക്കേണ്ടത് സ്വന്തം ചുമതലയാണെന്നും വിജയന്ത ആര്യ കരുതുന്നു. എന്തായാലും പാക്കിസ്ഥാനിലെ സിന്ധ് പ്രവിശ്യയില്‍ നിന്നെത്തിയ 280 കുടുംബങ്ങള്‍ക്ക് ഇപ്പോള്‍ ദൈവത്തിന്റെ സ്ഥാനത്താണ് ഡല്‍ഹിയിലെ ഈ പോലീസ് ഉദ്യോഗസ്ഥ.

ജോലി തേടി ഇന്ത്യയില്‍ എത്തി ലോക്ഡൗണില്‍ കുടുങ്ങിപ്പോയവരാണ് ഇവരെല്ലാവരും. ഡല്‍ഹിയിലെ മജ്‌ലിസ് പാര്‍ക്കിലാണ് ആയിരത്തിലേറെ വരുന്ന സംഘം തമ്പടിച്ചിരിക്കുന്നത്. ജോലിയില്ലാതെയും യാത്ര ചെയ്യാനാവാതെയും മരണം മുന്നില്‍ക്കണ്ട ഇവര്‍ക്കുമുന്നില്‍ ദൈവദൂതരെപ്പോലെ അവതരിക്കുകയായിരുന്നു വിജയന്ത ആര്യ എന്ന വനിതാ പൊലീസ് ഉദ്യോഗസ്ഥയുടെ നേതൃത്വത്തിലെത്തിയ ഡല്‍ഹി പൊലീസുകാര്‍.

അവശ്യസാധനങ്ങള്‍ എത്തിച്ചുകൊടുത്തതിനൊപ്പം ലോക്ഡൗണ്‍ നിലനില്‍ക്കുന്ന 21 ദിവസവും ഭക്ഷണം മുടക്കമില്ലാതെ കൊടുക്കാമെന്നും വിജയന്ത, പാക്ക് സ്വദേശികള്‍ക്ക് ഉറപ്പുകൊടുത്തിരിക്കുകയാണ്. നൂറുകണക്കിനു കുടുംബങ്ങള്‍ മജ്‌ലിസ് പാര്‍ക്കില്‍ ഭക്ഷണം കിട്ടാതെ വലയുകയാണെന്നും പട്ടിണിയാണെന്നും അറിഞ്ഞാണ് ഞങ്ങള്‍ എത്തുന്നത്. അങ്ങേയറ്റം ദയനീയമായിരുന്നു ഇവരുടെ ജീവിതം. ഉടന്‍ തന്നെ അവര്‍ക്കുവേണ്ട എല്ലാ വസ്തുക്കളും എത്തിച്ചുകൊടുക്കാന്‍ ഞങ്ങള്‍ തീരുമാനിക്കുകയായിരുന്നു. കോവിഡിനെതിരായ പോരാട്ടം ഒറ്റയ്‌ക്കൊറ്റയ്ക്കല്ല, ഒരുമിച്ചാണു വേണ്ടത്. ഒരു രാജ്യം ഒറ്റക്കെട്ടായി നീങ്ങിയാല്‍ ഏതു മഹാമാരിയെയും പരാജയപ്പെടുത്താമന്നും വിജയന്ത വ്യക്തമാക്കുന്നു. അതേസമയം, ഡല്‍ഹി പൊലീസിനോട് എത്ര നന്ദി പറഞ്ഞാലും മതിയാകില്ലെന്നാണ് നെഹ്‌റു ലാല്‍ എന്ന പാക്ക് അഭയാര്‍ഥി പറയുന്നത്. മജ്‌ലിസ് പാര്‍ക്കില്‍ താമസിക്കുന്ന നൂറുകണക്കിനു പേരില്‍ ഒരാളാണ് നെഹ്‌റു ലാലും. വിജയന്തയുടെ കാരുണ്യത്താല്‍ തങ്ങള്‍ ഇപ്പോള്‍ പട്ടിണി കൂടാതെ കഴിയുകയാണെന്നും അവര്‍ പറയുന്നു.

അതിനിടെ, കൊറോണ വ്യാപനത്തിന്റെ പശ്ചാത്തലത്തില്‍ രാജ്യത്തു നടപ്പാക്കിയിരിക്കുന്ന 21 ദിവസത്തെ ലോക്ഡൗണ്‍ നീട്ടുമെന്നുള്ള പ്രചാരണം അടിസ്ഥാനരഹിതമാണെന്നു കേന്ദ്രസര്‍ക്കാര്‍ അറിയിച്ചു. ഇതു സംബന്ധിച്ചു പുറത്തുവരുന്ന അഭ്യൂഹങ്ങളും വാര്‍ത്തകളും തെറ്റാണെന്ന് ക്യാബിനറ്റ് സെക്രട്ടറി രാജീവ് ഗൗബ വ്യരക്തമാക്കി. 21 ദിവസത്തിനു ശേഷം ലോക്ഡൗണ്‍ നീട്ടുമെന്നാണ് പലരും പറയുന്നത്. ഇത്തരം റിപ്പോര്‍ട്ടുകള്‍ കണ്ടിട്ട് അദ്ഭുതം തോന്നുന്നു. അത്തരം യാതൊരു ആലോചനകളും നടക്കുന്നില്ലെന്നും രാജീവ് ഗൗബ പറഞ്ഞു. വൈറസ് വ്യാപനത്തിന്റെ ചെയിന്‍ മുറിക്കാനാണ് 21 ദിവസത്തെ ലോക്ഡൗണ്‍ പ്രധാനമന്ത്രി നരേന്ദ്ര മോദി പ്രഖ്യാപിച്ചത്. അതു കൃത്യമായി പാലിക്കുക. വീടുകളില്‍ തന്നെ തുടരുക-രാജീവ് ഗൗബ പറഞ്ഞു.