നിസാമുദ്ദീനില് മതസമ്മേളനത്തില് പങ്കെടുത്തവരില് 24 പേര്ക്ക് ഇതുവരെ കോവിഡ് ബാധ സ്ഥിരീകരിച്ചതായി ഡല്ഹി ആരോഗ്യ മന്ത്രി... 334 പേര് രോഗലക്ഷണങ്ങളോടെ വിവിധ ആശുപത്രികളില്, ഒട്ടേറെ മലയാളികളും നിസാമുദ്ദീനില് വന്നിരുന്നു
നിസാമുദ്ദീനില് മതസമ്മേളനത്തില് പങ്കെടുത്തവരില് 24 പേര്ക്ക് ഇതുവരെ കോവിഡ് ബാധ സ്ഥിരീകരിച്ചതായി ഡല്ഹി ആരോഗ്യ മന്ത്രി സത്യേന്ദ്ര ജയിന് അറിയിച്ചു. മതസമ്മേളനത്തില് എത്രപേര് പങ്കെടുത്തുവെന്നു കൃത്യമായ കണക്ക് ലഭിച്ചിട്ടില്ല. 1700 പേര് എങ്കിലും മസ്ജിദില് ഉണ്ടായിരുന്നുവെന്നാണ് നിഗമനം. ഇതില് 334 പേരെ രോഗലക്ഷണങ്ങളോടെ വിവിധ ആശുപത്രികളില് പ്രവേശിപ്പിച്ചിട്ടുണ്ട്. ഡല്ഹി നഗരത്തിലെ വിവിധയിടങ്ങളിലായി 700 പേരെ ക്വാറന്റീനിലാക്കി. ഡല്ഹി മുഖ്യമന്ത്രി അരവിന്ദ് കേജ്രിവാള് അടിയന്തര യോഗം വിളിച്ചിട്ടുണ്ട്.
അതിനിടെ, നൂറുകണക്കിനു പേരുടെ ജീവന് അപകടത്തിലാക്കിയതിനു മസ്ജിദ് ഭാരവാഹികള്ക്കെതിരെ കേസ് എടുക്കാന് കേജ്രിവാള് ഉത്തരവിട്ടു. കേരളത്തിലെ പല ജില്ലകളില് നിന്നായി ഒട്ടേറെപ്പേര് നിസാമുദ്ദീന് സമ്മേളനത്തിനു വന്നിരുന്നു. എന്നാല് ഇവരില് പലരും കോവിഡ് നിയന്ത്രണങ്ങള് വരുന്നതിനു മുമ്പ് തന്നെ നാട്ടിലോട്ട് മടങ്ങിയെന്നാണു വിവരം. ഇതിനിടെ, സമ്മേളനത്തില് പങ്കെടുത്ത പത്തനംതിട്ട സ്വദേശിയായ ഡോ. എം. സലിം മരിച്ചു. 74 വയസായിരുന്നു. പത്തനംതിട്ട അമീര് ആയ സലിം കഴിഞ്ഞ ചൊവ്വാഴ്ച ഡല്ഹിയില് വച്ചാണ് മരിച്ചത്.
ഇദ്ദേഹത്തിന് ഹൃദ്രോഗവും മറ്റ് അസുഖങ്ങളും ഉണ്ടായിരുന്നു. എന്നാല് കോവിഡ് ബാധ ഇതുവരെ സ്ഥിരീകരിക്കാനായിട്ടില്ല. പത്തനംതിട്ട മേലെവെട്ടിപ്പുറം സ്വദേശിയാണു സലിം. മൃതദേഹം നിസാമുദ്ദീനില് കബറടക്കിയിരുന്നു. കാതോലിക്കറ്റ് കോളജില് കെമിസ്ട്രി പ്രഫസറായി വിരമിച്ച ഇദ്ദേഹം നേരത്തെ ബൈപാസ് സര്ജറിക്കു വിധേയനായിട്ടുണ്ട്. സുഹൃത്തുക്കളായ രണ്ടുപേരും ചേര്ന്നാണു ഡല്ഹിയില് പോയത്. ഇവര് ഡല്ഹിയില് നിസാമുദീനില് ബംഗ്ലാവാലി മസ്ജിദില് താമസിക്കുകയാണ്. ഇവര് നിരീക്ഷണത്തിലാണെന്ന് ആരോഗ്യവകുപ്പ് അധികൃതര് വ്യക്തമാക്കി.
നിസാമുദ്ദീന് ദര്ഗയ്ക്കു സമീപത്തെ മസ്ജിദില് ഈ മാസം 18ന് ആയിരുന്നു തബ്ലീഗ് ജമാഅത്ത് ഏഷ്യ സമ്മേളനം. അനുമതിയില്ലാതെയാണു സമ്മേളനം നടത്തിയതെന്നാണു ഡല്ഹി പൊലീസ് പറയുന്നത്.കോവിഡ് ബാധ സ്ഥിരീകരിച്ചതോടെ പ്രദേശത്തു ലോക്ഡൗണ് കര്ശനമാക്കി; കൂടുതല് പൊലീസിനെ നിയോഗിച്ചു. ആയിരങ്ങള് തിങ്ങി ഞെരുങ്ങി താമസിക്കുന്ന നിസാമുദ്ദീന് മേഖലയില് രോഗം കണ്ടത് ആശങ്ക സൃഷ്ടിച്ചിട്ടുണ്ട്. രാജ്യത്തിന്റെ വിവിധ ഭാഗങ്ങളില്നിന്നും സൗദി അറേബ്യ, മലേഷ്യ, ഇന്തൊനീഷ്യ, തായ്ലന്ഡ് തുടങ്ങിയ വിദേശ രാജ്യങ്ങളില്നിന്നും പ്രതിനിധികള് സമ്മേളനത്തിനെത്തിയിരുന്നു.
"
https://www.facebook.com/Malayalivartha