നടുവിൽ മഠം ഇളമുറ സ്വാമിയാർ ശ്രീമദ് പാർത്ഥസാരഥി ഭാരതി സ്വാമികൾ സമാധിയായി. ഭാഗവത വഴിയിലൂടെയാണ് മാടശ്ശേരി നീലകണ്ഠൻ നമ്പൂതിരി സന്യാസം സ്വീകരിച്ചത്.

പാർത്ഥസാരഥി ഭാരതി സ്വാമികൾ എന്ന പേരിൽ നടുവിൽ മഠത്തിൽ സന്യാസം ജീവിതം ആരംഭിച്ചു. തൃശ്ശൂർ നടുവിൽ മഠത്തിലെയും തിരുവനന്തപുരം മിത്രാനന്ദപുരത്ത് പടിഞ്ഞാറെ മഠത്തിലെയും തൃച്ചംബരം തെക്കേ മഠത്തിലെയും മഠാധിപതിയും പാരമ്പര്യ ട്രസ്റ്റിയും ആയിരുന്ന മറവഞ്ചേരി തെക്കേടത്ത് നീലകണ്ഠ ഭാരതികളുടെ അനുഗ്രഹത്തോടെയും ഇളമുറ സ്വാമിയാർ അച്യുത ഭാരതികളുടെ ആശീർവാദത്തോടെയുമാണ് സന്യാസ ജീവിതം ആരംഭിച്ചത്. നടുവിൽ മഠത്തിലെ ഇളമറ സ്വാമിയാരായി 2025 ജൂലൈ ഏഴാം തീയതി സന്യാസ ജീവിതം തുടങ്ങി.

എറണാകുളം ജില്ലയിലെ കോതമംഗലം താലൂക്കിലെ കറു കിടത്തിൽ മാടശ്ശേരി ഇല്ലത്തെ ദാമോദരൻ നമ്പൂതിരിയുടെയും സാവിത്രി അന്തർജ്ജനത്തിന്റെയും പുത്രനായി 1953ലാണ് നീലകണ്ഠൻ നമ്പൂതിരിയുടെ ജനനം. ഭക്തിയുടെ വഴിതുറപ്പിച്ചത് അമ്മയാണ്. ഗുരുവായൂർ തട്ടയൂർ ഇല്ലത്ത് ഭാഗവത പ്രവചന തിലകം ഉണ്ണി നമ്പൂതിരിപ്പാടിന്റെ ശിഷ്യത്വം സ്വീകരിച്ച് 1983 മുതലാണ് സപ്താഹങ്ങൾ നടത്തിത്തുടങ്ങിയത്.

കഴിഞ്ഞ കുറച്ചു ദിവസങ്ങളായി ഒരു സ്‌ട്രോക്ക് അനുഭവപ്പെട്ടതിനെ തുടർന്ന് അബോധാവസ്ഥയിൽ തൃശ്ശൂരിലെ സ്വകാര്യ ആശുപത്രിയിൽ ചികിത്സയിലായിരുന്ന പാർത്ഥസാരഥി ഭാരതി സ്വാമികൾ ഇന്നലെ രാത്രി 9 നാണ് ഭഗവത്പാദങ്ങളിലേക്ക് സ്വയം വിലയം പ്രാപിച്ചത്. സംസ്‌കാര ചടങ്ങുകൾ ഇന്ന് രാവിലെ നടത്തും. അദ്ദേഹത്തിന്റെ സഹോദരി ഹരിപ്രിയയും ഭാഗവതത്തിന്റെയും ആധ്യാത്മികതയുടെയും പാതയിലാണുള്ളത്.