കൊവിഡ് -19 വ്യാപനം തടയുന്നതിന് ഇന്ത്യയ്ക്ക് ലോകബാങ്ക് 100 കോടി ഡോളര്‍ (7631.16 കോടി രൂപ) ധനസഹായം നല്‍കും. ദക്ഷിണേഷ്യയില്‍ ഏറ്റവും കൂടുതല്‍ സാമ്ബത്തിക സഹായം ലഭിച്ചിരിക്കുന്നത്. ഇന്ത്യയ്ക്കാണ്

പാകിസ്ഥാന് 20 കോടി, അഫ്ഗാനിസ്ഥാന് 10 കോടി, ശ്രീലങ്കയ്‍ക്ക് 12.86 കോടി, മാലദ്വീപിന് 73 ലക്ഷം (ഡോളര്‍ കണക്ക്) എന്നിങ്ങനെയാണ് അനുവദിച്ചിട്ടുള്ളത്.

രോഗബാധിതരെയും അവരുമായി സമ്ബര്‍ക്കം പുലര്‍ത്തിയവരെയും കണ്ടെത്തി നിരീക്ഷണത്തിലാക്കുക, ലബോറട്ടറി സൗകര്യങ്ങള്‍ വര്‍ദ്ധിപ്പിക്കുക, ഐസൊലേഷന്‍ വാര്‍ഡുകള്‍ ക്രമീകരിക്കുക, ആരോഗ്യപ്രവര്‍ത്തകര്‍ക്കുള്ള സുരക്ഷാ വസ്ത്രങ്ങള്‍ സംഭരിക്കുക എന്നീ ആവശ്യങ്ങള്‍ക്കായാണ് സഹായം അനുവദിച്ചിരിക്കുന്നത്.

25 രാജ്യങ്ങള്‍ക്കായി 190 കോടി ഡോളറിന്റെ പദ്ധതിയാണ് തയ്യാറാക്കിയിരുന്നതെങ്കിലും പിന്നീടതില്‍ 20 രാജ്യങ്ങളെ കൂടി ഉള്‍പ്പെടുത്തി. അടുത്ത 15 മാസത്തിനുള്ളില്‍ വൈറസ് വ്യാപനത്തിനെതിരായ പ്രവര്‍ത്തനങ്ങള്‍ക്കായി വിവിധ രാജ്യങ്ങള്‍ക്ക് ഗ്രാന്റ് അനുവദിക്കാനുള്ള നടപടികള്‍ ലോകബാങ്കിന്റെ ഭാഗത്തുനിന്നുണ്ടാകും. 1600 കോടി ഡോളറിന്റെ സാമ്ബത്തിക പാക്കേജ് തയ്യാറായിട്ടുണ്ട്.

രോഗമുക്തരാകുന്നതിനുള്ള സമയം കുറയ്‍ക്കുക, രാജ്യങ്ങളുടെ വളര്‍ച്ചയെ ത്വരിതപ്പെടുത്തുക, ചെറുകിട- ഇടത്തരം സംരംഭങ്ങളെ സഹായിക്കുക, വൈറസ് വ്യാപനത്തിന്റെ ആഘാതം ഏറ്റവും കൂടുതല്‍ ബാധിക്കുന്ന സാധാരണക്കാരും ദരിദ്രരുമായവരെ സഹായിക്കുക എന്നിവയാണ് സാമ്ബത്തിക പാക്കേജിന്റെ ലക്ഷ്യങ്ങള്‍.

വികസ്വര രാജ്യങ്ങളെ കൊവിഡില്‍ നിന്ന് കരകയറാന്‍ സഹായിക്കുക എന്നതാണ് തങ്ങളുടെ ലക്ഷ്യമെന്നും ഇത്തരം രാജ്യങ്ങളെ സഹായിക്കാന്‍ മറ്റ് ഏജന്‍സികളെയും സന്നദ്ധ സംഘടനകളെയും പ്രേരിപ്പിക്കുമെന്നും ലോകബാങ്ക് വ്യക്തമാക്കി.

ലോകത്തെ കൊറോണ ബാധിതരുടെ എണ്ണം 1,027,156 ആയി. 54,028 പേര്‍ക്ക് ജീവന്‍ നഷ്ടമായി. 209,981 പേര്‍ രോഗമുക്തി തേടി. നിലവില്‍ ഏറ്റവും കൂടുതല്‍ കൊറോണ വൈറസ് ബാധിതരുള്ളത് അമേരിക്കയിലാണ്. 2,45,573 പേര്‍ക്കാണ് അമേരിക്കയില്‍ കൊറോണ സ്ഥിരീകരിച്ചത്. 6,058 പേര്‍ക്ക് ജീവന്‍ നഷ്ടമാവുകയും ചെയ്തു. കൊറോണ ബാധിതരുടെ എണ്ണത്തില്‍ അമേരിക്കയ്ക്കു പിന്നില്‍ സ്‌പെയിനാണ്. 1,17,710 പേര്‍ക്കാണ് സ്‌പെയിനില്‍ കൊറോണ സ്ഥിരീകരിച്ചത്. 10,935 പേര്‍ക്കാണ് ഇവിടെ ജീവന്‍ നഷ്ടമായത്. ഇറ്റലിയില്‍ 1,15,242 പേര്‍ക്ക് കൊറോണ സ്ഥിരീകരിച്ചു. 13,915 പേരാണ് മരിച്ചത്.