മലപ്പുറം ജില്ലയില്‍ കീഴാറ്റൂരില്‍ കൊവിഡ് ബാധിതനായ എണ്‍പത്തിയഞ്ചുകാരന്റെ മകന്‍ നിരീക്ഷണത്തില്‍ കഴിയണമെന്ന നിര്‍ദ്ദേശം ലംഘിച്ചത് ആരോഗ്യ വകപ്പിനെ വട്ടംകറക്കി സമ്പര്‍ക്കത്തിലേര്‍ക്കെട്ടത് 200ത്തോളം ആളുകളുനായാണെന്ന് ആരോഗ്യ അധികൃതര്‍ വ്യക്തമാക്കി. ആരോഗ്യ വകുപ്പുമായി സഹകരിക്കാത്തതിനാല്‍ ഇയാളുടെ സഞ്ചാര പാത കണ്ടെത്താന്‍ കീഴാറ്റൂരില്‍ ജനകീയ സര്‍വേ നടത്താനുള്ള തീരുമാനത്തിലാണ് അധികൃതര്‍. നിരീക്ഷണത്തില്‍ കഴിയണമെന്ന നിര്‍ദ്ദേശം ലംഘിച്ചതില്‍ ഇയാള്‍ക്കെതിരെ പൊലീസ് കേസെടുത്തിട്ടുണ്ട്.

ഇയാള്‍ക്കെതിരെ കേസെടുക്കാനാണ് സര്‍ക്കാരിന്റെ തീരുമാനമെന്ന് മന്ത്രി കെ.ടി ജലീല്‍ മലപ്പുറത്ത് മാധ്യമപ്രവര്‍ത്തകരോട് പറഞ്ഞു. മാര്‍ച്ച് 11 ന് സൗദി അറേബ്യയില്‍ നിന്ന് ഉംറ കഴിഞ്ഞ് നാട്ടില്‍ മടങ്ങിയെത്തിയ ഇയാളോട് പുറത്തിറങ്ങരുതെന്ന് അധികൃതര്‍ നിര്‍ദ്ദേശിച്ചിരുന്നു. പതിമൂന്നാം തീയതി മുതല്‍ സമ്പൂര്‍ണ്ണ വിലക്കില്‍ തുടരണമെന്ന് ആരോഗ്യ വകുപ്പ് വീണ്ടും കര്‍ശന നിര്‍ദേശം നല്‍കി. എന്നാല്‍ ഇതിനൊന്നും തെല്ലും വില കൊടുക്കാതെയായിരുന്നു പ്രവൃത്തികള്‍.

വീട്ടില്‍ നിന്നും 20 കിലോമീറ്റര്‍ അകലെ മഞ്ചേരിക്കടുത്ത് ആനക്കയത്ത് 180 ലേറെ പേര്‍ പങ്കെടുത്ത ഒരു മത ചടങ്ങില്‍ നാല്പതുകാരനും ഉണ്ടായിരുന്നു. ജില്ലയിലെ വിവിധ ഭാഗങ്ങളില്‍ നിന്നുളളവര്‍ ഈ പരിപാടിക്ക് എത്തിയിരുന്നു. തുടര്‍ന്നും ഇയാള്‍ വിലക്ക് ലംഘിച്ച് നിരവധി സ്ഥലങ്ങളില്‍ പോയി. നിരവധി ആളുകളുമായി അടുത്ത് ഇടപഴകിയെന്ന് മന്ത്രി പറഞ്ഞു. ഇതില്‍ 85 കാരനായ പിതാവിന് മാത്രമാണ് ഇപ്പൊള്‍ അസുഖം സ്ഥിരീകരിച്ചിട്ടുള്ളത്.

ഇദ്ദേഹം പ്രദേശത്തെ പ്രമുഖ മന്ത്ര ചികിത്സകനാണ് . ഇക്കാലയളവില്‍ നിരവധി പേര്‍ ഇദ്ദേഹത്തെ കാണാന്‍ വന്നിട്ടുണ്ട്. അവരോടെല്ലാം ചികിത്സ തേടാനാണ് അധികൃതരുടെ നിര്‍ദേശം. കീഴാറ്റൂര്‍ പഞ്ചായത്തില്‍ സാഹചര്യങ്ങള്‍ അതീവ ഗൗരവമായതിനാല്‍ മേഖലയില്‍ സാമ്പിള്‍ ടെസ്റ്റ് നടത്താനും തീരുമാനം ഉണ്ട്. ഈ ഫലങ്ങള്‍ വന്നതിന് ശേഷമാകും തുടര്‍ നടപടികള്‍ തീരുമാനിക്കുക.

രോഗവാഹകനായ നാല്പതുകാരന്‍ ഇപ്പൊള്‍ മഞ്ചേരി മെഡിക്കല്‍ കോളജ് ആശുപത്രിയിലാണുള്ളത്. ഇയാളുടെ റൂട്ട് മാപ്പ് തയ്യാറാക്കല്‍ ശ്രമകരമാണെന്ന് അധികൃതര്‍ സമ്മതിക്കുന്നു. ജില്ലയില്‍ നിരവധി സ്ഥലങ്ങളില്‍ ഇയാള്‍ പോയതായാണ് വിവരം. ഇതുവരെ നിയന്ത്രണ വിധേയമായിരുന്ന ജില്ലയിലെ കോവിഡ് വ്യാപന സാധ്യതകള്‍ ഈ ഒരു സംഭവം കൊണ്ട് അതീവ തീവ്രമാവുകയാണ്.