പേഴ്സനല് സാനിറ്റൈസേഷന് എന്ക്ലോഷറുമായി ഡിആര്ഡിഒ
പ്രതിരോധ ഗവേഷണ, വികസന കേന്ദ്രം (ഡിആര്ഡിഒ) കൊറോണ വൈറസിനെ തുരത്തുന്നതിന്റെ ഭാഗമായി ജനങ്ങളെ അണുവിമുക്തമാക്കുന്നതിനുള്ള പുതിയ സംവിധാനമൊരുക്കി. പേഴ്സനല് സാനിറ്റൈസേഷന് എന്ക്ലോഷര് (പിഎസ്ഇ) എന്നു പേരിട്ടിരിക്കുന്ന താല്ക്കാലിക മുറിയാണ് അണുനശീകരണ പ്രക്രിയ നടത്തുക. മുറിയില് പ്രവേശിച്ചാലുടന് കാല്ക്കീഴിലുള്ള പെഡലില് ചവിട്ടുമ്പോള് പ്രക്രിയ ആരംഭിക്കും.
ഹൈപ്പോ സോഡിയം ക്ലോറൈഡ് മിശ്രിതം വ്യക്തിക്കു മേല് ഇലക്ട്രിക് മോര്ട്ടര് വഴി സ്പ്രേ ചെയ്യും. 25 സെക്കന്ഡ് നീളുന്ന പ്രക്രിയയില് കണ്ണടച്ചു വേണം മുറിയില് നില്ക്കാന്. അതിനൊടുവില് അണുവിമുക്തമായി വ്യക്തിക്കു പുറത്തിറങ്ങാം. 700 ലീറ്റര് സംഭരണശേഷിയുള്ള ടാങ്കിലാണ് സോഡിയം ക്ലോറൈഡ് സൂക്ഷിച്ചിരിക്കുന്നത്. ഒരു തവണ നിറച്ചാല് 650 പേരെ അണുവിമുക്തമാക്കാന് ഇതിലൂടെ സാധിക്കും.
രാജ്യത്തുടനീളം കോവിഡ് പടര്ന്നുപിടിച്ച സ്ഥലങ്ങള്, ആശുപത്രി കവാടങ്ങള് എന്നിവിടങ്ങളില് ലഭ്യമാക്കുന്നതിന് വരും ദിവസങ്ങളില് അവ വ്യാപകമായി നിര്മിക്കാനാണു ഡിആര്ഡിഒ പദ്ധതി.
ഉന്നത നിലവാരമുള്ള ലാബുകളുള്ളതിനാല് ഡിആര്ഡിഒയെ ഗവേഷണത്തിന്റെ ഭാഗമാക്കാന് സര്ക്കാര് തീരുമാനിച്ചതിനെ തുടര്ന്ന് രോഗം തടയുന്നതിനു മരുന്ന് കണ്ടുപിടിക്കുന്നതുള്പ്പെടെയുള്ള ഗവേഷണ പ്രവര്ത്തനങ്ങള്ക്ക് ഡിആര്ഡിഒ തുടക്കമിട്ടിട്ടുണ്ട്. പുണെയിലെ വൈറോളജി ഇന്സ്റ്റിറ്റ്യൂട്ടില് നിന്നുള്ള സാംപിളുകള് ഡിആര്ഡിഒയ്ക്കു ലഭ്യമാക്കും. നാഷനല് സെന്റര് ഫോര് ഡിസീസ് കണ്ട്രോളിന്റെ (എന്സിഡിസി) മാനദണ്ഡങ്ങള് പാലിച്ചായിരിക്കും ഗവേഷണം. ആദ്യ ഘട്ടത്തില് ബെംഗളൂരു, മധ്യപ്രദേശിലെ ഗ്വാളിയര് എന്നിവിടങ്ങളിലെ ലാബുകളിലാണു ഗവേഷണങ്ങള് നടക്കുക. വരും ദിവസങ്ങളില് രാജ്യത്തെ വിവിധയിടങ്ങളിലുള്ള ലാബുകളിലേക്കും ഇതു വ്യാപിപ്പിക്കും.
ഡിആര്ഡിഒയ്ക്കു കീഴില് ഗ്വാളിയറിലുള്ള ഡിഫന്സ് റിസര്ച്ച് ആന്ഡ് ഡവലപ്മെന്റ് എസ്റ്റാബ്ലിഷ്മെന്റ് (ഡിആര്ഡിഇ) ആണു ഗവേഷണങ്ങള്ക്കു നേതൃത്വം നല്കുന്നത്. ഉന്നത നിലവാരമുള്ള ഹാന്ഡ് സാനിറ്റൈസറുകളുടെ നിര്മാണച്ചുമതല കൂടി, ശത്രു സേനയുടെ രാസ, ജൈവ ആക്രമണങ്ങള്ക്കെതിരായ പ്രതിരോധ മാര്ഗങ്ങള്ക്കു രൂപം നല്കാന് സ്ഥാപിച്ച ഈ കേന്ദ്രത്തെ ഇപ്പോള് ഏല്പിച്ചിട്ടുണ്ട്.
https://www.facebook.com/Malayalivartha
