സമൂഹ്യവ്യാപനം തടയാന് പിടിമുറുക്കണം: 8 സംസ്ഥാനങ്ങളോട് കേന്ദ്രം; സമൂഹവ്യാപനം കണ്ടെത്തുന്ന സാഹചര്യമുണ്ടായാല് രോഗത്തിന്റെ പ്രഭവകേന്ദ്രം അടങ്ങുന്ന മേഖല പൂര്ണമായി ലോക്ക് ചെയ്യണം; കേന്ദ്ര നിര്ദേശങ്ങള് ഇങ്ങനെ
ഓരോ രാജ്യങ്ങള് ഈ അകടത്തില് മരണനിരക്കും രോഗബാധയും തടയാന് ഊര്ജ്ജിതമായ ശ്രമം നടത്തുമ്പോള് ഇന്ത്യയെ സംബന്ധിച്ച് രോഗ ബാധിതരുടെ എണ്ണം ദിവസംതോറും കൂടുകയാണ് അതിനാല് തന്നെ. കേരളം ഉള്പ്പെടെ 8 സംസ്ഥാനങ്ങളിലും ലഡാക്കിലും കോവിഡ് സമൂഹവ്യാപനം തടയാന് ഊര്ജിത നടപടി വേണമെന്നാണ് ഇപ്പോള് കേന്ദ്രം നിര്ദേശിച്ചിരിക്കുന്നത്. മഹാരാഷ്ട്ര, ഡല്ഹി, തമിഴ്നാട്, രാജസ്ഥാന്, ഉത്തര്പ്രദേശ്, കര്ണാടക, തെലങ്കാന എന്നിവയാണ് പട്ടികയിലുള്ള മറ്റു സംസ്ഥാനങ്ങള്. വീടുവീടാന്തരമുള്ള സ്ക്രീനിങ്, ദ്രുത പരിശോധന (റാന്ഡം ടെസ്റ്റിങ്), ഈ സംസ്ഥാനങ്ങള്ക്കിടയിലെ യാത്രയില് പൂര്ണ നിയന്ത്രണം എന്നിവ കൂടുതല് കര്ശനമാക്കാനാണു കേന്ദ്ര ശുപാര്ശ. സമൂഹവ്യാപനം കണ്ടെത്തുന്ന സാഹചര്യമുണ്ടായാല് രോഗത്തിന്റെ പ്രഭവകേന്ദ്രം അടങ്ങുന്ന മേഖല പൂര്ണമായി ക്വാറന്റീനിലാക്കണം.
നിലവിലെ സാഹചര്യം വലിയതോതിലുള്ള വൈറസ് വ്യാപനത്തിനു വഴിവച്ചേക്കുമെന്നു വ്യക്തമാക്കിയ കേന്ദ്ര ആരോഗ്യമന്ത്രാലയം ഓരോ സ്ഥലത്തും വ്യത്യസ്ത സമീപനം വേണമെന്നു നിര്ദേശിച്ചു. എന്നാല്, നിയന്ത്രണാതീതമായ സ്ഥിതിയിലേക്ക് രാജ്യം ഇപ്പോഴും നീങ്ങിയിട്ടില്ല. വലിയ വൈറസ് വ്യാപനത്തിനുള്ള സാധ്യത രാജ്യത്തെല്ലായിടത്തും ഒരുപോലെയല്ല. പ്രായമാവരെ കൂടുതലായി രോഗം ബാധിച്ചിട്ടില്ലെന്നത്, ഇന്ത്യയില് ഇപ്പോഴും സമൂഹവ്യാപനത്തിന്റെ തലത്തിലേക്കു പോയിട്ടില്ലെന്നതിന്റെ തെളിവായി ചൂണ്ടിക്കാണിക്കപ്പെടുന്നു. നിലവില് 211 ജില്ലകളെയാണ് കോവിഡ് ബാധിച്ചിരിക്കുന്നത്. ഇതു കൂടുതല് ജില്ലകളിലേക്കു പടരുന്നത് അപകടകരമാണെന്നും കേന്ദ്രം ഓര്മിപ്പിക്കുന്നു. പൂര്ണാരോഗ്യമുള്ളവരും പുറത്തിറങ്ങുമ്പോള് വീട്ടിലുണ്ടാക്കാവുന്നതരം മുഖാവരണം ധരിക്കണമെന്ന് കേന്ദ്ര ആരോഗ്യമന്ത്രാലയം. ആരോഗ്യപ്രവര്ത്തകര്, ഏതെങ്കിലും രോഗലക്ഷണമുള്ളവര്, രോഗം സ്ഥിരീകരിച്ചവരുമായോ ലക്ഷണമുള്ളവരുമായോ അടുത്തിടപഴകുന്നവര് എന്നിവര് മാത്രമേ മെഡിക്കല് മാസ്ക് ധരിക്കേണ്ടതുള്ളൂ.
എന്നാല്, വീട്ടില് പാഴ്തുണി കൊണ്ടുണ്ടാക്കാവുന്ന മുഖാവരണം വ്യക്തി ശുചിത്വത്തിന്റെ ഭാഗമാക്കണമെന്നാണ് പുതിയ നിര്ദേശം. പ്രത്യേകിച്ചും ജനങ്ങള് തിങ്ങിപ്പാര്ക്കുന്ന സ്ഥലങ്ങളില്. ഇത്തരത്തില് വീട്ടിലുണ്ടാക്കി ഒരാള് ഉപയോഗിക്കുന്ന മുഖാവരണം കൈമാറരുത്. രണ്ടെണ്ണമെങ്കിലും ഒരാള് കരുതണം. സോപ്പും ചൂടുവെള്ളവും ഉപയോഗിച്ചു വൃത്തിയായി കഴുകി വേണം ഓരോ തവണയും ഉപയോഗിക്കാന്. ആരോഗ്യമന്ത്രാലയം വ്യക്തമാക്കി. രോഗികളെ ശുശ്രൂഷിക്കുന്നുണ്ടെങ്കില് മാത്രം, പൂര്ണാരോഗ്യമുള്ളവര് മാസ്ക് ധരിച്ചാല് മതിയെന്ന നിര്ദേശമാണ് ലോകാരോഗ്യ സംഘടന നല്കുന്നത്.
അതേസമയം കോവിഡ് സൃഷ്ടിച്ച ഇരുട്ടിനെ വെളിച്ചത്തിന്റെ ശക്തികൊണ്ടു നേരിടാന് രാത്രി 9 മണിക്ക് 9 മിനിറ്റ് നേരം വീട്ടിലെ ലൈറ്റണച്ച്, മെഴുകുതിരിയോ ചെരാതോ ടോര്ച്ചോ മൊബൈല് ഫ്ലാഷോ തെളിക്കണമെന്നാണ് പ്രധാനമന്ത്രി ആഹ്വാനം ചെയ്തത്. ഇതിനായി ആരും വീടിനു പുറത്തിറങ്ങരുത്. വീടിന്റെ വാതില്ക്കലോ ബാല്ക്കണയിലോ നിന്ന് ദീപം തെളിക്കണം. സാമൂഹിക അകലം പാലിക്കണം. രാജ്യത്തെ 130 കോടി ജനത്തെക്കുറിച്ചു മനസ്സില് ധ്യാനിക്കണം.
https://www.facebook.com/Malayalivartha