ദീപം തെളിയിക്കലിന്​ പിന്തുണ അറിയിച്ച നടന്‍ മമ്മുട്ടിക്ക്​ നന്ദി പറഞ്ഞ്​ ​പ്രധാനമന്ത്രി നരേന്ദ്ര മോദി രംഗത്ത്. കഴിഞ്ഞദിവസമാണ്​ മമ്മുട്ടി ട്വിറ്ററില്‍ വീഡ​ിയോ പോസ്​റ്റ്​ ചെയ്​തത്​. കോവിഡെന്ന മഹാവിപത്തിനെതിരെ നമ്മുടെ നാട്​ ഒറ്റക്കെട്ടായി പോരാടുന്ന സമയത്ത്​ പ്രധാനമന്ത്രിയുടെ അഭ്യര്‍ഥന പ്രകാരം ഏപ്രില്‍ അഞ്ചിന്​ രാത്രി ഒമ്ബത്​ മുതല്‍​ ഒമ്ബത്​ മിനുറ്റ്​ വരെ അവരവരുടെ വീടുകളില്‍ തെളിയിക്കുന്ന ഐക്യദീപത്തിന്​ എല്ലാവിധ പിന്തുണയും ആശംസയുമെന്നായിരുന്നു മമ്മൂട്ടിയുടെ വാക്കുകള്‍. ഐക്യത്തി​​​െന്‍റ സാഹോദരത്തി​​​െന്‍റയും ഈ മഹാസംരംഭത്തില്‍ എല്ലാവരു​ം പങ്കാളികളാകണമെന്നും അദ്ദേഹം അഭ്യര്‍ഥിച്ചിരുന്നു.

മമ്മുട്ടിയുടെ ഈ വീഡിയോക്ക്​ ട്വിറ്ററിലൂടെ​ മോദി നന്ദി അറിയിക്കുകയാണയിരുന്നു​. 'നന്ദി മമ്മൂക്ക, കോവിഡ്​ 19നെതിരായ പോരാട്ടത്തില്‍ നമ്മുടെ രാജ്യത്തിന് വേണ്ടത് നിങ്ങളുടേതുപോലുള്ള ഐക്യത്തിനും സാഹോദര്യത്തിനും വേണ്ടിയുള്ള ഹൃദയംഗമമായ ആഹ്വാനമാണ്​ '​ എന്ന് മോദി പറഞ്ഞു.

സംവിധായകന്‍ കരണ്‍ ജോഹര്‍, നടന്‍ അനില്‍ കപൂര്‍, രാംചരണ്‍, മാതാ അമൃതാനന്ദമയി, ക്രിക്കറ്റ്​ താരം കെ.എല്‍. രാഹുല്‍ തുടങ്ങി നിരവധി പേര്‍ക്ക്​ പിന്തുണ അറിയിച്ചതിന്​ പ്രധാനമന്ത്രി നന്ദി പ്രകാശിപ്പിച്ചു.

മലയാളത്തിന്റെ പ്രിയ താരം മോഹൻലാലും പ്രധാനമന്ത്രിക്ക് പിന്തുണ അറിയിച്ചിരുന്നു. പ്രധാനമന്ത്രി ആഹ്വാനം ചെയ്ത ഒരുമയുടെ ദീപം എല്ലാവരും തെളിയിക്കണമെന്ന് മോഹന്‍ലാല്‍ ഫേസ്ബുക്ക് വീഡിയോയിലൂടെ പറഞ്ഞു.

'ഇന്ത്യന്‍ ജനത കൊവിഡിനെതിരെയുള്ള നിശബ്ദ യുദ്ധത്തിലാണ്. ഇതുവരെ കാണാത്ത ശത്രുവിനെതിരെയുള്ള പോരാട്ടത്തിന്റെ ഭാഗമായി രാജ്യം മുഴുവന്‍ ലോക്ക് ഡൗണിലാണ്. ഇന്ന് രാത്രി ഒമ്ബത് മണിക്ക് ഒമ്ബത് മിനിറ്റ് എല്ലാവരും ആത്മാവിനെ ഉജ്ജ്വലിപ്പിക്കാനായി വിളക്ക് കത്തിക്കല്‍ ക്യാമ്ബയിന്‍ നടക്കുകയാണ്. വീടുകളില്‍ എല്ലാവരും വിളക്കുകള്‍ തെളിയ്‌ക്കൂ. ആ പ്രകാശം പ്രതീക്ഷയുടെയും ഒരുമയുടെയും ദീപസ്തംഭമാകട്ടെ. ആ വെളിച്ചം നമ്മുടെ മനക്കരുത്തിന്റെ പ്രതീകമാകട്ടെ . ഇന്ത്യക്കാരുടെ ഈ ഒത്തുചേരലിന് എല്ലാവിധ ആശംസകളും. ലോകസമസ്ത സുഖിനോ ഭവന്തു'-മോഹന്‍ലാല്‍ പറഞ്ഞു.

രാത്രി 9മണിക്ക് എല്ലാവരും വീടുകളിലെ വെളിച്ചം അണയ്‌ക്കണം. വാതിലിന് മുന്നിലോ ബാല്‍ക്കണിയിലോ നിന്ന് ചെരാതുകള്‍, മെഴുകുതിരി, ടോര്‍ച്ച്‌, മൊബൈല്‍ ഫോണ്‍ ലൈറ്റ് തുടങ്ങിയവ 9 മിനിട്ട് പ്രകാശിപ്പിക്കുക. ആ വെളിച്ചത്തില്‍ 130 കോടി ഇന്ത്യക്കാര്‍ നിശ്‌ചദാര്‍ഢ്യത്താല്‍ ബന്ധിതമാകുന്നു. ദീപം കൊളുത്താന്‍ ആരും കൂട്ടം കൂടരുത്. റോഡിലും തെരുവിലും ഇറങ്ങരുത്. സമൂഹ അകലം എന്ന ലക്ഷ്‌മണ രേഖ കടക്കരുത്. കൊറോണയെ ചെറുക്കാനുള്ള ഏറ്റവുംവലിയ വഴിയാണ് സമൂഹ അകലം പാലിക്കല്‍. പ്രധാനമന്ത്രി നരേന്ദ്ര മോദി പറഞ്ഞിരുന്നു. മോദിയുടെ ആഹ്വാനത്തെ വിമര്‍ശിച്ചും അനുകൂലിച്ചും നേരത്തെ രാഷ്ട്രീയപാര്‍ട്ടികള്‍ രംഗത്തെത്തിയിരുന്നു.