ലോകമാകെ പരിഗണിച്ചാല്‍ പ്രതിദിനം പുതുതായി റിപ്പോര്‍ട്ട് ചെയ്യപ്പെട്ട കേസുകളുടെ എണ്ണത്തിലും മരണസംഖ്യയിലും നേരിയ കുറവുണ്ട്. കഴിഞ്ഞ ദവിസം മാത്രം റിപ്പോര്‍ട്ട് ചെയ്യപ്പെട്ടത് 71,000 ലധികം കേസുകളും 4,750 ഓളം മരണങ്ങളുമാണ്. ഇതുവരെ ആകെ 12,73,000 ഓളം കേസുകളില്‍ നിന്ന് 69,000 ലധികം മരണങ്ങള്‍. അമേരിക്കയില്‍ ഇന്നലെ 25,000 ലധികം കേസുകളും ആയിരത്തിലധികം മരണങ്ങളും റിപ്പോര്‍ട്ട് ചെയ്തു. കഴിഞ്ഞ ദിവസങ്ങളുമായി താരതമ്യം ചെയ്താല്‍ പുതുതായി റിപ്പോര്‍ട്ട് ചെയ്യപ്പെടുന്ന കേസുകളുടെ എണ്ണത്തില്‍ കുറവുണ്ട്. ഇതുവരെ ആകെ 3,36,000 ലധികം കേസുകളില്‍ നിന്ന് 9,600 ലധികം മരണങ്ങളാണ് ഇവിടെ ഉണ്ടായത്. എന്നാല്‍ ഇംഗ്ലണ്ടില്‍ പുതിയ കേസുകളും മരണങ്ങളും കൂടുകയാണ്. ഇന്നലെ മാത്രം ആറായിരത്തോളം കേസുകളും അറുനൂറിലധികം മരണങ്ങളും. ഇതുവരെ ആകെ 48000ത്തോളം കേസുകളില്‍നിന്ന് 5000ത്തോളം മരണങ്ങള്‍.

ഇതിനടെ, ഇന്ത്യയില്‍ ആകെ രോഗികളുടെ എണ്ണം 4200 ന് മുകളിലായി. ഇന്നലെ മാത്രം റിപ്പോര്‍ട്ട് ചെയ്യപ്പെട്ടത് അറുനൂറിലധികം പുതിയ രോഗികള്‍. ഇത്രയും അധികം രോഗികള്‍ ഒരു ദിവസം റിപ്പോര്‍ട്ട് ചെയ്യപ്പെടുന്നത് ഇതാദ്യം. ഇന്നലെ മാത്രം ഇരുപതിലധികം മരണങ്ങള്‍. ഇതുവരെ മരിച്ചത് 120 ഓളം പേര്‍ എന്നാണ് അനൗദ്യോഗിക റിപ്പോര്‍ട്ട്. അതേസമയം, ഇന്ത്യയില്‍ ആദ്യത്തെ 500 രോഗികളിലേക്കെത്താന്‍ 55 ദിവസമെടുത്തു. അടുത്ത അഞ്ചു ദിവസം കൊണ്ടത് ആയിരമായി. തുടര്‍ന്നുള്ള നാല് ദിവസം കൊണ്ട് 2000 കടന്നു. 2000 ല്‍ നിന്ന് 4000 എത്താന്‍ പിന്നെ മൂന്നു ദിവസം മാത്രമാണ് എടുത്തത്.

ചില സംസ്ഥാനങ്ങളില്‍, നിസാമുദ്ദീന്‍ സംഭവത്തിനു ശേഷമുണ്ടായ കേസുകളുടെ വര്‍ധനവ് ആശങ്കാജനകമാണ്. മഹാരാഷ്ട്ര, തമിഴ്‌നാട്, ഡല്‍ഹി, തെലങ്കാന, രാജസ്ഥാന്‍, ആന്ധ്രാ പ്രദേശ് എന്നിവിടങ്ങളില്‍ ടെസ്റ്റുകളുടെ എണ്ണം അധികം കൂട്ടാതെ തന്നെ രോഗികളുടെ എണ്ണം കൂടുന്ന സ്ഥിതിവിശേഷമാണുള്ളത്. ഈ സംസ്ഥാനങ്ങളില്‍ സമൂഹവ്യാപനം നടന്നിട്ടുണ്ടാകാനുള്ള സാധ്യത വളരെ കൂടുതലാണ്. നിലവില്‍ വ്യാപകമായി ടെസ്റ്റുകള്‍ നടത്താതെ സമൂഹ വ്യാപനം ഇല്ല എന്ന് ആവര്‍ത്തിക്കുന്നതില്‍ വലിയ കഴമ്പില്ല എന്നാണ് ആരോഗ്യ രംഗത്തെ വിദഗ്ധരുടെ വിലയിരുത്തല്‍.

അതേ സമയം കേരളത്തില്‍ സമൂഹവും അധികാരികളും കാണിച്ച സംയമനവും പ്രയത്‌നവും രോഗ വ്യാപനം കുറയ്ക്കുന്നതില്‍ നമ്മെ സഹായിച്ചു എന്ന് അനുമാനിക്കാവുന്ന നിലയ്ക്കാണ് സൂചനകള്‍. ഇവിടെ മറ്റുള്ള ഇടങ്ങളേക്കാള്‍ കൂടുതല്‍ ടെസ്റ്റുകള്‍ നടന്നിട്ടുണ്ടെന്നതെങ്കിലും ആശാവഹമായ കാര്യമാണ്. കേരളത്തില്‍ ഇന്നലെ 8 പുതിയ രോഗികളാണ് ഉണ്ടായത്. ഇതോടെ ആകെ രോഗികളുടെ എണ്ണം 314 ആയി. 56 പേര്‍ ഇതിനകം രോഗമുക്തി നേടി. ഇപ്പോള്‍ ചികിത്സയിലുള്ളത് 256 പേര്‍. നിലവില്‍ കേരളത്തിലെ ട്രെന്‍ഡ് ആശാവഹമാണ്. പക്ഷേ ലോക്ഡൗണ്‍ പിന്‍വലിക്കുമ്പോള്‍ അത്യധികം ശ്രദ്ധ നാം ചെലുത്തിയില്ലെങ്കില്‍ അല്‍്പം സമയം കൊണ്ട് നാം നേടിയ മുന്‍തൂക്കം കൈവിട്ടു പോയേക്കാം. കര്‍ശന നിയന്ത്രണങ്ങളോടെ ഘട്ടം ഘട്ടമായി മാത്രം ലോക്ക് ഡൗണ്‍ പിന്‍വലിക്കുന്നതാവും ഉചിതം.

അതിനിടയില്‍ കേരളത്തില്‍ വേനല്‍ മഴയും എത്തിക്കഴിഞ്ഞു. കൊറോണ ബാധ നിലനില്‍ക്കുന്ന അതിജാഗ്രത വേണം. മഴക്കാലത്ത് പൊന്തി വരുന്ന പഴയ രോഗങ്ങളൊക്കെ ഇവിടൊക്കെ തന്നെ പതുങ്ങി ഇരിപ്പുണ്ടെന്നതിനാല്‍, ജാഗ്രത അത്യവശ്യമാണ്. കൊതുകിന്റെ പ്രജനനം കൂടിയാല്‍ ഡെങ്കി, ചിക്കന്‍ ഗുനിയ തുടങ്ങിയവ ഭീഷണി ആയി ഉയരും. ഡെങ്കി കൊതുകിന് വളരാന്‍ ഒരു സ്പൂണില്‍ കൊള്ളുന്ന വെള്ളം തന്നെ ധാരാളമാണ്. അതിനാല്‍ വീടിനും പരിസരത്തും വെള്ളം കെട്ടിക്കിടന്നു കൊതുകു പെരുകാന്‍ സാധ്യതയുള്ള ഉറവിടങ്ങള്‍ എല്ലാം ഇല്ലാതാക്കണം. റബര്‍ വിളയിലെ ചിരട്ടകള്‍, പൊട്ടിയ പാത്രങ്ങള്‍, ടയറുകള്‍, ചെരുപ്പുകള്‍, സണ്‍ഷെയ്ഡില്‍ കെട്ടിനില്‍ക്കാന്‍ സാധ്യതയുളള വെള്ളം, ഫ്രിജിന് താഴെയുള്ള ട്രെയിലെ വെള്ളം, പൂച്ചട്ടിയില്‍ കെട്ടിനില്‍ക്കുന്ന വെള്ളം ഒക്കെ ഒഴിവാക്കാന്‍ ശ്രദ്ധിക്കേണ്ടതാണ്. കൊതുകുകടി കൊള്ളാതിരിക്കാനുള്ള വ്യക്തിഗത സുരക്ഷാ മാര്‍ഗങ്ങളും സ്വീകരിക്കണം.