എനിക്ക് ദീപാവലി ആണെന്ന് തോന്നി; ആകാശത്തേയ്ക്ക് വെടിയുതിര്ത്ത പാര്ട്ടി നേതാവിനെ ബിജെപി സസ്പെന്ഡ് ചെയ്തു
കൊറോണ വൈറസിനെതിരെ ഐക്യദീപം തെളിയിക്കാനുളള പ്രധാനമന്ത്രി നരേന്ദ്രമോദിയുടെ ആഹ്വാനത്തിന് പിന്തുണയായി ആകാശത്തേയ്ക്ക് വെടിയുതിര്ത്ത പാര്ട്ടി നേതാവിനെ ബിജെപി സസ്പെന്ഡ് ചെയ്തു. ഉത്തര്പ്രദേശിലെ മഹിളാമോര്ച്ച ബല്റാംപൂര് യൂണിറ്റ് അധ്യക്ഷയായ മഞ്ജു തിവാരിയാണ് ഇന്നലെ രാത്രി ഒന്പത് മണിക്ക് ആകാശത്തേയ്ക്ക് വെടിയുതിര്ത്തത്. സംഭവം വിവാദമായതോടെ ഇവര്ക്കെതിരെ പൊലീസ് കേസെടുത്തിരുന്നു. ഇതിന് പിന്നാലെയാണ് ബിജെപി സസ്പെന്ഡ് ചെയ്തത്.
മഞ്ജു വെടിയുതിര്ക്കുന്ന വീഡിയോ സാമൂഹ്യ മാധ്യമങ്ങളില് വൈറലായതോടെയാണ് പൊലീസ് കേസെടുത്തത്. അച്ചടക്കലംഘനം ചൂണ്ടിക്കാണിച്ചാണ് മഞ്ജു തിവാരിയെ ബിജെപി സസ്പെന്ഡ് ചെയ്തത്. 'നഗരം ഒന്നാകെ മണ്ചിരാതുകളും മെഴുകുതിരികളും കൊണ്ട് ഐക്യദീപം തെളിയിച്ചത് കണ്ടു. എനിക്ക് ദീപാവലി ആണ് എന്ന തോന്നലുണ്ടായി. ഈ ആവേശത്തില് ഞാന് ആകാശത്തേയ്ക്ക് വെടിയുതിര്ത്തതാണ്. ഞാന് എന്റെ തെറ്റ് അംഗീകരിക്കുന്നു. ഇതില് മാപ്പും ചോദിക്കുന്നു' എന്നും മഞ്ജു തിവാരി പറഞ്ഞു.
കോറോണ വൈറസിനെ തുരത്താനുള്ള പോരാട്ടത്തില് പ്രതിരോധ പ്രവര്ത്തനങ്ങള്ക്ക് ഐക്യദാര്ഢ്യം പ്രഖ്യാപിക്കാനായി പ്രധാനമന്ത്രി നരേന്ദ്ര മോദി ആഹ്യാനം ചെയ്ത ദീപം തെളിയിക്കല് ഏറ്റെടുത്ത് കോടിക്കണക്കിന് ജനങ്ങള് വീട്ടിലെ ലൈറ്റുകള് അണച്ച് രാജ്യത്തിനായി വിളക്ക് തെളിയിച്ചു. രാജ്യത്തിന്റെ നാനാഭാഗങ്ങളിലുള്ളവര് ജാതി മത രാഷ്ട്രീയ ഭേദമന്യേ ആരോഗ്യ പ്രവര്ത്തകര്ക്കായി ദീപം തെളിയിച്ചു. ലോകമെമ്ബാടുമുള്ള ആരോഗ്യ പ്രവര്ത്തകര്ക്കാണ് ഇന്ത്യന് ജനത ആദരവര്പ്പിച്ചത്.
രാഷ്ട്രപതി രാംനാഥ് കോവിന്ദ്, ഉപരാഷ്ട്രപതി വെങ്കയ്യ നായിഡു, ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിംഗ്, കേന്ദ്ര ആരോഗ്യ മന്ത്രി ഹര്ഷ വര്ധന്, കേന്ദ്ര മന്ത്രിമാര്, വിവിധ സംസ്ഥാനങ്ങളിലെ മുഖ്യമന്ത്രിമാര്, ബിജെപി ദേശീയാദ്ധ്യക്ഷന് ജെ പി നദ്ദ, തുടങ്ങി നിരവധി പ്രമുഖര് ഐക്യദീപത്തില് പങ്കാളികളായി.
https://www.facebook.com/Malayalivartha