രാജ്യത്തെ 62 ജില്ലകളിലായാണ് ഇന്ത്യയിലെ കോവിഡ് ബാധിതരില്‍ 80 % പേരും ഉള്ളത്. തന്മൂലം ലോക്ഡൗണ്‍ അവസാനിച്ചാലും ഈ 62 ജില്ലകളില്‍ കര്‍ശന നിയന്ത്രണങ്ങള്‍ തുടരും. കേരളത്തില്‍, ഹോട്‌സ്‌പോട്ടുകളായി പ്രഖ്യാപിച്ച കാസര്‍കോട്, കണ്ണൂര്‍, കോഴിക്കോട്, മലപ്പുറം, തൃശൂര്‍, എറണാകുളം, പത്തനംതിട്ട, തിരുവനന്തപുരം ജില്ലകളും ഈ പരിധിയില്‍ വരുമെന്നാണു വിവരം. രാജ്യത്തെ 736 ജില്ലകളില്‍ 274 ജില്ലകളിലാണ് ഇതുവരെ കോവിഡ് റിപ്പോര്‍ട്ട് ചെയ്തത്. ഇതില്‍ ഏറ്റവും കൂടുതല്‍ കേസുകള്‍ കണ്ടെത്തിയ സ്ഥലങ്ങളില്‍ 'വൈറസ് ഔട്ട്‌ബ്രേക്ക്' തടയാനുള്ള പ്രത്യേക മാര്‍ഗനിര്‍ദേശം കഴിഞ്ഞദിവസം കേന്ദ്രം പുറത്തിറക്കിയിരുന്നു.

രാജസ്ഥാനിലെ ഭില്‍വാഡയില്‍ മാര്‍ച്ച് 19-ന് 6 പേര്‍ക്ക് രോഗം സ്ഥിരീകരിച്ചതിനു പിന്നാലെ, കര്‍ഫ്യൂ , അതിര്‍ത്തി അടയ്ക്കല്‍ , സേവനത്തിന് 6000 ഡോക്ടര്‍മാര്‍ , ലക്ഷണമുള്ള എല്ലാവര്‍ക്കും കോവിഡ് പരിശോധന , രോഗബാധിത സ്ഥലങ്ങളെ വിവിധ മേഖലകളായി (ക്ലസ്റ്റര്‍) തരംതിരിച്ചുള്ള നിരീക്ഷണം , പൊതുഇടങ്ങളില്‍ അണുനശീകരണം എന്നിങ്ങനെയുള്ള നിയന്ത്രണങ്ങള്‍ നടപ്പാക്കിയതുപോലെ ഈ ജില്ലകളിലും പ്രവര്‍ത്തനങ്ങള്‍ വേണമെന്ന നിര്‍ദേശം സര്‍ക്കാര്‍ പരിഗണിക്കുന്നുണ്ട്.

എയിംസ് ഡയറക്ടറും കോവിഡ് പ്രതിരോധത്തിനുള്ള കേന്ദ്ര കര്‍മസമിതി അംഗവുമായ ഡോ. രണ്‍ദീപ് ഗുലേറിയ, രാജ്യത്ത് മുംബൈ പോലെ ചിലയിടങ്ങളില്‍ കോവിഡ് സമൂഹവ്യാപന ഘട്ടത്തിലാണെന്ന് സ്ഥിരീകരിച്ചു. സമൂഹവ്യാപനമില്ലെന്ന് ഇതിനു ശേഷവും ആവര്‍ത്തിച്ച ആരോഗ്യമന്ത്രാലയം പക്ഷേ, ഡോ. രണ്‍ദീപിന്റെ വാക്കുകള്‍ തള്ളിയില്ല. പകരം, പ്രാദേശികമായി സമൂഹവ്യാപനമുണ്ടെന്ന ആരോഗ്യമന്ത്രാലയ നിലപാടു തന്നെയാണ് അദ്ദേഹവും പങ്കുവച്ചതെന്നു വിശദീകരിച്ചു.

ചില സ്ഥലങ്ങളില്‍ മാത്രമാണ് സമൂഹവ്യാപനമെന്നു വ്യക്തമാക്കിയ ഡോ. രണ്‍ദീപ്, രണ്ടാം ഘട്ടമായ പ്രാദേശിക വ്യാപനത്തിനും മൂന്നാം ഘട്ടമായ സമൂഹവ്യാപനത്തിനും ഇടയിലാണ് രാജ്യമെന്നും സൂചിപ്പിച്ചു. തുടര്‍ച്ചയായി അഞ്ചാംദിവസവും അഞ്ഞൂറിലേറെ പുതിയ കേസുകള്‍ റിപ്പോര്‍ട്ട് ചെയ്യപ്പെട്ടതിനു പിന്നാലെയാണു മുന്നറിയിപ്പ്. കേന്ദ്രം ഹോട്‌സ്‌പോട്ടുകളായി വിലയിരുത്തിയ സ്ഥലങ്ങളെക്കുറിച്ചാണു പരാമര്‍ശം.

ഇന്നലെയാണ് രാജ്യത്ത് ഒരു ദിവസം ഏറ്റവും കൂടുതല്‍ പേര്‍ കോവിഡ് ബാധിച്ചു മരിച്ചത്. മരണം നൂറു കടന്നു. ഇന്നലെ വൈകിട്ടു വരെയുള്ള 24 മണിക്കൂറിനിടെ 28 പേരാണു മരിച്ചത്. ആകെ 111 മരണം. 704 പുതിയ കേസുകള്‍ റിപ്പോര്‍ട്ട് ചെയ്തതോടെ ആകെ രോഗികള്‍ 4281 ആയി. സംസ്ഥാനങ്ങളടക്കം സ്ഥിരീകരിച്ച കണക്കു കൂടി ചേര്‍ത്താല്‍ ഇതു 4316 ആകും.

ലോക്ഡൗണ്‍ അവസാനിക്കുന്ന 14-നു ശേഷം ആഭ്യന്തര, രാജ്യാന്തര വിമാന സര്‍വീസുകള്‍ പുനരാരംഭിക്കുന്ന കാര്യത്തില്‍ അന്തിമ തീരുമാനമെടുത്തിട്ടില്ലെന്ന് വ്യോമയാന മന്ത്രാലയം. എയര്‍ ഇന്ത്യ ഒഴികെയുള്ളവ 14-നു ശേഷമുള്ള ആഭ്യന്തര യാത്രകള്‍ക്ക് ബുക്കിങ് ആരംഭിച്ച പശ്ചാത്തലത്തിലാണ് മന്ത്രാലയം നിലപാടറിയിച്ചത്. എയര്‍ ഇന്ത്യ ഈ മാസം 30 വരെ ബുക്കിങ് നിര്‍ത്തിവച്ചിരിക്കുകയാണ്.