പരിശോധനകളുടെ എണ്ണം വരും ദിവസങ്ങളില്‍ കൂട്ടുന്നതിലൂടെ കോവിഡ് വ്യാപനത്തെക്കുറിച്ചുള്ള ചിത്രം കൂടുതല്‍ വ്യക്തമാകുമെന്നതിനാല്‍ ലോക്ഡൗണ്‍ നീക്കുന്നതും പിന്നീടുള്ള നിയന്ത്രണങ്ങളും സംബന്ധിച്ചു വ്യക്തമായ തീരുമാനം ഈ മാസം 10-നു ശേഷമെടുക്കുമെന്ന് കേന്ദ്ര സര്‍ക്കാര്‍ വൃത്തങ്ങള്‍ വ്യക്തമാക്കി.

കര്‍ശന നിയന്ത്രണങ്ങളോടെ 15 മുതല്‍ ഗുരുതര പ്രശ്‌നമുള്ള സ്ഥലങ്ങളിലൊഴികെ ലോക്ഡൗണ്‍ ഒഴിവാക്കാനാണ് സര്‍ക്കാര്‍ ആലോചിച്ചിരുന്നത്. എന്നാല്‍, ചില ഇളവുകളോടെ ലോക്ഡൗണ്‍ തുടരാമെന്നാണു പല സംസ്ഥാനങ്ങളും നിര്‍ദേശിച്ചത്. കാര്‍ഷിക, ഉല്‍പാദന മേഖലകളുടെ പ്രവര്‍ത്തനം സാധ്യമാക്കാനുള്ള ഇളവുകളാണ് സംസ്ഥാനങ്ങള്‍ ആവശ്യപ്പെട്ടത്. എന്നാല്‍, ലോക്ഡൗണ്‍ തുടരുന്നതിനോടു േകന്ദ്രം യോജിക്കുന്നില്ലെന്നാണു സൂചന. ആളുകളുടെ കൂട്ടുംകൂടല്‍ കര്‍ശനമായി തടയുന്നതിന് ഊന്നല്‍ നല്‍കണമെന്നാണ് പ്രതിരോധ മന്ത്രി രാജ്‌നാഥ് സിങ്ങിന്റെ നേതൃത്വത്തില്‍ മന്ത്രിമാരുടെ സമിതി നടത്തിയ ചര്‍ച്ചയില്‍ അഭിപ്രായമുയര്‍ന്നത്.

രോഗബാധ സംബന്ധിച്ച ഇപ്പോഴത്തെ കണക്കുകളുടെ അടിസ്ഥാനത്തില്‍, നിലവില്‍ രാജ്യത്തെ 284 ജില്ലകളില്‍ മാത്രമാണു കോവിഡ് ബാധിതരുള്ളത്. അപ്പോള്‍, രാജ്യത്തിന്റെ 60 % പ്രദേശത്തും നിയന്ത്രണങ്ങളോടെ ലോക്ഡൗണ്‍ ഒഴിവാക്കാന്‍ സാധിക്കുമെന്ന് സര്‍ക്കാര്‍ വൃത്തങ്ങള്‍ പറഞ്ഞു. കാര്യങ്ങള്‍ വഷളായാല്‍ ലോക്ഡൗണ്‍ തുടരുകയല്ലാതെ മാര്‍ഗമില്ലാതെയാകും.

പ്രധാനമന്ത്രി നരേന്ദ്ര മോദി ഇന്നു പാര്‍ലമെന്റിലെ വിവിധ കക്ഷി നേതാക്കളുമായി വിഡിയോ കോണ്‍ഫറന്‍സിങ്ങിലൂടെ ചര്‍ച്ച നടത്തും. ഇരുസഭകളിലുമായി 5 എംപിമാരില്‍ കൂടുതലുള്ള കക്ഷികളുടെ നേതാക്കളുമായാണു ചര്‍ച്ച.

കൃഷിമേഖലയ്ക്കും അവശ്യസാധനങ്ങളുടെ നീക്കത്തിനുമായുള്ള നടപടി മന്ത്രിമാരുടെ സമിതി അവലോകനം ചെയ്തു. വിളവെടുപ്പു കണക്കിലെടുത്ത്, കൊയ്ത്തു യന്ത്രങ്ങള്‍ക്കും തൊഴിലാളികളുടെ നീക്കത്തിനും ഇളവു നിര്‍ദേശിച്ചിട്ടുണ്ട്. എന്നാല്‍, ജനത്തിന് ഇതേക്കുറിച്ച് ധാരണ ലഭിച്ചിട്ടില്ലെന്ന് യോഗം വിലയിരുത്തി.