നിസാമുദ്ദീന്‍ തബ്‌ലീഗ് സമ്മേളനത്തില്‍ പങ്കെടുത്തവര്‍ രോഗ പരിശോധന നടത്തണമെന്നും പൊലീസില്‍ റിപ്പോര്‍ട്ട് ചെയ്യണമെന്നുമുള്ള നിര്‍ദേശം പലരും അനുസരിക്കാത്ത സാഹചര്യത്തില്‍ സമ്മേളനത്തില്‍ പങ്കെടുത്തവര്‍ക്കെതിരെ ദേശീയ സുരക്ഷാ നിയമവും (എന്‍എസ്എ) കൊലപാതകശ്രമക്കുറ്റവും ചുമത്താനുള്ള നീക്കവുമായി വിവിധ സംസ്ഥാനങ്ങള്‍. ഉത്തര്‍പ്രദേശ്, അസം, ഉത്തരാഖണ്ഡ് തുടങ്ങിയ സംസ്ഥാനങ്ങളാണ് ഈ തീരുമാനമെടുത്തത്.

കോവിഡ് കേസുകള്‍ വര്‍ധിച്ച പശ്ചാത്തലത്തില്‍ 14-നു ശേഷവും ലോക്ഡൗണ്‍ തുടരാനുള്ള നീക്കത്തിലാണ് യുപി സര്‍ക്കാര്‍. കഴിഞ്ഞ 5 ദിവസത്തിനിടെ യുപിയില്‍ റിപ്പോര്‍ട്ട് ചെയ്യപ്പെട്ട 182 കേസുകളില്‍ 165 എണ്ണവും നിസാമുദ്ദീന്‍ സമ്മേളനവുമായി ബന്ധപ്പെട്ടതാണ്. തബ്‌ലീഗ് സമ്മേളനത്തില്‍ പങ്കെടുത്ത വിവരം മറച്ചുവച്ച 85 പേര്‍ക്കെതിരെ ഉത്തരാഖണ്ഡില്‍ 17 കേസുകള്‍ റജിസ്റ്റര്‍ ചെയ്തിട്ടുണ്ട്.

യുപിയിലെ കോവിഡ് രോഗികളുടെ എണ്ണം 305 ആയി. 3 പേര്‍ മരിച്ചു. ഹരിയാനയില്‍ പുതിയ 23 കേസുകളും സമ്മേളനവുമായി ബന്ധപ്പെട്ടവരാണ്. ക്വാറന്റീനിലിരിക്കെയുള്ള മോശം പെരുമാറ്റത്തിനു ഡല്‍ഹിയിലും മുംബൈയിലും തബ്‌ലീഗ് അംഗങ്ങള്‍ക്കെതിരെ കേസ് റജിസ്റ്റര്‍ ചെയ്തിട്ടുണ്ട്.

നിസാമുദ്ദീന്‍ സമ്മേളനത്തില്‍ പങ്കെടുത്തവരില്‍ പട്ടികയില്‍പ്പെടാത്തവര്‍ ആരോഗ്യസംവിധാനത്തെ സമീപിക്കണമെന്ന് മുഖ്യമന്ത്രി പിണറായി വിജയന്‍. അവര്‍ ആശങ്കപ്പെടേണ്ട കാര്യമില്ലെന്നും എല്ലാ സഹായങ്ങളും നല്‍കുമെന്നും അദ്ദേഹം പറഞ്ഞു. ധാരാവിയില്‍ കോവിഡ് ബാധിച്ച് മരിച്ചയാളുടെ വീട്ടില്‍ ,നിസ്സാമുദീനിലെ മതസമ്മേളനത്തില്‍ പങ്കെടുത്ത 10 മലയാളികള്‍ താമസിച്ചിരുന്നതായി മുംബൈ പൊലീസ് സ്ഥിരീകരിച്ചു. ധാരാവിയില്‍ നിന്ന് ഇവര്‍ കേരളത്തിലേക്കാണു മടങ്ങിയത്.

ഇതിനിടെ, ധാരാവിയില്‍നിന്ന് തിരിച്ചെത്തിയ 10 പേരെ കണ്ടെത്താനുള്ള ശ്രമം കേരള ആരോഗ്യ വകുപ്പ് തുടങ്ങി. പങ്കെടുത്ത് 21 പേര്‍ കോഴിക്കോട് ജില്ലയില്‍ തിരിച്ചെത്തിയെന്നാണ് കേരളത്തില്‍ ലഭ്യമായ കണക്ക്. 4 പേര്‍ക്ക് രോഗം സ്ഥിരീകരിച്ചു. 9 പേരുടെ ഫലം നെഗറ്റീവാണ്. 8 പേരുടെ സ്രവം കൂടി പരിശോധനയ്ക്ക് അയച്ചിട്ടുണ്ട്. മുംബൈയിലെത്തിയ സംഘത്തിലെ 5 പേര്‍, കോവിഡ് ബാധിച്ച മരിച്ചയാളിന്റെ വീട്ടിലും, 5 പേര്‍ സമീപത്തെ മസ്ജിദിലുമാണ് താമസിച്ചിരുന്നെന്ന് മുംബൈ പൊലീസ് പറയുന്നു.