രാജ്യത്ത് കൊവിഡ് 19 ബാത തുടരുന്ന പശ്ചാത്തലത്തില്‍ രോഗം നിയന്ത്രിക്കാന്‍ വേണ്ട നടപടിയുടെ ഭാഗമായി പരിശോധനയ്ക്കായി എത്തുന്നവരില്‍ നി്ന്നും സ്വകാര്യ ലാബുകള്‍ ഒരുതരത്തിലുള്ള ഫീസും ഈടാക്കരുതെന്ന് സുപ്രീം കോടതി. രാജ്യത്താകമാനമുള്ള അംഗീകൃത സ്വകാര്യ ലാബുകള്‍ക്കും പ്രസ്തുത ഉത്തരവ് ബാധകമായിരിക്കും. കൊവിഡ് പരിശോധന സൗജന്യമായി നടത്തുന്നതിന് സ്വകാര്യലാബുകള്‍ക്ക് വ്യക്തമായ നിര്‍ദേശം നല്‍കുന്നതിന് കേന്ദ്രസര്‍ക്കാരിനെ ചുമതലപെടുത്തണമെന്ന ആവശ്യവുമായി അഭിഭാഷകനായ ശശാങ്ക് ദിയോ സുധയാണ് സുപ്രീം കോടതിയെ സമീപിച്ചത്. ജസ്റ്റിസ് അശോക് ഭൂഷണ്‍, എസ്. രവീന്ദ്ര ഭട്ട് എന്നിവരടങ്ങിയ ബെഞ്ചാണ് കേസ് പരിഗണിച്ചത്. കൊവിഡ് നിര്‍ണയ ടെസ്റ്റുകള്‍ സര്‍ക്കാര്‍ ലാബുകളില്‍ നിലവില്‍ സൗജന്യമാണ്. എന്നാല്‍ എന്‍.എ.ബി.എല്‍ അംഗീകാരമുള്ളതോ ഡബ്ല്യു.എച്ച്.ഒ അല്ലെങ്കില്‍ ഐ.സി.എം.ആര്‍ അംഗീകരിച്ചിട്ടുള്ളതോ ആയ ലാബുകളില്‍ മാത്രമെ കൊവിഡ്19 നിര്‍ണയം നടത്താവൂ എന്നും സുപ്രീം കോടതി നിഷ്‌കര്‍ഷിച്ചു.ദിവസേന രാജ്യത്തെ 118 ലാബുകളിലുമായി 15,000 കൊവിഡ് ടെസ്റ്റുകളാണ് നടത്തിയിരുന്നത്. രോഗവ്യാപനത്തിന്റെ തോത് വര്‍ദ്ധിച്ചതിനെ തുടര്‍ന്ന് 47 സ്വകാര്യ ലാബുകള്‍ക്ക് പരിശോധന നടത്തുന്നതിന് അനുമതി നല്‍കുകയായിരുന്നു.