കോവിഡ് മഹാമാരിക്കെതിരേയുള്ള പോരാട്ടം കഴിഞ്ഞ കുറച്ചു ദശകങ്ങളിലെ ഏറ്റവും വലിയ അദൃശ്യയുദ്ധമാണെന്ന് പ്രതിരോധമന്ത്രി രാജ്നാഥ് സിങ്. എല്ലാ ശാഖകളെയും ഏകോപിപ്പിച്ചുകൊണ്ട് ജനങ്ങളുടെ പിന്തുണയോടെ യുദ്ധകാലാടിസ്ഥാനത്തിലാണ് ഇന്ത്യ ഇതിനെ നേരിടുന്നത്. ആപല്‍ശക്തികളില്‍നിന്നും രാജ്യത്തെ രക്ഷിക്കാന്‍ സൈന്യം സുസജ്ജമാണ്. മൂന്നു സേനാ വിഭാഗങ്ങളെയും അവയുടെ തന്ത്രപരമായ സമ്പത്തും വൈറസ്ബാധയില്‍ നിന്ന് സംരക്ഷിച്ചുനിര്‍ത്താന്‍ കൃത്യമായ സംവിധാനം രാജ്യം സ്വീകരിച്ചിട്ടുണ്ടെന്നും
അദ്ദേഹം പറഞ്ഞു.

അതിര്‍ത്തിയില്‍ പാകിസ്താന്‍ വെടിനിര്‍ത്തല്‍ കരാര്‍ ലംഘിക്കുന്നത് തുടരുകയാണ്. എന്നാല്‍, ഇന്ത്യന്‍ മണ്ണിലെത്താതെ തന്ത്രപരമായി അവയെ തടഞ്ഞുനിര്‍ത്താന്‍ സൈന്യത്തിനാകുന്നുണ്ട്, വാര്‍ത്താ ഏജന്‍സിയായ പി.ടി.ഐ.യുമായുള്ള അഭിമുഖത്തില്‍ പ്രതിരോധമന്ത്രി പറഞ്ഞു.