ഇനി തൊട്ടാല്‍ തീക്കളി; പ്രതിരോധ പ്രവര്‍ത്തകരെ ആക്രമിച്ചാല്‍ 5 ലക്ഷം പിഴയും 7 വര്‍ഷം തടവും ; കരട് ഓര്‍ഡിനന്‍സ് പാസ്സാക്കി ഉത്തര്‍പ്രദേശ് സര്‍ക്കാര്‍
കൊറോണ വൈറസ് വ്യാപനത്തിന്റെ പശ്ചാത്തലത്തില്‍ രാപ്പകല്‍ ഇല്ലാതെ പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ടിട്ടുള്ള കൊറോണ യോദ്ധാക്കള്‍ക്കെതിരായ ആക്രമണങ്ങള്‍ ഇല്ലാതാക്കാന്‍ ശക്തമായ നടപടിയുമായി ഉത്തര്‍പ്രദേശ് സര്‍ക്കാര്‍. പ്രതിരോധ പ്രവര്‍ത്തകരെ ആക്രമിച്ചാല്‍ 5 ലക്ഷം രൂപ പിഴയും 7 വര്‍ഷം തടവും ശിക്ഷയായി നല്‍കുമെന്ന് സര്‍ക്കാര്‍ അറിയിച്ചു. ഇത് സംബന്ധിച്ച കരട് ഒര്‍ഡിനന്‍സും മന്ത്രിസഭ പാസ്സാക്കി.
നേരത്തെ ആരോഗ്യ പ്രവര്‍ത്തകര്‍ക്കെതിരായ ആക്രമണങ്ങള്‍ ഇല്ലാതാക്കാന്‍ കേന്ദ്ര സര്‍ക്കാര്‍ ഓര്‍ഡിനന്‍സ് കൊണ്ടുവന്നിരുന്നു. ഇതിന് പിന്നാലെയാണ് ആരോഗ്യപ്രവര്‍ത്തകര്‍, ശുചീകരണ തൊഴിലാളികള്‍, പോലീസുകാര്‍ എന്നിവര്‍ ഉള്‍പ്പെട്ട കൊറോണ യോദ്ധാക്കാളെ ആക്രമിച്ചാല്‍ കടുത്ത ശിക്ഷ നല്‍കുന്നതിനുള്ള ഓര്‍ഡിനന്‍സ് യുപി മന്ത്രിസഭ പാസ്സാക്കിയത്. നിലവില്‍ പ്രതിരോധ പ്രവര്‍ത്തകരെ ആക്രമിക്കുന്നവര്‍ക്കെതിരെ ദേശീയ സുരക്ഷാ നിയമം ചുമത്തിയാണ് കേസ് എടുക്കുന്നത്. കൊറോണ വൈറസ് വ്യാപനത്തിന്റെ പശ്ചാത്തലത്തില്‍ പ്രതിരോധ പ്രവര്‍ത്തനങ്ങളില്‍ ഏര്‍പ്പെട്ടിരിക്കുന്ന പ്രവര്‍ത്തകര്‍ വലിയ വെല്ലുവിളിയാണ് ചുറ്റുപാടുനിന്നും നേരിടുന്നത്. പല സംസ്ഥാനങ്ങളിലും ഇവര്‍ ആക്രമണത്തിന് ഇരയാകുന്നുണ്ട്. ഉത്തര്‍പ്രദേശിലും ആരോഗ്യപ്രവര്‍ത്തകര്‍ വ്യാപകമായി ആക്രമിക്കപ്പെടുന്നതായുള്ള റിപ്പോര്‍ട്ടുകള്‍ പുറത്തുവന്നിരുന്നു. ഈ പശ്ചാത്തലത്തിലാണ് പ്രതിരോധ പ്രവര്‍ത്തകരെ ആക്രമിക്കുന്നവര്‍ക്കെതിരെ നടപടി കടുപ്പിക്കാന്‍ സര്‍ക്കാര്‍ തീരുമാനിച്ചത്.
https://www.facebook.com/Malayalivartha
