പി.സി. ജോര്ജ് പ്രശ്നത്തില് ഉമ്മന്ചാണ്ടി എ.കെ. ആന്റണിയുമായി ചര്ച്ച നടത്തി; വെള്ളിയാഴ്ച കഴിഞ്ഞ് എല്ലാം പറയാമെന്ന് പിസി ജോര്ജ്
പി.സി. ജോര്ജ് പ്രശ്നവുമായി ബന്ധപ്പെട്ട് യു.ഡി.എഫിലുണ്ടായ പ്രതിസന്ധി സംബന്ധിച്ച് മുഖ്യമന്ത്രി ഉമ്മന്ചാണ്ടി മുതിര്ന്ന കോണ്ഗ്രസ് നേതാവ് എ.കെ. ആന്റണിയുമായി ചര്ച്ച നടത്തി. ഇന്നുരാവിലെ കൊച്ചിയിലായിരുന്നു കൂടിക്കാഴ്ച. പി.സി. ജോര്ജുമായി ബന്ധപ്പെട്ട പ്രശ്നങ്ങള് മാത്രമാണ് ചര്ച്ച ചെയ്തതെന്നാണ് വിവരം. എല്ലാ പ്രശ്നങ്ങളും പരിഹരിക്കുമെന്ന് കൂടിക്കാഴ്ചയ്ക്കുശേഷം ആന്റണി പറഞ്ഞു. ഇതിലും വലിയ പ്രതിസന്ധി യു.ഡി.എഫ് നേരിട്ടിട്ടുണ്ട്. അതെല്ലാം അതിജീവിച്ചിട്ടുണ്ട്. നിലവില് യു.ഡി.എഫില് പ്രതിസന്ധിയൊന്നുമില്ലെന്നും ആന്റണി പറഞ്ഞു.
അതേസമയം, മാധ്യമ പ്രവര്ത്തകരോട് പ്രതികരിക്കാന് മുഖ്യമന്ത്രി തയാറായില്ല. കഴിഞ്ഞദിവസം പറഞ്ഞതില് നിന്ന് കൂടുതലൊന്നും പറയാനില്ലെന്നുമാത്രമാണ് ഉമ്മന്ചാണ്ടി പറഞ്ഞത്.
അതേസമയം ദു:ഖവെള്ളിക്ക് ശേഷം പലതും വെളിപ്പെടുത്തുമെന്ന് പിസി ജോര്ജ് പറഞ്ഞു. വിശുദ്ധവാരം ആരംഭിച്ചതിനാല് കൂടുതല് ഒന്നും പറയുന്നില്ലെന്നും ജോര്ജ് കൂട്ടിച്ചേര്ത്തു. മാണി കാണിച്ചത് ക്രൂരതയാണ്. മാണി പറയാതെ ഒന്നും ചെയ്തിട്ടില്ല. യു.ഡി.എഫിനെ നശിപ്പിക്കാന് താന് ശ്രമിച്ചെന്ന മാണിയുടെ ആരോപണം ശരിയല്ല. മാണി പറഞ്ഞത് അനുസരിച്ചതാണ് യു.ഡി.എഫ് വിരോധമായി ചിത്രീകരിച്ചിട്ടുള്ളത്. ഇനി മാണി പറയുന്നത് കേള്ക്കില്ല. യു.ഡി.എഫ് പറയുന്നത് അനുസരിക്കും.
തന്റെ കരള് പറിച്ചെടുത്ത് രാഷ്ട്രീയമായി ഇല്ലാതാക്കുകാണ് മാണിയുടെ ഉദ്ദേശ്യം. ഇത്രയൊക്കെ പ്രശ്നങ്ങളുണ്ടായിട്ടും ആരെയും വിളിച്ച് പിന്തുണ ആവശ്യപ്പെട്ടില്ല. യു.ഡി.എഫ് നേതാക്കളെ വിശ്വസിക്കാനുള്ള ധാര്മ്മികത മാണി കാണിക്കണം. പാര്ട്ടിയില് തനിക്കുള്ള സ്ഥാനം കാലം തെളിയിക്കും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
