പ്രവാസികൾക്ക് ആശ്വാസമായി മസ്കറ്റില്‍ നിന്ന് തിരുവനന്തപുരത്തേക്കും കണ്ണൂരിലേക്കുമുള്ള സർവീസുകള്‍ എയർ ഇന്ത്യ എക്സ്‍പ്രസ് പുനരാരംഭിക്കുന്നു. ഏപ്രിൽ അഞ്ച് മുതൽ ഏപ്രിൽ 30 വരെയുള്ള പുതിയ ഷെഡ്യൂളാണ് എയർലൈൻ പ്രഖ്യാപിച്ചിരിക്കുന്നത്.

തിങ്കൾ, ബുധൻ, വെള്ളി, ഞായർ ദിവസങ്ങളിൽ രാത്രി 11:25ന് മസ്‌കറ്റിൽ നിന്ന് പുറപ്പെടുന്ന വിമാനം അടുത്ത ദിവസം പുലർച്ചെ 4:55ന് തിരുവനന്തപുരത്തെത്തും. തിങ്കൾ, ബുധൻ, വെള്ളി, ഞായർ ദിവസങ്ങളിൽ രാത്രി 8:10ന് മസ്‌കറ്റിൽ നിന്ന് പുറപ്പെട്ട് പുലർച്ചെ 1:20ന് കണ്ണൂരിലെത്തും. മുംബൈ, ദില്ലി സെക്ടറുകളിലേക്കുള്ള സർവീസുകൾ നിലവിലുള്ളതുപോലെ തുടരും. അതേസമയം കോഴിക്കോട്, കൊച്ചി സെക്ടറുകളിലേക്കുള്ള സർവീസുകൾ പുതിയ ഷെഡ്യൂളിലില്ല.

യുഎഇ ആകാശപരിധിയിൽ തടഞ്ഞ ഡ്രോണിന്റെ അവശിഷ്ടങ്ങൾ കൃഷിയിടത്തിൽ പതിച്ച് പ്രവാസി കൊല്ലപ്പെട്ടു. ഫുജൈറയിലെ അൽ റിഫ മേഖലയിലാണ് സംഭവം. ബംഗ്ലാദേശ് സ്വദേശിയാണ് മരിച്ചത്. ഇന്ന്(ബുധൻ) രാവിലെയായിരുന്നു അപകടമെന്ന് ഫുജൈറ ഗവൺമെന്റ് മീഡിയ ഓഫിസ് അറിയിച്ചു.

ഫുജൈറയ്ക്ക് മുകളിലെത്തിയ ഡ്രോൺ യുഎഇ വ്യോമപ്രതിരോധ സേന വിജയകരമായി തകർത്തിരുന്നു. ഇതിന്റെ അവശിഷ്ടങ്ങൾ താഴെയുള്ള കൃഷിയിടത്തിൽ പതിച്ചതാണ് മരണകാരണമായത്. സംഭവസ്ഥലത്ത് ഫുജൈറ അധികൃതരും എമർജൻസി വിഭാഗവും പരിശോധന തുടരുകയാണ്. ഫെബ്രുവരി 28-ന് ആരംഭിച്ച യുദ്ധസാഹചര്യത്തെത്തുടർന്ന് യുഎഇയിൽ ഡ്രോൺ, മിസൈൽ അവശിഷ്ടങ്ങൾ വീണുണ്ടാകുന്ന മരണസംഖ്യ ഇതോടെ 12 ആയി. ജനങ്ങൾ പരിഭ്രാന്തരാകരുതെന്നും ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും അധികൃതർ കർശന നിർദേശം നൽകിയിട്ടുണ്ട്. സമൂഹമാധ്യമങ്ങളിലൂടെ തെറ്റായ വാർത്തകൾ പ്രചരിപ്പിക്കുന്നവർക്കെതിരെ നടപടിയുണ്ടാകുമെന്നും ഫുജൈറ അധികൃതർ മുന്നറിയിപ്പ് നൽകി.