ചരിത്രത്തിലാദ്യമായി 100 ശതമാനം സമയനിഷ്ഠ നിരക്ക് കൈവരിച്ചതായി ഇന്ത്യന്‍ റെയില്‍വേ. അതായത് യാത്രക്കാരുമായി പോയ ട്രെയിനുകളെല്ലാം കാലതാമസം നേരിടാതെ കൃത്യസമയത്തുതന്നെ ലക്ഷ്യസ്ഥാനത്ത് എത്തിചേര്‍ന്നു. മൊത്തം ട്രെയിനുകളില്‍ ഒരു ശതമാനം മാത്രമാണ് ഇപ്പോള്‍ ട്രാക്കുകളില്‍ ഓടുന്നത്. ട്രാക്കുകളില്‍ തിരക്ക് കുറവായതുകൊണ്ടാണ് ഈ നേട്ടം കൈവരിക്കാന്‍ റെയില്‍വേക്ക് സാധിച്ചത്. എന്നാല്‍ ചരിത്രത്തിലാദ്യമായി ഈ നേട്ടം കൈവരിച്ചതില്‍ അഭിമാനവും സന്തോഷവും പങ്കുവയ്ക്കുകയാണ് റെയില്‍വേയും കേന്ദ്ര റെയില്‍വേ മന്ത്രി പീയൂഷ് ഗോയലും.

റെയില്‍വേയുടെ കണക്കനുസരിച്ച് ജൂണ്‍ 23 ന് 99.54 ശതമാനമായിരുന്നു ട്രെയിനുകളുടെ സമയനിഷ്ഠത. ഇതാണ് ഇതിന് മുമ്പത്തെ ഏറ്റവും മികച്ച സമയനിഷ്ഠ. 'ഫാസ്റ്റ് ലെയ്‌നിലെ ട്രെയിനുകള്‍: അഭൂതപൂര്‍വമായ നിലവാരത്തിലേക്ക് സേവനങ്ങള്‍ മെച്ചപ്പെടുത്തിക്കൊണ്ട് ഇന്ത്യന്‍ റെയില്‍വേ 2020 ജൂലൈ ഒന്നിന് 100 ശതമാനം സമയനിഷ്ഠ നിരക്ക് നേടി ചരിത്രം കുറിച്ചു.' വെന്ന് കേന്ദ്ര റെയില്‍വേ മന്ത്രി പീയൂഷ് ഗോയല്‍ ഇന്ന് ട്വീറ്റ് ചെയ്തു. ഓഗസ്റ്റ് 12 വരെയുള്ള എല്ലാ സാധാരണ ട്രെയിനുകളും റെയില്‍വേ റദ്ദാക്കിയിരുന്നു. 230 പ്രത്യേക ട്രെയിനുകളുടെ ഓട്ടത്തില്‍ 100 ശതമാനം കൃത്യനിഷ്ഠത ഉറപ്പുവരുത്താന്‍ റെയില്‍വേ പ്രത്യേക നിര്‍ദേശം നല്‍കിയിരുന്നു. ഈ ട്രെയിനുകളുടെ എണ്ണം രാജ്യത്തെ ആകെ ട്രെയിനുകളുടെ രണ്ടു ശതമാനത്തിലും കുറവാണ്.
15 ജോഡി രാജധാനി സ്‌പെഷ്യല്‍ ട്രെയിനുകളും 100 ജോഡി പാസഞ്ചര്‍ ട്രെയിനുകളും കാലതാമസമില്ലാതെ ഷെഡ്യൂള്‍ പാലിക്കുന്നുണ്ടെന്ന് ഉറപ്പുവരുത്തണമെന്ന് റെയില്‍വേ ബോര്‍ഡ് ചെയര്‍മാന്‍ വി കെ യാദവ് എല്ലാ ജനറല്‍ മാനേജര്‍മാരോടും ഡിവിഷണല്‍ റെയില്‍വേ മാനേജര്‍മാരോടും ആവശ്യപ്പെട്ടിരുന്നു. നിലവില്‍ നെറ്റ്‌വര്‍ക്കില്‍ ഓടുന്ന ട്രെയിനുകളുടെ എണ്ണം വളരെ കുറവായതിനാല്‍ സമയനിഷ്ഠ 100 ശതമാനം ആയിരിക്കണമെന്നാണ് നിര്‍ദേശം.

സ്വകാര്യ നിക്ഷേപത്തിന് തയാറെക്കുന്ന റെയില്‍വേക്ക് ഈ നേട്ടം വലിയ വിജയമാണ്. 30,000 കോടി രൂപയുടെ സ്വകാര്യ നിക്ഷേപത്തിനാണ് റെയില്‍വേ ഒരുങ്ങുന്നത്. ഇന്ത്യന്‍ റെയില്‍വേ ശൃംഖലയില്‍ പാസഞ്ചര്‍ ട്രെയിനുകള്‍ ഓടിക്കുന്നതിനുള്ള സ്വകാര്യ നിക്ഷേപത്തിനുള്ള ആദ്യ സംരംഭമാണിത്. ഇന്ത്യന്‍ റെയില്‍വേ കാറ്ററിംഗ് ആന്‍ഡ് ടൂറിസം കോര്‍പ്പറേഷന്‍ (ഐആര്‍സിടിസി) ലഖ്‌നൗ-ദില്ലി തേജസ് എക്‌സ്പ്രസ് എന്നിവയില്‍ സ്വകാര്യ പങ്കാളിത്വം റെയില്‍വേ കൊണ്ടു വന്നിട്ടുണ്ട്.